༢༠༡༡ ཟླ་ ༣ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༣ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་སྲིད་བློན་སྐུ་ཞབས་ནཱའོ་ཊོ་ཀན་(H.E. Naoto Kan) མཆོག་ལ་ཉེ་ལམ་ཡུལ་དེའི་བྱང་ཤར་ཁུལ་དུ་ས་ཡོམ་ཚབས་ཆེ་བྱུང་སྟེ་མི་རྒྱུ་གཉིས་ལ་གོད་ཆག་བྱུང་བའི་གནས་ཚུལ་གསན་པར་མགོན་པོ་གང་ཉིད་མཆོག་ལ་ཐུགས་འཚབ་དང་བློ་ཕམ་ཧ་ཅང་བྱུང་བའི་ཐུགས་གསོའི་གསུང་འཕྲིན་ཞིག་སྩལ་ཡོད། དེ་ཡང་གསུང་འཕྲིན་དེའི་ནང་མགོན་པོ་གང་ཉིད་མཆོག་གིས་ས་ཡོམ་གྱི་གོད་ཆག་འོག་རྐྱེན་འདས་སུ་གྱུར་བ་རྣམས་དང་ཁོང་ཚོའི་རྗེས་ཤུལ་ནང་མི་རྣམས་ལ་གདུང་སེམས་མཉམ་སྐྱེ་དང་ཐུགས་སྨོན་མཛད་ཡོད། དེ་བཞིན་༸གོང་ས་མཆོག་གིས་ཉི་ཧོང་གཞུང་ནས་གོད་ཆག་བྱུང་སྐབས་མྱུར་སྐྱོབ་ལས་གཞིའི་ཐོག་གྲ་སྒྲིག་ཚགས་ཚུད་ཡོད་རྐྱེན་གོད་ཆག་ཇེ་སྡུག་ཏུ་མི་འགྲོ་རྒྱུར་ཕན་ཐོགས་ཆེན་པོ་བྱུང་ཡོད་པར་ཉི་ཧོང་གཞུང་ལ་བསྔགས་བརྗོད་མཛད་ཡོད། ཕྱོགས་མཚུངས་མགོན་པོ་གང་ཉིད་མཆོག་གིས་ཉི་ཧོང་གི་ནང་པ་ཚོར་ད་ལྟའི་དུས་ཚོད་འདིར་ཤེས་རབ་སྙིང་པོ་གསུང་འདོན་གནང་ན་ཚེ་སྲོག་ཤོར་བ་རྣམས་ལ་ཕན་ཐོགས་ཡོད་པ་ཙམ་མ་ཟད། མ་འོངས་པར་རྐྱེན་ངན་འདི་ལྟར་མི་ཡོང་བར་ཕན་ཐོགས་ཆེན་པོ་ཡོད། དེ་བཞིན་གོད་ཆག་ཕོག་པ་རྣམས་ཀྱི་ཆེད་ཤེས་རབ་སྙིང་པོ་འབུམ་གཅིག་གསོག་སྒྲུབ་གནང་རྒྱུ་ཡིན་ཞེས་གསུང་འཕྲིན་སྩལ་ཡོད།
ཕྱི་ཚེས་ ༡༣ ཉིན་སྔ་དྲོ་ཆུ་ཚོད་ ༦།༠༠ ཐོག་དཔལ་ལྡན་སྐུ་སྒེར་ཡིག་ཚང་གིས་གོ་སྒྲིག་ཐོག་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་དགོན་སྡེ་ཁག་གི་གྲྭ་བཙུན་རྣམས་ཀྱིས་ཉི་ཧོང་ནང་ས་ཡོམ་གྱི་གོད་ཆག་ཕོག་པ་རྣམས་ཀྱི་ཆེད་སྨོན་ལམ་གསུང་འདོན་གནང་ཡོད། ཕྱོགས་མཚུངས་གདན་ས་ཁག་དང། རྣམ་རྒྱལ་གྲྭ་ཚང་། ཀིརྟི་གྲྭ་ཚང། རིག་ལམ་སློབ་གཉེར་ཁང། ཚེ་མཆོག་གླིང། བཙུན་དགོན་དགའ་ལྡན་ཆོས་གླིང་སོགས་ཀྱི་གྲྭ་བཙུན་རྣམས་ཀྱིས་ཉི་ཧོང་ནང་ས་ཡོམ་གྱི་གོད་ཆག་ཕོག་པ་རྣམས་ཀྱི་ཆེད་ཤེས་རབ་སྙིང་པོ་གསོག་སྒྲུབ་གནང་བཞིན་ཡོད་པ་བཅས།།