ཕྱི་ལོ་ ༢༠༡༨ ཟླ་ ༧ ཚེས་ ༢༦ རེས་གཟའ་ཕུར་བུ།
༄༅། །རྒྱ་ནག་གཞུང་ནས་བོད་རང་སྐྱོང་ལྗོངས་ཟེར་བའི་ཁྱབ་ཁོངས་སུ་གཏོགས་པའི་བོད་པའི་སློབ་ཕྲུག་ཚོས་དབྱར་ཁའི་གུང་གསེང་སྐབས་ཆོས་ལུགས་ཀྱི་བྱེད་སྒོ་ཁག་ལ་ཞུགས་མི་ཆོག་པའི་བཀའ་རྒྱ་ཞིག་བཏང་ཡོད་འདུག
དེ་ཡང་ལྷ་ས་གྲོང་ཁྱེར་མཐོ་རིམ་སློབ་འབྲིང་གསུམ་པ་ཞེས་པ་ཞིག་ནས་ཁྱིམ་བདག་ལ་སྤྲིངས་པའི་ཡི་གེ་ཟེར་བའི་བཀའ་རྒྱའི་ནང་ཁྱིམ་བདག་ལྷན་རྒྱས་ཀྱིས་བུ་ཕྲུག་གི་དབྱར་དུས་གུང་གསེང་སྐབས་ཡིད་གཟབ་གནང་དགོས་པའི་དོན་ཚན་དྲུག་བཀོད་ཡོད་འདུག་པ་དང་། དེའི་ནང་གསེས་དོན་ཚན་གཉིས་པར་ཁྱིམ་བདག་ཕ་མ་ཚོས་ངལ་གསོའི་རིང་སློབ་ཕྲུག་རྣམས་ནས་ཆོས་ལུགས་ཀྱི་བྱེད་སྒོ་སྣ་ཚོགས་ལ་ཞུགས་རྒྱུར་བཀག་སྡོམ་བྱེད་དགོས་ཚུལ་བརྗོད་ཡོད་འདུག་པ་མ་ཟད། དོན་ཚན་མཐའ་མར་འགན་ཡིག་དེའི་སྟེང་ཁྱིམ་བདག་ཕ་མ་ཚོས་ས་རྟགས་བཀོད་ཚར་རྗེས་སློབ་གྲྭར་ཉར་ཚུགས་བྱ་རྒྱུ་ཡིན་ཅེས་བརྗོད་ཡོད་འདུག
ཟླ་བ་འདིའི་འགོ་སྟོད་དུའང་རྒྱ་ནག་གཞུང་ནས་ཆོས་ལུགས་བྱེད་སྒོར་དམ་བསྒྲགས་དེ་ལྟ་བུ་ཞིག་བྱས་ནས་ཛྭ་སེར་ཤུལ་དགོན་གྱི་ལོ་ན་ ༡༦ མན་ཆད་ཀྱི་གྲྭ་པ་གྲྭངས་ ༢༠༠ ཙམ་དགོན་པ་ནས་ཕྱིར་འབུད་བཏང་བ་དང་། དེ་བཞིན་དཀར་མཛེས་ཁུལ་སེར་ཤུལ་རྫོང་གི་ཇོ་བོ་དགའ་ལྡན་བཤད་གྲུབ་འཕེལ་རྒྱས་གླིང་དགོན་པའི་གྲྭ་པ་གྲངས་ ༢༠ ཙམ་དགོན་པ་ནས་ཕྱིར་འབུད་བཏང་ཡོད་པ་རེད།
དེ་བཞིན་རྒྱ་ནག་གཞུང་ནས་འདི་ལོ་ཡང་སློབ་ཕྲུག་རྣམས་ལ་བོད་ཟླ་བཞི་པ་ས་ག་ཟླ་བ་སྲུང་བརྩི་ཞུ་རྒྱུར་བཀག་འགོག་བྱས་པ་མ་ཟད། གལ་ཏེ་བྱིས་པ་ཚོས་ལྐོག་ལ་དགོན་པ་དང་ཆོས་ལུགས་བྱེད་སྒོར་ཞུགས་ཚེ་སྒྲིག་འགལ་ཆད་པ་གཅོད་རྒྱུ་ཡིན་ལུགས་ཡང་བཤད་ཡོད་པ་རེད།
དེ་ལྟར་རྒྱ་ནག་གཞུང་ནས་ལོ་རེ་ནས་ལོ་རེར་བོད་མིའི་གཞི་རྩའི་ཐོབ་ཐང་དང་ཆོས་དད་རང་དབང་ལ་དམ་བསྒྲགས་ཇེ་ཆེར་གཏོང་བཞིན་ཡོད་པ་དང་། ཉེ་དུས་ཨ་རིའི་གཞུང་གི་རྒྱལ་སྤྱིའི་ཆོས་དད་རང་དབང་གནས་སྟངས་ཀྱི་ལོ་འཁོར་སྙན་ཐོའི་ནང་དུའང་གནས་ཚུལ་དེའི་སྐོར་གསལ་པོ་འཁོད་ཡོད་པ་མ་ཟད། ཆོས་ལུགས་བྱེད་སྒོར་དམ་བསྒྲགས་ཤུགས་ཆེ་ཤོས་དེ་བཞིན་ཆབ་སྲིད་དང་འབྲེལ་བའི་བོད་མིའི་དུས་སྟོན་དང་། ཆོས་ཕྱོགས་ཀྱི་དུས་ཆེན་གཙོ་ཆེ་ཁག དེ་བཞིན་༧གོང་ས་མཆོག་གི་༧སྐུའི་འཁྲུངས་སྐར་དུས་ཆེན་སོགས་ལ་བྱས་ཡོད་སྐོར་གསལ་འདོན་གནང་ཡོད་པ་རེད། །
