ཕྱི་ལོ་ ༢༠༡༨ ཟླ་ ༦ ཚེས་ ༢༩ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་དབུ་ཁྲིད་པའི་སྐབས་བཅོ་ལྔ་པའི་བཀའ་ཤག་གིས་ལས་ཁུར་ཞུས་ཏེ་ལོ་གཉིས་ཧྲིལ་པོ་འཁོར་བར་བརྟེན། ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག་ལ་ཤེས་རིག་ལས་ཁུངས་ནས་འདས་པའི་ལོ་ངོ་གཉིས་རིང་ལས་དོན་གང་ཅིར་དམིགས་ཡུལ་དང་གྲུབ་འབྲས། མ་འོངས་འཆར་སྣང་དང་གདོང་ལེན་གནང་དགོས་པའི་གནད་དོན་སོགས་ཀྱི་སྐོར་ཕྱི་དྲིལ་བོད་ཀྱི་སྒྲ་བརྙན་ཚན་པའི་འགན་འཛིན་ལས་རོགས་བསྟན་འཛིན་དབང་ཕྱུག་ལགས་ཀྱིས་བཅར་འདྲི་ཞུས་པ་ཁག་གཤམ་གསལ།

གསར་འགོད་པས།   ཐོག་མར་ཤེས་རིག་བཀའ་བློན་མཆོག་ལ་འཚམས་འདྲི་ཞུ་བ་དང་འབྲེལ་འདས་པའི་ལོ་གཉིས་ནང་ཤེས་རིག་ལས་ཁུངས་ནས་ལས་དོན་ག་རེ་བསྒྲུབས་ཡོད་དམ། 

ཤེས་རིག་བཀའ་བློན་མཆོག་གིས།   དང་པོ། ཕྱི་ལོ་ ༢༠༡༦ ནས་བཟུང་བོད་ཁྱིམ་སློབ་གྲྭའི་ཁྱབ་ཁོངས་ཚང་མའི་ནང་འཛིན་རིམ་དང་པོ་ནས་ཤེས་ཡོན་སྲིད་བྱུས་ལག་བསྟར་འགོ་འཛུགས་གནང་ཐུབ་པ་བྱུང་ཡོད། 

གཉིས་པ། ཤེས་རིག་ལས་ཁུངས་ནས་སློབ་གྲྭ་ཁག་ཏུ་ཤེས་ཡོན་སྲིད་བྱུས་ཐོག་ཟབ་སྦྱོང་གནང་ཐུབ་མཁན་རྒྱུས་སྟོན་པ་རྣམས་ལ་ཟབ་སྦྱོང་སྤྲད་པ་དང་། ཁོང་ཚོ་སློབ་གྲྭ་ཁག་གི་ནང་སྐྱོད་དེ་འབྲེལ་ཡོད་རྣམ་པར་རྒྱུས་སྟོན་གནང་བ་སོགས་བྱུང་ཡོད། 

གསུམ་པ། བཀའ་བློན་ཁྲི་ཟུར་སློབ་དཔོན་སྐྱབས་རྗེ་ཟམ་གདོང་རིན་པོ་ཆེ་མཆོག་གིས་སློབ་གྲྭ་ཁག་ལ་ཟབ་སྦྱོང་སྐབས་ཤེས་ཡོན་སྲིད་བྱུས་དང་འབྲེལ་བའི་གསུང་བཤད་གནང་བ་ཁག་ཡིག་ཐོག་ལ་ཕབ་ནས་དེབ་བཟོ་རྒྱུའི་ལས་འཆར་གལ་ཆེན་པོ་ཞིག་གནང་ཡོད། 

བཞི་པ། ཤེས་ཡོན་ལྷན་ཚོགས་ཀྱི་ཚོགས་འདུའི་སྐབས་གྲོས་ཆོད་བཞག་པ་དང་། ལྔ་པ། ཤེས་ཡོན་སྲིད་བྱུས་དང་མཐུན་པའི་ཀློག་དེབ་རྩོམ་སྒྲིག་གནང་ཐུབ་ཡོད། དཔེར་ན། འཛིན་རིམ་ ༦ ནས་ ༡༢ བར་གྱི་རིགས་ལམ་དང་ནང་ཆོས་ཀློག་དེབ། འཛིན་རིམ་ ༦ དང་ ༧ ཨང་རྩིས་ཀློག་དེབ། འཛིན་ ༩ དང་ ༡༢ བར་གྱི་བོད་ཡིག་ཀློག་དེབ་སོགས་རྩོམ་སྒྲིག་གནང་ཐུབ་པ་བྱུང་ཡོད།

དྲུག་པ། ཤེས་ཡོན་སྲིད་བྱུས་དང་མཐུན་པའི་གཞི་རིམ་གོང་མའི་བསླབ་གཞི་རྩ་འཛིན་གཏན་འབེབས་གནང་བ་དང་། གཞི་རིམ་བར་མའི་ཚན་རིག་དང་རིགས་ལམ་བརྒྱུད་སློབ་ཁྲིད་གནང་ཕྱོགས་ཀྱི་ཀློག་དེབ་པར་སྐྲུན་གནང་།

བདུན་པ། དགེ་རྒན་དང་སློབ་ཕྲུག་ཚོར་གཞོགས་འདེགས་ཀྱི་རྒྱུ་ཆའི་ཚུལ་དུ་གཞི་རིམ་བར་མའི་སྤྱི་ཚོགས་ཚན་རིག་དང་ཚན་རིག་གི་དེབ་བདུན་འདོན་སྤེལ་ཞུས་ཡོད།  

བརྒྱད་པ། སྔོན་འགྲོ་བོད་ཡིག་གི་ཤོག་བྱང་ཁྲིད་ཆས་   Flash Card འགྲེམས་སྤེལ་ཞུས་ཡོད།

དགུ་པ། བོད་ཡིག་སློབ་སྦྱོང་གི་ཆེད་དུ་བོད་ཡིག་དྲ་རྒྱ་ http:bodyiglobjong.com ཞེས་པ་ཞིག་བཟོས་ཐུབ་ཡོད་པ་མ་ཟད།  དྲ་རྒྱའི་ནང་ཕྱི་ལོ་ ༡༩༦༠ སྐབས་ནས་ཡོད་པའི་བོད་ཡིག་སློབ་དེབ་དང་བྱིས་སྒྲུང་སོགས་བཅུག་ཡོད།

བཅུ་པ། གཞི་རིམ་འོག་མའི་ཨང་རྩིས་དང་ཚན་རིག་ཀློག་དེབ་ཆ་ཚང་བརྙན་འཕྲིན་བརྒྱུད་སློབ་ཁྲིད་གནང་རྒྱུའི་ལས་འཆར་སྤེལ་ཡོད།

བཅུ་གཅིག    བྱིས་པ་རྣམས་བོད་ཀྱི་སྐད་ཡིག་སྦྱོང་བར་སྤྲོ་སྣང་སླེབ་པའི་ཆེད་འགུལ་རིས་ Animation  ཁག་ཁ་ཤས་བཟོས་དང་བཟོ་མུས་ཡིན། བཅུ་གཉིས། གཞི་རིམ་འོག་མའི་ཤེས་ཡོན་གནས་ཚད་དང་ཀློག་རྩལ་གོང་འཕེལ་ལ་དམིགས་ཏེ་སོན་རྩ་བྱིས་པའི་དེབ་ཕྲེང་བཞི་བཅུ་ཐམ་པ་རྩོམ་སྒྲིག་གིས་པར་སྐྲུན་གནང་སྟེ་གཟའ་མཇུག་སློབ་གྲྭ་དང་སློབ་གྲྭ་ཁག་ཏུ་འགྲེམས་སྤེལ་ཞུས་ཡོད།

བཅུ་གསུམ། བྱིས་སྒྲུང་བོད་སྒྱུར་གྱི་ལས་འཆར་འགྲོ་དང་འགྲོ་མུས་ཡིན།

བཅུ་བཞི།  རྒྱ་གར་ནང་འཛིན་རིམ་ ༡ ནས་ ༣ བར་གྱི་འཛིན་ཁང་ ༡༨༥  ནང་དཔེ་མཛོད་ཀྱི་  Reading Corner   མཐུན་རྐྱེན་བསྐྲུན་ཡོད། དེ་བཞིན་བལ་ཡུལ་དུ་འཛིན་ཁང་ ༣༦ ནང་དཔེ་མཛོད་ཀྱི་མཐུན་རྐྱེན་བསྐྲུན་ཐུབ་ཡོད།

བཅོ་ལྔ། གཞི་རིམ་གོང་མའི་དགེ་རྒན་གྲངས་  ༡༨༠  དང་། ཕྲུ་གུའི་ཕ་མ་གྲངས་ ༩༠༠ ལྷག་ལ་བྱིས་པའི་ཀློག་རྩལ་དང་འབྲེལ་བའི་ཟབ་སྦྱོང་ཕུལ་ཡོད།

བཅུ་དྲུག   ཤེས་རིག་ལས་ཁུངས་དང་བྱང་ཨ་རིའི་ནང་ཡོད་པའི་ཨེ་མོ་རི་མཐོ་སློབ་   Emory University གཉིས་ཟུང་འབྲེལ་ཐོག་ཆོས་ལུགས་དང་མ་འབྲེལ་བའི་བཟང་སྤྱོད་ཀྱི་བསླབ་གཞི་རྩ་འཛིན་བཟོ་རྒྱུའི་ལས་འཆར་ཡོད།  

བཅུ་བདུན།      ཤེས་རིག་ལས་ཁུངས་ཀྱི་རྒྱུས་སྟོན་པ་དགེ་བཤེས་རྒྱལ་མཚན་ལགས་ཀྱིས་སློབ་གྲྭ་དང་མཐོ་སློབ་ཁག་ཏུ་ཆོས་ལུགས་དང་མ་འབྲེལ་བའི་བཟང་སྤྱོད་སྐོར་གསུང་བཤད་གནང་རྒྱུའི་ལས་འཆར་ཞིག་འགྲོ་དང་འགྲོ་མུས་ཡིན།    

བཅོ་བརྒྱད།  སྤྱི་ནོར་༧གོང་ས་༧སྐྱབས་མགོན་མཆོག་དང་བཀའ་བློན་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག  དགེ་བཤེས་ཐུབ་བསྟན་སྦྱིན་པ་ལགས། དགེ་བཤེས་བློ་བཟང་བསྟན་འཛིན་ལགས་སོགས་ཀྱིས་ཆོས་ལུགས་དང་མ་འབྲེལ་བའི་བཟང་སྤྱོད་ཐོག་བཀའ་སློབ་གནང་བ་རྣམས་ཀྱི་ཆེད་དྲ་རྒྱ་ཞིག་གསར་བཟོ་བྱ་རྒྱུའི་འཆར་གཞི་ཡོད།

བཅུ་དགུ ཤེས་རིག་བརྡ་ཆད་གཏན་འབེབས་ལས་འཆར་ཚན་པ་ནས་ཨིན་བོད་ཤན་སྦྱར་གཏན་འབེབས་བརྡ་ཆད་དེབ་ཕྲེང་བཅུ་གཅིག་པ་པར་སྐྲུན་གནང་བ་མ་ཟད།  ཨིན་བོད་ཤན་སྦྱར་གཏན་འབེབས་བརྡ་ཆད་ཀྱི་དྲ་རྒྱ་ https:tibterminology.net ཞེས་པ་གསར་བཟོ་གནང་ཐུབ་ཡོད།   

ཉི་ཤུ།   སློབ་ཡོན་ཚན་པ་ནས་ཕྱི་ལོ་ ༢༠༡༧།༢༠༡༨ ནང་རྒྱ་གར་དང་བལ་ཡུལ་ནས་འཛིན་རིམ་ ༡༠ ཐོན་ཟིན་པའི་སློབ་ཕྲུག་གསར་པ་དང་། ལོ་རིམ་ ༢ དང་ ༣ སློབ་ཕྲུག་སོགས་ཁྱོན་སློབ་ཕྲུག་གྲངས་ ༡༠༨༧ ལ་སློབ་ཡོན་གནང་དང་གནང་མུས་རེད། 

ཉི་ཤུ་རྩ་གཅིག  མདུན་ལམ་སློབ་སྟོན་ཚན་པ་ནས་འཛིན་རིམ་ ༡༢ ཐོན་མཁན་སློབ་མ་རྣམས་ལ་མཐོ་སློབ་ཁག་ཏུ་སློབ་འཇུག་བྱ་རྒྱུའི་སྐོར་ལམ་སྟོན་དང་མཐོ་སློབ་ཀྱི་སློབ་མ་རྣམས་ལ་འགོ་ཁྲིད་ཀྱི་ཟབ་སྦྱོང་སོགས་གནང་ཡོད།

ཉི་ཤུ་རྩ་གཉིས།  སློབ་ཕྲུག་ཚོར་རི་མོ་བརྒྱུད་སློབ་ཁྲིད་གནང་རྒྱུའི་ཆེད་རི་མོ་དགེ་རྒན་རྣམས་ལ་རི་མོའི་ཟབ་སྦྱོང་གནང་ཡོད།

ཉི་ཤུ་རྩ་གསུམ།  ཤེས་ཡོན་དེང་སྲོལ་ཚན་པས་དེང་དུས་དང་མཐུན་པའི་སྒོ་ནས་ཚན་རིག་དང་ཨང་རྩིས་དགེ་རྒན་སོགས་ཀྱི་ཆེད་ལས་ཡར་རྒྱས་གཏོང་རྒྱུའི་ལས་འཆར་འགྲོ་དང་འགྲོ་མུས་ཡིན།  

ཉི་ཤུ་རྩ་བཞི།  ཉེ་ཆར་སློབ་གྲྭའི་འགན་འཛིན་རྣམ་པ་ཚོ་ལའང་བྱིས་པའི་ཀློག་རྩལ་ཐོག་ཟབ་སྦྱོང་ཕུལ་ཡོད། 

གསར་འགོད་པས།   ཤེས་རིག་བཀའ་བློན་མཆོག་ཉེ་ཆར་ཐེངས་དང་པོ་ཀ་རྡོར་སྒང་གསུམ་དང་ར་ཝང་ལ་། བསུ་ན་མདའ་བཅས་ལ་གཞུང་འབྲེལ་འཚམས་གཟིགས་ཕེབས་སྐབས་གཟིགས་ཚུལ་ག་རེ་བྱུང་ཡོད་དམ། 

ཤེས་རིག་བཀའ་བློན་མཆོག་གིས། ཉེ་ཆར་ཕྱི་ཟླ་ ༥ ནང་ང་དང་ཤེས་རིག་དྲུང་ཆེ་གཉིས་ཀ་རྡོར་སྒང་གསུམ་དང་ར་ཝང་ལ་། བསུ་ན་མདའ་བཅས་ས་གནས་ཁག་ལྔའི་ནང་ཕྱིན་པ་ཡིན།    སྤྱིར་སློབ་གྲྭ་ཁག་གི་མཐུན་རྐྱེན་སོགས་གང་འཚམ་འགྲིག་ཡོད་ཀྱང་སློབ་གྲྭ་ཚང་མའི་ནང་སློབ་ཕྲུག་ཉུང་ཉུང་ཡིན་པ་མ་ཟད། སློབ་ཕྲུག་མང་པོ་ཞིག་ཧི་མ་ལ་ཡའི་རི་རྒྱུད་ཀྱི་མི་རིགས་རེད་འདུག  སྐབས་དེར་ཕྲུ་གུའི་ཕ་མ་དང་དགེ་རྒན་ཚོར་ཐུགས་འཕྲད་ཀྱིས་དགེ་རྒན་རྣམ་པས་སློབ་ཕྲུག་ཚོར་སློབ་ཁྲིད་སྤུས་དག་པོ་གནང་རྒྱུ་དང་།

དེང་སང་སློབ་ཕྲུག་ཚོ་སེམས་ཡང་སླ་བོ་ཡོད་པས་སློབ་ཁྲིད་གནང་སྟངས་ལའང་འགྱུར་བ་གཏོང་དགོས་པ་དང་། དགེ་རྒན་རྣམ་པས་དང་དུ་བླངས་ཏེ་ཉམས་ཞིབ་ཀྱི་དེབ་དེ་འདྲ་ཀློག་ནས་སློབ་ཕྲུག་ཚོའི་སེམས་ཁམས་དང་མཐུན་པའི་སྒོ་ནས་སློབ་ཁྲིད་གནང་དགོས་པ་དང་། དགེ་རྒན་རྣམ་པས་ཡ་རབས་བཟང་སྤྱོད་དང་ལྡན་པའི་ངང་སློབ་ཁྲིད་གནང་དགོས་པ་སོགས་གནད་དོན་ཁ་ཤས་ཤིག་གི་སྐོར་ཞུ་རྒྱུ་བྱུང་། རྒྱ་གར་གྱི་དགེ་རྒན་ཚོ་ལའང་ད་བར་ཞབས་ཞུ་ཞུས་པར་ཐུགས་རྗེ་ཞུའི་གོ་སྐབས་བྱུང་། 

གསར་འགོད་པས། སྐུ་ཉིད་ཀྱི་ཤེས་ཡོན་རྒྱབ་ལྗོངས་ནི་ཤེས་ཡོན་དང་འབྲེལ་བ་ཡོད་པ་མ་ཟད། དགེ་རྒན་ཡང་གནང་མྱོང་ཡོད་སྟབས་ང་ཚོའི་སྤྱི་ཚོགས་ནང་ད་ལྟའི་ཆར་ཤེས་ཡོན་དང་འབྲེལ་བའི་ཡར་རྒྱས་གཏོང་དགོས་པ་དེ་འདྲ་གཟིགས་ཀྱི་འདུག་གམ།

ཤེས་རིག་བཀའ་བློན་མཆོག་གིས། སྤྱིར་ང་ཚོ་བོད་པའི་སློབ་གྲྭ་ཁག་གི་དགེ་རྒན་རྣམས་ཡག་པོ་ཡོད་ནའང་དགེ་རྒན་ཆེད་ལས་ཡར་རྒྱས་སྔར་ལྷག་གོང་སྤེལ་གཏོང་སླད་འབད་བརྩོན་ཞུ་རྒྱུ་ཡིན། ཕྲན་རང་དེ་སྔ་དགེ་རྒན་བྱས་མྱོང་ཡོད་སྟབས་དགེ་རྒན་ཡར་རྒྱས་འགྲོ་རྒྱུ་གཙོ་བོ་ནི། དགེ་རྒན་ནང་ཁུལ་མཐུན་ལམ་དང་བཀའ་བསྡུར་གནང་བའི་ཐོག་ནས་ཡར་རྒྱས་གཏོང་རྒྱུའི་ལམ་ཀ་ཆེན་པོ་ཞིག་ཡོད་པ་ངས་འབུམ་རམས་པའི་ཉམས་ཞིབ་སྐབས་ཚོར་བ་ཆེན་པོ་བྱུང་། སྔོན་མ་ཕྲན་རང་དགེ་རྒན་བྱས་པའི་སྐབས་དང་ད་ལྟའི་དགེ་རྒན་དབར་ཁྱད་པར་ཆེན་པོ་ཕྱིན་ཡོད། ང་ཚོའི་གནས་སྟངས་ཚང་མ་དུས་ཚོད་ལ་དཔགས་པའི་འགྱུར་བ་ཕྱིན་ཡོད། ང་ཚོའི་སྐབས་ལ་སློབ་ཚན་འཁྲིད་རྒྱུ་མང་པོ་དང་། འཛིན་གྲྭ་ཚོགས་ཐེངས་ཧ་ཅང་མང་པོ་ཡོད་སྟབས་དགེ་རྒན་ནང་ཁུལ་ཕར་ཚུར་གྲོས་བསྡུར་བྱས་ནས་ཡར་རྒྱས་གཏོང་རྒྱུའི་དུས་ཚོད་ཧ་ཅང་ཉུང་ཉུང་རེད། གལ་ཏེ་དུས་ཚོད་ཡོད་པ་ཡིན་ནའང་དཔེ་དེབ་བཅོས་རྒྱུ་དང་སློབ་ཚན་གྲ་སྒྲིག་བྱེད་རྒྱུ་སོགས་ལ་དུས་ཚོད་བཏང་ནས་དགེ་རྒན་ནང་ཁུལ་ཤེས་བྱ་ཡོན་ཏན་དང་བསམ་ཚུལ་བརྗེ་ལེན་བྱེད་རྒྱུའི་གོ་སྐབས་ཧ་ཅང་ཉུང་ངུ་རེད། 

ཕྱི་ལོ་ ༢༠༠༧།༢༠༠༨ ལོར་ངས་ཉམས་ཞིབ་བྱེད་པའི་སྐབས་སུ་དགེ་རྒན་ནང་ཁུལ་བསམ་ཚུལ་བསྡུ་ལེན་དང་བགྲོ་གླེང་མང་པོ་བྱས་ཡོད་པར་བརྟེན། དགེ་རྒན་ནང་ཁུལ་བསམ་ཚུལ་བརྗེ་ལེན་དང་། བསམ་ཚུལ་ཡག་པོ་བྱུང་སླད་དགེ་རྒན་སོ་སོའི་ངོས་ནས་དེའི་ཐད་དཔྱད་རྩོམ་སོགས་དཔེ་དེབ་རིགས་ཀློག་དགོས་རྒྱུ་གལ་ཆེན་པོ་རེད། སློབ་ཁྲིད་ཐབས་ལམ་རིགས་ཡག་པོ་ཤེས་ནས་སྔོན་ལ་སོ་སོས་ལག་བསྟར་གནང་སྟེ་ཡག་པོ་འདུག་ན་དགེ་རྒན་གཞན་ལ་དེའི་སྐོར་གྲོས་བསྡུར་བྱས་ནས་སོ་སོ་ཡར་རྒྱས་ཕྱིན་པ་དང་མཉམ་དུ་ལས་རོགས་ཀྱང་ཡར་རྒྱས་གཏོང་རྒྱུའི་རིགས་ང་ཚོའི་སློབ་གྲྭ་ཁག་གི་དགེ་རྒན་རྣམ་པས་གནང་ཐུབ་་ན་ཡག་པོ་འདུག་ཅེས་ཞུ་འདོད་བྱུང་། 

དེང་སྐབས་ང་ཚོའི་སློབ་གྲྭ་ཁག་གི་ནང་སློབ་ཕྲུག་ཉུང་དུ་ཕྱིན་སྟབས་དགེ་རྒན་རྣམ་པས་དེའི་ཐོག་དེ་སྔ་ལས་ཕྲན་བུ་དུས་ཚོད་མང་བ་གཏོང་རྒྱུ་ཡོད་ངེས་རེད་བསམ་གྱི་འདུག དེ་བཞིན་དགེ་རྒན་རྣམ་པ་ཡར་རྒྱས་གཏོང་སླད་སློབ་གྲྭ་ཁག་གི་འགན་འཛིན་རྣམ་པས་འགན་གཙོ་བོ་བཞེས་པའི་ཐོག་ནས་ཐུགས་ལ་བཅང་དགོས་རྒྱུ་ཧ་ཅང་གལ་ཆེན་པོ་རེད་འདུག དགེ་རྒན་སྤུས་དག་པོ་ཡོང་བར་གང་ཡར་རྒྱས་གཏོང་དགོས་འདུག དགེ་རྒན་སྤུས་དག་པོ་ཇི་ལྟར་བཟོ་དགོས་འདུག་དེ་དག་ཚང་མ་སློབ་གྲྭའི་དགེ་འཛིན་རྣམ་པས་མཁྱེན་དགོས་རྒྱུ་ཧ་ཅང་གལ་ཆེན་པོ་རེད་འདུག 

ཉེ་ཆར་བྱིས་པའི་ཀློག་རྩལ་དང་འབྲེལ་བའི་སློབ་གྲྭའི་འགན་འཛིན་རྣམས་ལ་ཟབ་སྦྱོང་ཞིག་གོ་སྒྲིག་ཞུས་པའི་ཉིན་དང་པོར་ང་རང་བཅར་རྒྱུའི་གོ་སྐབས་བྱུང་། སྐབས་དེེར་ངས་སློབ་གྲྭ་ཁག་གི་འགན་འཛིན་རྣམ་པས་ Instructional Leadership གནང་དགོས་རྒྱུ་ཧ་ཅང་གལ་ཆེན་པོ་རེད་འདུག འདི་ཇི་ལྟར་གནང་ཐུབ་ཀྱི་རེད་དམ་ཞེ་ན། འགན་འཛིན་རྣམ་པ་འཛིན་ཁང་ནང་ཕྱིན་ནས་དགེ་རྒན་དང་ལྷན་བཀའ་མོལ་གནང་སྟེ་གནང་ཐུབ་ཀྱི་རེད་མ་གཏོགས་ལས་ཁུངས་ནང་བཞུགས་ནས་གནང་ཐུབ་ཀྱི་མ་རེད། དེའི་ཐོག་ད་བར་དགོངས་པ་བཞེས་ཀྱི་ཡོད་ཀྱང་ད་དུང་མུ་མཐུད་རྒྱ་ཆེ་ཙམ་གནང་དགོས་རྒྱུ་ཧ་ཅང་གལ་ཆེན་པོ་འདུག ཅེས་འབོད་སྐུལ་ཤུགས་ཆེ་ཞུས་པ་ཡིན།

གསར་འགོད་པས། འབྱུང་འགྱུར་ལོ་གསུམ་ནང་ཤེས་རིག་ལས་ཁུངས་ཀྱི་ལས་གཞི་གལ་ཆེ་བ་གང་ཡོད་དམ།

ཤེས་རིག་བཀའ་བློན་མཆོག་གིས།  སློབ་གྲྭ་ཁག་གི་ནང་དེང་དུས་ཤེས་ཡོན་དང་མཐུན་པའི་ཀམ་པུ་ཌར་དང་འཕྲུལ་ཆས་ཀྱི་མཐུན་རྐྱེན་སྦྱོར་སྤྲོད་བྱེད་རྒྱུ་དེ་ཡིན། བརྡ་འཕྲིན་འཕྲུལ་ཆས་བརྒྱུད་ནས་སློབ་གྲྭ་ཁག་བཞིའི་ནང་ཚོད་ལྟའི་ལས་གཞི་ཞིག་འགྲོ་བཞིན་ཡོད་པ་འདི་ཉིད་ཚགས་ཚུད་ཡོང་ཐབས་སུ་དགེ་རྒན་རྣམ་པས་མཁྱེན་དགོས་རྒྱུ་གལ་ཆེན་པོ་ཡིན། 

སྔོན་འགྲོ་སློབ་གྲྭ་ཁག་ནང་དགེ་རྒན་གྱི་ཆེེད་ལས་ཡར་རྒྱས་གཏོང་སླད་མུ་མཐུད་ཟབ་སྦྱོང་གོ་སྒྲིག་ཞུས་དང་ཞུ་མུས་ཡིན། ལྷག་པར་ཨ་རི་གནས་སྡོད་བོད་རིགས་ལྷ་མོ་སྤེན་པ་ལགས་ཀྱིས་ཕྱི་ཟླ་ ༨ ནང་རྒྱལ་སྤྱིའི་སྔོན་འགྲོ་སློབ་གྲྭའི་ཚོགས་པ་བརྒྱུད་སྔོན་འགྲོ་སློབ་གྲྭའི་ཨང་རྩིས་རྒན་ལགས་རྣམས་ལ་ཟབ་སྦྱོང་ཞིག་གནང་གཏན་འཁེལ་ཡོད། དེ་བཞིན་ཕྱི་ཟླ་ ༧ ནང་ས་རཱ་བོད་ཀྱི་མཐོ་སློབ་ཏུ་དགེ་རྒན་འོས་སྦྱོང་ཞིག་དབུ་འཛུགས་གནང་འཆར་ཡོད། གཞན་ཡང་བྱིས་སྒྲུང་དང་བྱིས་པའི་འགུལ་བརྙན་ལ་སོགས་གང་མང་སྟོན་འཆར་ཡོད། འཛིན་རིམ་དང་པོ་ནས་ལྔ་པ་བར་བོད་ཡིག་དང་ཨང་རྩིས་སྦྱོང་དེབ་བཟོ་རྒྱུའི་ལས་གཞི་ཡོད། གཞི་རིམ་བར་མའི་ཚན་རིག་ཀློག་དེབ་བོད་ཡིག་ཐོག་པར་སྐྲུན་ཞུ་རྒྱུ་ཡིན།

སྤྱིར་ཤེས་རིག་ལས་ཁུངས་སུ་ལས་འཆར་མང་པོ་ཞིག་ཡོད་ནའང་ལས་འཆར་ཁག་ཚང་མར་ཞུ་ཐུབ་ཐབས་དཀའ། ཤེས་རིག་ལས་འཆར་དང་ལས་གཞི་ཁག་ཚང་མ་ཤེས་རིག་ལས་ཁུངས་ཀྱི་དྲ་རྒྱ་ནང་ཡོད། དེའི་བརྒྱུད་ནས་གཟིགས་རོགས་གནང་། ལྷག་པར་སློབ་ཡོན་དང་འབྲེལ་བའི་གསལ་བསྒྲགས་མང་པོ་ཞིག་སྟོན་གནང་ཡོད།

མཐར་ང་ཚོའི་སློབ་ཕྲུག་རྣམས་ལ་ཤེས་ཡོན་སྤུས་དག་ཅིག་ཡོང་ཐུབ་རྒྱུ་སློབ་གྲྭ་དང་སློབ་གྲྭའི་དགེ་རྒན་ཙམ་མིན་པར་ང་ཚོ་ཚང་མར་འགན་ཆེན་པོ་ཞིག་ཆགས་ཀྱི་ཡོད། དེང་སང་སློབ་ཕྲུག་རྣམས་ཀྱི་ཕ་མ་ཕལ་མོ་ཆེར་སློབ་སྦྱོང་ཡོད་མཁན་ཡིན་དུས་ཕ་མ་ངོས་ནས་སློབ་ཕྲུག་ལ་ཤེས་ཡོན་དགོས་རྒྱུ་གལ་ཆེན་པོ་ཡིན་སྐོར་བསླབ་བྱ་དང་ལམ་སྟོན་གནང་རྒྱུ་ཐད་འགན་ཆེན་པོ་ཡོད། ལྷག་པར་བོད་ཀྱི་སྐད་ཡིག་དང་རིག་གཞུང་ལ་སོགས་པ་ཧ་ཅང་གལ་ཆེན་པོ་ཡིན་པ་མཁྱེན་གསལ་ལྟར་དེའི་ཐོག་ཤུགས་སྣོན་རྒྱག་དགོས། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་ན་གཞོན་སློབ་ཕྲུག་རྣམས་བོད་སྐད་གཙང་མ་སྐྱོན་རྒྱུར་འབད་བརྩོན་དང་ཕ་མ་ངོས་ནས་ཀྱང་དེའི་ཐོག་འབད་བརྩོན་དམིགས་བསལ་བྱེད་དགོས་རྒྱུ་ཧ་ཅང་གལ་ཆེན་པོ་ཡིན།  །