ཕྱི་ལོ་ ༢༠༡༨ ཟླ་ ༦  ཚེས་ ༢༠ རེས་གཟའ་ལྷག་པ།

༄༅།།བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་ཞིག་ཁེ་ན་ཌའི་གྲོང་ཁྱེར་ཁག་གཅིག་ལ་གྲོས་ཚོགས་འཐུས་མི་སོགས་ཐུག་འཕྲད་དང་བོད་དོན་ཞུ་སྐུལ་ཆེད་ཕེབས་ཡོད་པ་ལྟར། ཕྱི་ལོ་ ༢༠༡༨ ཟླ་ ༦ ཚེས་ ༢༠ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་སྤྱི་འཐུས་བསྟན་པ་ཡར་འཕེལ་ལགས་དང་། སྤྱི་འཐུས་དོན་འགྲུབ་བཀྲ་ཤིས་ལགས། སྤྱི་འཐུས་མི་འགྱུར་རྡོ་རྗེ་ལགས། སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་བཅས་ཀྱིས་ཉེ་ཆར་ཁེ་ན་ཌའི་ཨོན་ཊེ་རིའོ་ Ontario ས་གནས་གྲོས་ཚོགས་འཐུས་མིར་འོས་འདེམས་བྱུང་བའི་བོད་རིགས་བུད་མེད་བུ་ཁྲིད་དཀར་པོ་ཆེ་ལགས་ལ་ཐུག་འཕྲད་ཀྱིས་འཚམས་འདྲིའི་བཀྲ་ཤིས་བདེ་ལེགས་ཞུས་པ་མ་ཟད། བུ་ཁྲིད་དཀར་པོ་ཆེ་ལགས་ལ་ས་གནས་གྲོས་ཚོགས་འཐུས་མིའི་འོས་འདེམས་ཁྲོད་རྒྱལ་ཁ་ཐོབ་པ་ནི་བོད་མི་རིགས་ཀྱི་གཟི་བརྗིད་རེད། ཅེས་གསུངས།

ཕྱོགས་མཚུངས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གིས་བུ་ཁྲིད་དཀར་པོ་ཆེ་ལགས་ལ་ཊོ་རོན་ཊོ་ (Toronto) ཁུལ་གྱི་བོད་རིགས་སྤུན་ཟླ་ཚོར་རོགས་རམ་གང་ཐུབ་གནང་རྒྱུའི་རེ་སྐུལ་ཞུས་འདུག

སྐབས་དེར་བུ་ཁྲིད་དཀར་པོ་ཆེ་ལགས་ཀྱིས་དགའ་ཚོར་དང་བཅས་གསུང་དོན། རང་ཉིད་ཊོ་རོན་ཊོ་བོད་རིགས་སྤྱི་མཐུན་ཚོགས་པ་དང་སྔ་མོ་ནས་འབྲེལ་བ་གཏིང་ཟབ་ཡོད་པས། ཁུལ་དེར་གནས་པའི་བོད་རིགས་སྤུན་ཟླ་ཚོར་ནུས་ཤུགས་ཡོད་དགུ་རྩལ་སྤྲུག་གིས་རོགས་རམ་གང་ཐུབ་ཅི་ཐུབ་གནང་གི་ཡིན། ཞེས་གསུངས། ཨ་རི་སྐུ་ཚབ་དོན་གཅོད་ཁང་གི་དྲུང་ཆེ་ཚེ་རིང་བཀྲ་ཤིས་ལགས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་དང་ལྷན་བཅར་གནང་།
ཉིན་བཅུ་གཅིག་རིང་གི་ཐེངས་འདིའི་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཁེ་ན་ཌའི་སྐོར་སྐྱོད་རྒྱལ་ཁའི་ངང་མཇུལ་སྒྲིལ་ཡོད་པ་དང་བཅས། །