ཕྱི་ལོ་ ༢༠༡༨ ཟླ་ ༨ ཚེས་ ༡ རེས་གཟའ་ལྷག་པ།
༄༅། །འདི་གར་ཨ་རི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་མིའི་སྒྲིག་འཛུགས་ཀྱི་བཀའ་ཤག་ནས་བྱང་ཨ་རིའི་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་བཀའ་དྲུང་ཡིག་ཚང་དུ་རྒྱ་ནག་གནད་དོན་དཔྱད་ཞིབ་བྱེད་རྒྱུ་དང་། རྒྱ་རིགས་འབྲེལ་མཐུད་ཀྱི་དྲུང་ཆེའི་ལས་འགན་དུ་གནས་སྤོས་བསྐོ་བཞག་གནང་བའི་གནས་ཚུལ་རྒྱ་རིགས་གྲོགས་པོ་ཚོས་ཤེས་རྟོགས་བྱུང་རྗེས་ཨ་རིའི་གྲོང་ཁྱེར་ནིའུ་ཡོག་དང་། ནིའུ་འཇར་སི་དུ་ཡོད་པའི་ལས་རིགས་འདྲ་མིན་གྱི་རྒྱ་རིགས་ཚོས་ཉིན་ཤས་སྔོན་ནིའུ་ཡོག་གྲོང་ཁྱེར་ཕེ་ལ་ཤིང་ Flushing ཁུལ་གྱི་གསོལ་མགྲོན་ཁང་ཞིག་ནང་ཤེས་རིག་བཀའ་བློན་པདྨ་དབྱངས་ཅན་མཆོག་དང་། བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དབུ་བཞུགས་ཐོག་དགོང་དྲོའི་གསོལ་སྟོན་རྒྱས་པོ་ཞིག་བཤམས་ཡོད།
གསོལ་སྟོན་འདུ་འཛོམས་གཙོ་སྐྱོང་གནང་མཁན་དགེ་རྒན་ཆེན་མོ་ཤཱ་མིང་ Professor Xia Ming གིས་ངོ་སྤྲོད་གསུང་བཤད་གནང་སྐབས་གསུང་དོན། དེ་རིང་ང་ཚོ་ལས་རིགས་ཁག་གི་རྒྱ་རིགས་རྣམས་འདིར་འཛོམས་དགོས་དོན་གཙོ་བོ་ནི། བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་པདྨ་དབྱངས་ཅན་མཆོག་ཐེངས་དང་པོར་ནིའུ་ཡོག་ཏུ་ཕེབས་པར་རྒྱ་རིགས་ཚོས་དགའ་བསུའི་སྣེ་ལེན་དང་། བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ལ་རྒྱ་རིགས་གྲོགས་པོ་ངོ་སྤྲོད།
ང་ཚོའི་ཡུན་རིང་གི་གྲོགས་པོ་རྒྱ་རིགས་འབྲེལ་མཐུད་འགན་འཛིན་ཀུན་དགའ་བཀྲ་ཤིས་ལགས་ལས་གནས་གསར་པར་ཕེབས་གཏན་འཁེལ་བར་ཕེབས་སྐྱེལ་ཞུ་རྒྱུ་བཅས་ཀྱི་ཆེད་དུ་དེ་རིང་འདིར་འཛོམས་ཤིང་། ནིའུ་ཡོག་དང་། ནིའུ་འཇར་སི། ཕན་སི་ཝི་ནི་ཡ་ Pennsylvania སོགས་ནས་རྒྱ་རིགས་བརྒྱ་དང་བརྒྱད་ཙམ་འཛོམས་ཡོད། ཐོ་བཀོད་ཀྱིས་ཡོང་འདོད་བྱེད་མཁན་མང་པོ་ཞིག་འདུག་ཀྱང་ས་ཆའི་རྒྱ་ཁྱོན་གྱི་ཆ་ནས་འདི་ལས་གཤོང་མ་སོང་ཞེས་གསུངས།
ཤེས་རིག་བཀའ་བློན་པདྨ་དབྱངས་ཅན་མཆོག་དང་། སྐུ་ཚབ་དོན་གཅོད་དངོས་གྲུབ་ཚེ་རིང་ལགས། ནིའུ་ཡོག་དང་ནིའུ་འཇར་སི་བོད་རིགས་སྤྱི་མཐུན་ཚོགས་པའི་ཚོགས་གཙོ་ནོར་བུ་ཚེ་རིང་ལགས་ནས་འཚམས་འདྲིའི་གསུང་བཤད་གནང་བ་ཕྱོགས་གཅིག་ཏུ་བསྡུས་ན། རྒྱ་རིགས་ཚོས་བོད་དོན་ལ་ཡུན་རིང་རྒྱབ་སྐྱོར་དང་། དེ་རིང་ཆེད་དུ་དགའ་བསུ་དང་ཕེབས་སྐྱེལ་གྱི་གསོལ་སྟོན་གྲ་སྒྲིག་གནང་བར་ཐུགས་ཆེ་ཞུས་ཡོད་ལ། སྐུ་ཚབ་དོན་གཅོད་ཀྱིས་རྒྱ་རིགས་འབྲེལ་མཐུད་པ་ཀུན་དགའ་བཀྲིས་ལགས་ཀྱི་ཕྱག་ལས་གདེང་འཇོག་གནང་བ་དང་། རིང་པོར་མ་ཐོགས་པར་ཁོང་གི་ཚབ་ཞིག་གཏན་འཁེལ་ཡོང་རྒྱུར་ཐབས་ཤེས་བཀའ་མོལ་ཞུ་མུས་ཡིན་ཞེས་གསུངས།
ཆབ་སྲིད་དཔྱད་གཏམ་པ་ཧུའུ་ཕིང་ Hu Ping དང་། རྩོམ་པ་པོ་གྲན་ཕོ་ཁུང་ Chen Pokong སོགས་རྒྱ་རིགས་ཁག་གཅིག་གིས་གསུང་བཤད་གནང་སྐབས། བཀའ་བློན་མཆོག་དང་དོན་གཅོད་རྣམ་གཉིས་ལ་འཚམས་འདྲི་གནང་བ་དང་འབྲེལ་ཀུན་དཀའ་བཀྲིས་ལགས་ནི་བོད་རྒྱའི་འབྲེལ་ལམ་གྱི་ཟམ་པ་ལྟ་བུ་ཡིན་ཞེས་གསུངས་ཏེ། དོན་དུ་སྐུ་ཚབ་དོན་གཅོད་ཁང་གི་རྒྱ་རིགས་དང་འབྲེལ་བའི་ལས་དོན་ལ་བསྔགས་བརྗོད་གནང་། དེ་མིན་༧གོང་ས་༧སྐྱབས་མགོན་ཆེན་པོ་མཆོག་གི་མཛད་པ་དང་། བོད་ཀྱི་ནང་ཆོས་ནི་རྒྱ་རིགས་ཀྱི་སེམས་རྒྱུད་དུལ་རྒྱུར་ཧ་ཅང་གི་ཕན་ཐོགས་ཡོད་པ་ཞིག་ཡིན་པ་སོགས་གསུངས།
ཀུན་དགའ་བཀྲིས་ལགས་ཀྱིས་གསུང་བཤད་གནང་སྐབས། འདས་པའི་ལོ་བདུན་ལྷག་རིང་རྒྱ་རིགས་ཚོས་རྒྱབ་སྐྱོར་དང་རོགས་རམ་གནང་བར་གོ་སྐབས་འདི་བརྒྱུད་ཐུགས་རྗེ་ཆེ་ཞུས་པ་དང་། རྒྱ་རིགས་འབྲེལ་མཐུད་པ་གསར་པ་སུ་སླེབ་རུང་དེ་ལ་རྒྱ་རིགས་གྲོགས་པོ་ཚང་མས་ང་ལ་རྒྱབ་སྐྱོར་གནང་བ་ནང་བཞིན་གནང་རོགས་གནང་ཞེས་འབོད་སྐུལ་གནང་། སྐུ་ཚབ་དོན་གཅོད་ཁང་དང་རྒྱ་རིགས་དབར་མུ་མཐུད་འབྲེལ་བ་རྒྱུན་གནས་ཐུབ་པའི་ཆེད་ཀུན་དགའ་བཀྲིས་ལགས་ཀྱིས་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་། དྲུང་ཆེ་ཚེ་རིང་བཀྲ་ཤིས་ལགས་ལ་གནད་འགག་ཆེ་བའི་རྒྱ་རིགས་རྣམས་ངོ་སྤྲོད་ཞུས།
ཤེས་རིག་ལས་ཁུངས་ཀྱི་དྲུང་འཕར་ཤེས་ཡོན་འགན་འཛིན་ཚེ་རིང་བསམ་གྲུབ་ལགས་དང་། སློབ་དགེ་ཟུར་པ་བསྟན་འཛིན་ནུ་པ་ལགས། དེ་བཞིན་ཆུ་བཞི་སྒང་དྲུག་དང་། མདོ་སྨད་ཆོལ་ཁ། དབུས་གཙང་ཆོལ་ཁ། གཞོན་ནུ། བུད་མེད། བོད་རིགས་སྤྱི་མཐུན་ཚོགས་པ་བཅས་གཞུང་འབྲེལ་མ་ཡིན་པའི་ཚོགས་པ་ཆེ་ཁག་དྲུག་གི་ཚོགས་གཙོ་དང་རྒྱུན་ལས་རེ་བཅས་མི་གཉིས་དང་། རྒྱ་སྐད་ཤེས་མཁན་བོད་རིགས་གཞོན་སྐྱེས་བཅས་ཁྱོན་བོད་རིགས་ ༢༠ ལྷག་ཙམ་འདུ་འཛོམས་ལ་མཉམ་ཞུགས་གནང་ཡོད།
ཐེངས་འདིའི་གསོལ་སྟོན་གྱི་འགྲོ་སོང་ཡོངས་རྫོགས་རྒྱ་རིགས་ཚོས་ཐབས་ཤེས་གནང་ཞིང་། ལྷག་བསྡད་ཨ་སྒོར་ ༧༠༠ ཙམ་ཡོད་པའི་དངུལ་འབོར་རྣམས་སྐུ་ཚབ་དོན་གཅོད་ཁང་བརྒྱུད་རྡ་སྟེང་བོད་ཁྱིམ་གྱི་སློབ་གྲྭའི་སློབ་ཕྲུག་གི་དཔེ་མཛོད་ཁང་དུ་ཞལ་འདེབས་གནང་ཡོད་པ་བཅས། །
