ཕྱི་ལོ་ ༢༠༡༨ ཟླ་ ༧ ཚེས་ ༢༧ རེས་གཟའ་པ་སངས།
༄༅། །ཨ་རིའི་སྲིད་འཛིན་གཞོན་པ་མཱ་ཡི་ཀི་པན་སི་ Mike Pence མཆོག་གིས་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་ཆེན་ཉིན་མཐའ་མའི་ཐོག་གསུང་བཤད་གནང་ཡོད། དེ་ཡང་ཨ་རིའི་སྲིད་འཛིན་གཞོན་པ་མཱ་ཡི་ཀི་པན་སི་མཆོག་གིས་བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་བོད་མིའི་རང་དབང་གི་ཆེད་དུ་འཇིགས་ཞུམ་མེད་པར་ཕྱག་ལས་གནང་བར་བརྟེན། ཁོང་གི་ཞུམ་པ་མེད་པའི་སྙིང་སྟོབས་ལ་རྗེས་སུ་ཡི་རངས་དང་བསྔགས་བརྗོད་ཡོད། ཅེས་དང་། འདས་པའི་ལོ་ངོ་ ༧༠ ཙམ་རིང་རྒྱ་ནག་གཞུང་གིས་བོད་མི་ཚོར་གཉའ་གནོན་དང་མནར་གཅོད་བཏང་ཡོད་པ་དང་། རྒྱ་ནག་གཞུང་གིས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་བཙོན་འཇུག་འོག་མནར་གཅོད་བཏང་བའི་རྐྱེན་གྱིས་བོད་ནས་བཙན་བྱོལ་དུ་ཕེབས་དགོས་བྱུང་ཡོད། དེས་བོད་མི་ཚོས་ཆོས་དང་རིག་གཞུང་ཉམས་ལེན་གྱི་ཆེད་དུ་མུ་མཐུད་འཐབ་རྩོད་བྱེད་བཞིན་ཡོད་པ་བསྟན་ཡོད། ཅེས་གསུངས།
སྐུ་ཞབས་མགོ་ལོག་འཇིགས་མེད་ལགས་ཀྱིས་ཨ་རིའི་སྲིད་འཛིན་གཞོན་པ་མཱ་ཡི་ཀི་པན་སི་མཆོག་དང་ཨ་རིའི་ཕྱི་སྲིད་དྲུང་ཆེ་མཱ་ཡི་ཀི་པོམ་པེའོ་ལགས་རྣམ་གཉིས་ལ་ཐུག་འཕྲད་གནང་སྟེ་རང་ཉིད་ཀྱིས་རྒྱ་གཞུང་གི་འགོ་ཁྲིད་ཚོའི་འོག་ནས་དཀའ་སྡུག་ཚད་མེད་མྱངས་པའི་མྱོང་ཚོར་འགྲེལ་བརྗོད་གནང་བ་དང་སྦྲགས། བོད་ཀྱི་གནད་དོན་གསལ་བར་རྒྱ་གཞུང་གི་འགོ་ཁྲིད་ཚོས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་ལྷན་གྲོས་མོལ་གནང་དགོས་པ་དང་། བོད་ནང་གི་བོད་མི་ཚོར་ཆོས་དད་རང་དབང་སྤྲོད་དགོས་པ། དེ་བཞིན་པན་ཆེན་ཆུང་སྲིད་རིན་པོ་ཆེ་མཆོག་མགྱོགས་མྱུར་གློད་བཀྲོལ་གཏོང་དགོས་པའི་སྐོར་སོགས་འབོད་སྐུལ་ཞུས་འདུག
རྒྱལ་ཁབ་ ༨༠ ཙམ་ནས་ཕེབས་པའི་ཆོས་ལུགས་ཁག་གི་སྐུ་ཚབ་མི་སྣ་ ༤༠༠ ལྷག་དང་ཚོགས་པ་ཁག་གི་སྐུ་ཚབ། དེ་བཞིན་དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། དེ་མོ་མཆོག་སྤྲུལ་བསྟན་འཛིན་ཕུན་ཚོགས་རིན་པོ་ཆེ་མཆོག རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་མེ་ཐེའོ་ Matteo Mecacci ལགས་དང་འགན་འཛིན་གཞོན་པ་བུ་ཆུང་ཚེ་རིང་ལགས་སོགས་ཐེངས་འདིའི་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐོག་ཆེད་ཕེབས་གནང་ཡོད།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་རྒྱལ་སྤྱིའི་ཆོས་དད་རང་དབང་གི་ཚོགས་ཆེན་ཐོག་བརྙན་ཐུང་བརྒྱུད་འཛམ་གླིང་གི་ཆོས་ལུགས་ནང་ཁུལ་དབར་མཐུན་སྒྲིལ་དང་ཞི་བདེ། དེ་བཞིན་ཆོས་དད་རང་དབང་གི་གལ་གནད་རང་བཞིན་སྐོར་བཀའ་སློབ་སྩལ་ཡོད།
ཨ་རིའི་རྒྱལ་སྤྱིའི་ཆོས་དད་རང་དབང་གི་སྐུ་ཚབ་སྐུ་ཞབས་བྷི་རོན་བྷད་ཀི་ Brownback ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ནི་འཛམ་གླིང་གི་ཆོས་དད་རང་དབང་གི་མགྲིན་ཚབ་པ་རྩེ་ཕུད་གྲས་ཀྱི་གཅིག་རེད། ཅེས་གསུངས་ཡོད། །
