ཕྱི་ལོ་ ༢༠༡༨ ཟླ་ ༧ ཚེས་ ༢༦ རེས་གཟའ་ཕུར་བུ།
༄༅། །ལྷ་ས་གྲོང་ཁྱེར་ཁུལ་དུ་སློབ་མ་རྣམས་དབྱར་ཁའི་གུང་གསེང་སྐབས་ཆོས་ཕྱོགས་ཀྱི་བྱེད་སྒོ་གང་ལ་ཡང་མཉམ་ཞུགས་མི་ཆོག་པའི་བཀའ་རྒྱ་བཏང་ནས་ས་རྟགས་རྒྱབ་བཅུག་འདུག་པ་དང་། དབྱར་ཁའི་གུང་གསེང་སླེབ་ལ་ཉེ་བའི་སྐབས་སུ་ལྷ་ས་གྲོང་ཁྱེར་གྱི་ཁྱབ་ཁོངས་སློབ་གྲྭ་ཁག་གིས་བཙན་དབང་གིས་སློབ་མའི་ཁྱིམ་བདག་ཚོགས་འདུ་ཟེར་བ་བསྐོངས་ནས་ཁྱིམ་བདག་ལ་སྤྲིངས་པའི་ཡི་གེ་ཟེར་བ་ཞིག་གི་སྟེང་མཚན་རྟགས་བཀོད་དུ་བཅུག་ནས་སློབ་མ་རྣམས་དབྱར་ཁའི་གུང་གསེང་སྐབས་ཆོས་ཕྱོགས་ཀྱི་བྱེད་སྒོར་ཞུགས་མི་ཆོག་པའི་བཀའ་རྒྱ་བཏང་འདུག
དེ་ཡང་བརྒྱུད་ལམ་ཁག་གི་ནང་གནས་ཚུལ་སྤེལ་གསལ་ལྟར་ན། བོད་རང་སྐྱོང་ལྗོངས་ཀྱི་ཁྱབ་ཁོངས་ཁུལ་དང་གྲོང་ཁྱེར། རྫོང་དང་ཤང་སོགས་ཀྱི་སློབ་གྲྭ་ཁག་གིས་ཕྱི་ཟླ ༧ པའི་དཀྱིལ་དུ་དབྱར་ཁའི་གུང་གསེང་གཏོང་གི་ཡོད་སྟབས། གུང་གསེང་མ་བཏང་བའི་སྔོན་དུ་སློབ་གྲྭ་ཁག་གིས་ཁྱིམ་བདག་ཚོགས་འདུ་ཟེར་བ་བསྐོངས་ནས་ཁྱིམ་བདག་ལ་སྤྲིངས་པའི་ཡི་གེ་ཟེར་བ་ཞིག་བཀྲམས་ནང་གུས་པར་འོས་པའི་ཁྱིམ་བདག་ལྷན་རྒྱས། ཁྱེད་ཚོའི་བླ་ན་མེད་པའི་རྒྱབ་སྐྱོར་དང་། སློབ་གྲྭའི་དབུ་ཁྲིད་དང་རྒན་ལགས་རྣམ་པའི་ཐུགས་བརྩེའི་བྱམས་སྐྱོང་འོག བུ་ཕྲུག་ཚོའི་ཕྱི་ལོ་ ༢༠༡༧ ལོའི་སློབ་སྦྱོང་དང་འཚོ་བ་གང་ཅིར་གྲུབ་འབྲས་མི་དམན་པ་ཞིག་ཐོབ་ཡོད་ཤག་ལགས། ད་ནི་སློབ་མཇུག་རྒྱུགས་ཚད་བཏང་ཟིན་ཞིང་། ལོ་གཅིག་དུས་གཅིག་གི་དབྱར་དུས་གུང་སེང་སླེབས་སོང་བས། ཁྱིམ་བདག་ལྷན་རྒྱས་ཀྱིས་བུ་ཕྲུག་གི་དབྱར་དུས་གུང་གསེང་གི་འཚོ་བར་སྣེ་ཁྲིད་དང་ཡིད་གཟབ་གནང་དགོས་པའི་རེ་བ་གཤམ་གསལ།
གཅིག ངལ་གསོའི་རིང་བུ་ཕྲུག་གི་སློབ་སྦྱོང་དང་། འཕྲོད་བསྟེན། སེམས་ཁམས་བདེ་ཐང་ཐད་དཔེ་སྟོན་ཡག་པོ་གནང་དགོས།
གཉིས། ངལ་གསོའི་རིང་སློབ་ཕྲུག་ཆོས་ལུགས་བྱེད་སྒོ་སྣ་ཚོགས་ལ་ཞུགས་རྒྱུར་བཀག་སྡོམ་བྱ་དགོས། མ་ཟད་བུ་ཕྲུག་གི་བདེ་ཐང་སློབ་གསོ་ལ་ཤུགས་སྣོན་བརྒྱབས་ནས་མིག་འབྲས་སྙི་མོའི་གཉན་ཚད་༼མིག་ནད།༽དང་འགྲམ་རྗེན་མཉན་ཚད་སོགས་ནད་རིགས་མི་ཡོང་བའི་སྔོན་འགོག་བྱ་དགོས། གལ་སྲིད་རིགས་འདྲའི་ནད་རིགས་ཐོན་ཚེ་བོད་ལྗོངས་སྨན་རྩིས་ཁང་དུ་བསྐྱོད་ནས་སྨན་བཅོས་བྱ་དགོས།
གསུམ། སློབ་ཕྲུག་གིས་ཁ་པར་སོགས་གློག་རྡུལ་ཡོ་བྱད་སྣ་ཚོགས་སྤྱད་ནས་དཀྲོག་གཏམ་ཤོད་པ་ལྟ་བུའི་ཁྲིམས་འགལ་བྱ་སྤྱོད་ལ་དོ་དམ་ནན་པོ་བྱ་དགོས།
བཞི། ལྟ་རྟོག་ཁྱིམ་མིས་བུ་ཕྲུག་དྲ་ཁང་དང་ནང་མ་སྤྲོ་སྐྱིད་ཁང་སོགས་བུ་ཕྲུག་གི་འཚར་ལོངས་ལ་གནོད་པ་ཡོད་པའི་ཁོར་ཡུག་ཏུ་སྤྲང་འཁྱམས་བྱེད་པའི་བྱ་སྤྱོད་ལ་བཀག་སྡོམ་མཐའ་གཅིག་ཏུ་བྱ་དགོས། དེ་བཞིན་གུང་སེང་ཆུ་རྐྱལ་སོགས་རྩ་བ་ནས་བྱེད་མི་ཆོག
ལྔ། སློབ་གྲྭས་དབྱར་དུས་གུང་སེང་གི་དུས་ཚོད་སྤྲད་དེ་སློབ་མའི་ཉལ་ཁང་གི་ཅ་དངོས་བཟོ་བཅོས་བྱ་རྒྱུ་ཡིན་པས། ཅ་ལག་ཛ་ཛོར་དང་། ཉལ་ཆས། སློབ་སྦྱོང་གི་ཡོ་ཆས་སོགས་ཁྱིམ་ལ་བསྣམས་ཕེབས་རོགས།
དྲུག འགན་ཡིག་དེར་ཁྱིམ་བདག་གིས་ས་ཡིག་བཀོད་ཚར་རྗེས་སློབ་གྲྭར་ཉར་ཚགས་བྱ་རྒྱུ་ཡིན་པས། ལྟ་སྐྱོང་བས་ནན་ཏན་དང་ལྟ་ཀློག་དགོས་པ་མ་ཟད། གལ་སྲིད་གོང་གསལ་ལྟ་བུའི་གནས་ཚུལ་ཐོན་ཚེ་སློབ་གྲྭར་འགན་འཁྲི་རྩ་བ་ནས་མེད་པས་ཡིད་འཇགས་ཡོད་པར་འཚལ་ཞེས་འཁོད་འདུག །
