༢༠༡༨ ཟླ་ ༦ ཚེས་ ༢༢ རེས་གཟའ་པ་སངས།
༄༅། །ཕྱི་ལོ་ ༢༠༡༨ ཟླ་ ༦ ཚེས་ ༢༢ ནས་ཚེས་ ༢༦ བར་ཉིན་གྲངས་ ༥ རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་གོ་སྒྲིག་འོག་རྒྱ་བལ་འབྲུག་གསུམ་གྱི་བཙན་བྱོལ་བོད་མིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་གཉིས་པ་དང་། སོ་ནམ་ཚོགས་ཆེན་ཐེངས་བཅུ་པའི་དབུ་འབྱེད་མཛད་སྒོ་ཕྱི་ཚེས་ ༢༢ རེས་གཟའ་པ་སངས་ཉིན་གྱི་སྔ་དྲོ་ཆུ་ཚོད་ ༡༡ ཐོག་རྡ་ས་གངས་སྐྱིད་གཉའ་ཁྲི་ཚོགས་ཁང་དུ་ཚོགས་གནང་སོང་།
དེ་ཡང་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་དང་། བཀའ་བློན་རྣམ་པ། བཀའ་དྲུང་གིས་གཙོས་ལས་ཁུངས་ཁག་གི་དྲུང་ཆེ་རྣམ་པ། གཞན་ཡང་རྒྱ་བལ་འབྲུག་གསུམ་ནས་ཕེབས་པའི་ས་གནས་འགོ་འཛིན་རྣམ་པ། ནང་སྲིད་ལས་ཁུངས་ཀྱི་ལས་བྱེད། དེ་བཞིན་ཕྱི་ནང་གི་གསར་འགོད་པ་བཅས་ཁྱོན་མི་གྲངས་ ༧༠ ཙམ་ཚང་འཛོམས་ཀྱི་ཐོག་མར་སྐུ་མགྲོན་གཙོ་བོ་་མཆོག་གིས་ཚོགས་འདུ་དབུ་འབྱེད་ཀྱི་སྣང་གསལ་ཞལ་ཕྱེ་གནང་མཚམས། བཀའ་བློན་རྣམས་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་གྲོལ་རིན་པོ་ཆེ་མཆོག་ལ་རྟེན་བྱུང་མཇལ་དར་འབུལ་གྲུབ་བསྟུན་བོད་རྒྱལ་ཁབ་ཆེན་པོའི་རྒྱལ་གླུ་དབྱངས་སུ་གྱེར། དེ་རྗེས་བོད་བསྟན་སྲིད་མི་རིགས་ཀྱི་དོན་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ཀྱིས་གཙོས་རང་ལུས་མེེར་སྲེག་གནང་མཁན་སྤུན་ཟླ་ཡོངས་ལ་གདུང་སེམས་མཉམ་སྐྱེ་མཚོན་སླད་སྐར་མ་གཅིག་རིང་མྱ་ངན་གུས་འདུད་ཞུས།
དེ་ནས་ནང་སྲིད་དྲུང་ཆེ་འཆི་མེད་རིག་འཛིན་ལགས་ཀྱིས་ཚོགས་འདུའི་ངོ་སྤྲོད་གནང་གྲུབ་མཚམས་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་གིས་གསུང་བཤད་གནང་དོན། དེ་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་རྒྱ་བལ་འབྲུག་གསུམ་དུ་གནས་འཁོད་བོད་མིའི་འཛིན་སྐྱོང་ཚོགས་ཆེན་ཐེངས་ ༡༢ དང་། སོ་ནམ་ཚོགས་ཆེན་ཐེངས་ ༡༠ ཐོག་ཕེབས་པའི་སྐུ་མགྲོན་གཙོ་བོ་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གཙོས་བཀའ་བློན་རྣམ་པ་དང་། དེ་བཞིན་བཀའ་དྲུང་གིས་གཙོས་ལས་ཁུངས་ཁག་གི་དྲུང་ཆེ་རྣམ་པ། བོད་པའི་གཞིས་ཆགས་ཁག་ ༤༥ ནས་ཕེབས་པའི་ས་གནས་འགོ་འཛིན་རྣམ་པ། ནང་སྲིད་ལས་ཁུངས་ཀྱི་ལས་བྱེད། གསར་འགོད་པ་བཅས་ལ་སྔ་དྲོའི་འཚམས་འདྲི་ཞུ་རྒྱུ་ཡིན། ཚོགས་ཆེན་ཉིན་ལྔའི་རིང་བཀའ་བསྡུར་གནང་རྒྱུ་གྲོས་གཞི་དོན་ཚན་བདུན་ཡོད། དེ་རིང་སྔ་དྲོ་༸རྒྱལ་བའི་ཕོ་བྲང་དུ་ཚོགས་བཅར་བ་ཡོངས་ལ་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དམིགས་བསལ་མཇལ་ཁ་དང་བཀའ་སློབ་ཞུ་རྒྱུའི་སྐལ་བཟང་གོ་སྐབས་ཞིག་ཐོབ་ཡོད།
སྐབས་དེར་ཆོགས་ཆེན་དུ་བཀའ་བསྡུར་གནང་རྒྱུའི་གྲོས་གཞི་དོན་ཚན་དང་འཆར་གཞི་གང་ཡོད་པ་ཆ་ཚང་༸གོང་ས་མཆོག་ལ་སྙན་སེང་ཞུ་སྐབས། ༸གོང་ས་༸སྐྱབས་མགོན་ཆེན་པོ་མཆོག་གིས། “ཧ་ཅང་ཡག་པོ་བྱུང་འདུག” ཅེས་བཀའ་སློབ་བཟང་པོ་ཕེབས་སོང་། དོན་ཚན་ཁག་བདུན་གྱི་ནང་གསེེས་རེ་རེའི་ཐོག་བཀའ་བསྡུར་གནང་རྒྱུའི་དུས་ཚོད་གང་ཙམ་ཡོད་སྟབས་ངས་དམིགས་བསལ་རྒྱས་སྤྲོས་ཞུ་རྒྱུ་མིན། ༸གོང་ས་མཆོག་གིས་དེ་རིང་སྔ་དྲོ་མཇལ་ཁའི་སྐབས་བཀའ་སློབ་ཕེབས་པ་དེ་དག་གྲོས་གཞིའི་དོན་ཚན་ནང་འཁོད་མིན་ལ་མ་ལྟོས་པར་བཀའ་སློབ་དེ་དག་ཐོག་ངེས་པར་དུ་ང་ཚོས་གོ་བསྡུར་གནང་དགོས་པ་ཆགས་ཡོད།
ཉིན་ལྔའི་ཚོགས་འདུ་དང་བསྟུན་དེ་སྔོན་རྒྱ་གར་གསང་བའི་ལས་ཁུངས་ཀྱི་སྤྱི་ཁྱབ་པ་དང་ད་ལྟ་རྒྱ་གར་དབུས་གཞུང་ནང་སྲིད་ལས་ཁུངས་ཀྱི་སློབ་སྟོན་པ་སྐུ་ཞབས་མཱ་ཐུར་ Amitabh Mathur ལགས་ཟུར་དུ་མཇལ་རྒྱུ་བྱུང་། སྐབས་དེར་ཁོང་དང་མཇལ་མོལ་གནང་མཐར་ས་གནས་འགོ་འཛིན་རྣམ་པའི་ཚོགས་འདུའི་ཐོག སྐྱབས་བཅོལ་ལག་དེབ་བཟོ་རྒྱུ་དང་ཕར་འགྱང་ཞུ་ཕྱོགས་སོགས་ཉེ་ལམ་རྒྱ་གར་ནང་ཁྲིམས་མང་པོ་ཞིག་འགྱུར་བ་ཕྱིན་པ་དེ་དག་ཐོག་གོ་བསྡུར་གནང་ཐུབ་ན་ཞེས་དགོངས་འཆར་གནང་བ་ལྟར་ང་ཚོས་རྒྱ་གར་དབུས་ནང་སྲིད་ལས་ཁུངས་ནས་མི་སྣ་བཞི་ཆེད་དུ་མགྲོན་འབོད་ཞུས་ཡོད།
དེ་བཞིན་ས་གནས་ཀྱི་སྐོར་སྲུང་སྤྱི་ཁྱབ་ཁོང་རང་ཕེབས་མ་ཐུབ་སྟབས་ Additional SP དང་། ང་ཚོའི་ལས་དོན་དང་འབྲེལ་བ་ཡོད་མཁན་གྱི་ལས་རོགས་བཅས་ཕེབས་ཀྱི་ཡོད། སྐབས་དེར་ས་གནས་འགོ་འཛིན་རྣམས་ནས་གཞིས་ཆགས་ཁག་ཏུ་དེའི་ཐོག་དཀའ་ངལ་གང་ཡོད་པ་རྣམས་གསུང་ཐུབ་པ་ཡིན་ན། མ་འོངས་པར་དེའི་ཐོག་དཀའ་ངལ་སེལ་སླད་ཕན་ཐོགས་ཆེན་པོ་ཡོང་ངེས་ཡིན། ཞེས་སོགས་ཀྱི་གསུང་བཤད་གནང་།
དེ་ནས་སྐུ་མགྲོན་གཙོ་བོ་མཆོག་གིས་དུས་ནས་དུས་སུ་ཚོགས་འདུ་མང་པོ་ཚོགས་ཀྱིས་ཡོད་སྟབས་དགོས་པ་རྒྱུ་མཚན་ཆེན་པོ་ཞིག་ཡོད། ང་ཚོས་ཚོགས་འདུ་དེ་དག་ཆོ་ག་ཕྱག་ལེན་ལྟ་བུའི་ཐོག་འགྲོ་རྒྱུའི་ཉེན་ཁ་ཕྲན་བུ་ཡོད་སྟབས། དེ་འདྲ་མི་ཡོང་ཆེད་ཡིད་གཟབ་གནང་དགོས་པ་གལ་ཆེ། ཞེས་སོགས་གསུང་མཐར་ཆོལ་ཁ་གསུམ་ནང་ཁུལ་མཐུན་སྒྲིལ་རྡོག་རྩ་ཆིག་སྒྲིལ་དགོས་པ་ཧ་ཅང་གལ་ཆེ་ཡིན་སྟབས། ས་གནས་འགོ་འཛིན་རྣམ་པས་འབྲེལ་ཡོད་ས་གནས་སོ་སོའི་ནང་གི་བོད་མི་ནང་ཁུལ་མཐུན་སྒྲིལ་གོང་མཐོར་གཏོང་རྒྱུའི་ལས་འགན་ཐོག་ངེས་པར་དུ་འཐུས་ཤོར་མ་སོང་བྱ་གལ་དང་། ཉེ་ལམ་བཙན་བྱོལ་བོད་མིའི་སྤྱི་ཚོགས་ཁྲོད་ཆོལ་ཁ་ཆོས་ལུགས་ཀྱི་གླེང་སློང་ཕྲན་བུ་སྤྱི་ཚོགས་ནང་ཁྱབ་པར་བརྟེན། བོད་མིའི་ཆིག་སྒྲིལ་གྱི་གོང་བུར་གནོད་གཞིར་གྱུར་བ་དེར་བློ་འཚབ་ཧ་ཅང་བྱུང་སྐོར་དང་། བོད་མིའི་སྤྱི་མཐུན་གྱི་བསོད་ནམས་གསོག་དགོས་པ་གལ་ཆེ་ཚུལ།
བཀའ་ཤག་གི་ལྔ་དང་ལྔ་བཅུའི་འཆར་སྣང་ལྟར་འབྱུང་འགྱུར་ལོ་ ༥༠ རིང་ང་ཚོ་མང་པོ་ཞིག་འཚོ་གནས་མ་ཐུབ་ཀྱང་ད་ལྟ་ནས་མ་འོངས་ལོ་ལྔ་བཅུའི་རིང་བོད་མི་རྣམས་མུ་མཐུད་བཙན་བྱོལ་གནས་བབ་འོག་གནས་དགོས་ཀྱང་འཐབ་རྩོད་ཀྱི་མ་རྩ་སྲ་བརྟན་བཟོ་དགོས་པ་ང་ཚོའི་ལས་འགན་ཆགས་ཡོད། ཅེས་སོགས་གསུང་།
དེ་ནས་ནང་སྲིད་དྲུང་འཕར་ཚེ་དབང་སྒྲོལ་མ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་དབུ་འབྱེད་ཀྱི་མཛད་སྒོ་རྒྱལ་ཁའི་ངང་གྲོལ་ཡོད།
ཐེངས་འདིའི་ཚོགས་འདུར་མཐུན་འགྱུར་རོགས་རམ་གནང་མཁན་ཨ་རི་རོགས་ཚོག་ USAID ཡིན་འདུག
སྤྱིར་ཉིན་གྲངས་ལྔ་རིང་གི་ཚོགས་ཆེན་ཐོག་གཙོ་བོ་དོན་ཚན་བདུན་གྱི་ཐོག་གོ་བསྡུར་གནང་རྒྱུ་ཡིན་འདུག དང་པོ་ནི། བོད་མི་ཉུང་ཆས་ཤིག་མགོ་སྐོར་བླུ་བྲིད་འོག་ཏུ་ཚུད་དེ། བོད་མིའི་གཅིག་སྒྲིལ་ལ་གཏོར་བཤིག་གཏོང་ཐབས་དང་། ༸གོང་ས་མཆོག་གི་མཛད་འཕྲིན་ལ་འགོག་རྐྱེན། སྐུ་ཕྱྭར་གནོད་པའི་བྱ་ངན་སོགས་ལ་དབུས་ས་གཉིས་ཀྱིས་ཁ་གཏད་དང་གདོང་ལེན་བྱས་ཏེ། ༸གོང་ས་མཆོག་གི་སྐུ་ཕྱྭར་འགོག་རྐྱེན་བར་ཆད་གང་ཡང་མི་ཡོང་བའི་གནང་ཕྱོགས་དང་། ས་གནས་མི་མང་སོ་སོ་ནས་འདིའི་ཐད་བསམ་ཚུལ་ཇི་ཡོད་སྐོར་ཡིན་འདུག གཉིས་པ་ནི། ས་གནས་འགོ་འཛིན་རྣམས་ཀྱི་འཛིན་སྐྱོང་ཚོགས་ཆེན་ཐེངས་ ༡༡ སྐབས་སུ་གྲོས་ཆོད་བཞག་པ་དེ་དག་ལག་ལེན་ཇི་བསྟར་སྐོར་ལ་བགྲོ་གླེང་། གསུམ་པ་ནི། ཕྱི་ལོ་ ༢༠༡༤ ལོར་རྒྱ་གར་དབུས་གཞུང་གིས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པ་དེ་གང་དག་ལག་བསྟར་བྱས་མིན་དང་། གྲུབ་འབྲས་ཇི་བྱུང་། མ་འོངས་པར་བྱེད་འཆར་ཇི་ཡོད་སྐོར་ལ་གྲོས་བསྡུར་བྱ་རྒྱུ་ཡིན་འདུག ལྔ་པ་ནི། ལྔ་དང་ལྔ་བཅུའི་སྲིད་བྱུས་དགོངས་དོན་ལག་བསྟར་གང་ལེགས་སྐོར་ལ་གོ་བསྡུར། དྲུག་པ་ནི། ཕྱིས་སུ་བོད་ནས་འབྱོར་ཞིང་ས་ཁང་མེད་པའི་དཀའ་ངལ་སེལ་ཆེད་དུ་གཞིས་ཆགས་ཁག་ཏུ་ཞིང་ས་དང་ཁང་ས། ཁང་པ་སྟོང་པ་གང་ཡོད་དང་། གཞན་དཀའ་ངལ་སེལ་ཐབས་ཇི་ཡོད་སྐོར་ལ་གོ་བསྡུར་བྱ་རྒྱུ་ཡིན་འདུག་པ་བཅས།།
