ཕྱི་ལོ་ ༢༠༡༨ ཟླ་ ༦ ཚེས་ ༢༠ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་གླིང་ཆེན་ནང་གི་བྷལ་ཊིག་མངའ་ཁུལ་ཡིན་པའི་ལི་ཐུ་ཝེ་ནི་ཡའི་ Lithuania རྒྱལ་ས་ཝིལ་ན་སིར་ Vilnius དང་། ལ་ཏི་ཝི་ཡའི་ Latvia རྒྱལ་ས་རི་གར་ Riga ཆིབས་བསྒྱུར་བཀའ་དྲིན་བསྐྱངས་ཏེ་མང་ཚོགས་ལ་བཀའ་ཆོས་དང་བཀའ་སློབ། གསར་འགོད་པ་དང་མཇལ་འཕྲད། དེ་བཞིན་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་དང་བོད་དོན་རྒྱབ་སྐྱོར་བ་རྣམས་ལ་མཇལ་ཁ་དང་བཀའ་སློབ་སྩལ་བ་སོགས་ཀྱི་རླབས་ཆེན་གྱི་མཛད་འཕྲིན་ཁག་རེ་ཞིག་ལེགས་པར་གྲུབ་སྟེ་དེ་རིང་ཕྱི་ཚེས་ ༢༠ ཉིན་བཞུགས་སྒར་དུ་༸ཞབས་སོར་བདེ་བར་འཁོད་ཡོད།
དེ་ཡང་མགོན་པོ་གང་ཉིད་མཆོག་ཟླ་འདིའི་ཕྱི་ཚེས་ ༡༢ ཉིན་ཡུ་རོབ་གླིང་ཆེན་ནང་གི་བྷལ་ཊིག་ Baltic མངའ་ཁུལ་ཡིན་པ་ལི་ཐུ་ཝེ་ནི་ཡའི་ Lithuania རྒྱལ་ས་ཝིལ་ན་སིར་ Vilnius ནང་༸ཞབས་སོར་བདེ་བར་འཁོད་དེ་ཕྱི་ཚེས་ ༡༣ ཉིན་གྱི་སྔ་དྲོར་བཞུགས་གནས་གསོལ་མགྲོན་ཁང་དུ་ lrytas.tv channel ཞེས་པའི་བརྙན་འཕྲིན་གསར་འགྱུར་ཚན་པའི་གསར་འགོད་པའི་དྲི་བར་བཀའ་ལན་སྩལ།
དེ་ནས་ཝིལ་ན་སི་གཙུག་ལག་སློབ་གཉེར་ཁང་ University of Vilnius དུ་མང་ཚོགས་ ༢༠༠༠ བརྒལ་བར་ ༼དེང་དུས་ཤེས་ཡོན་ལམ་ལུགས་ནང་འགྲོ་བ་མིའི་བཟང་སྤྱོད་རིན་ཐང་གི་སློབ་གསོ་དགོས་གལ།༽ཞེས་པའི་ཐོག་བཀའ་སློབ་སྩལ་རྗེས་བོད་ཀྱི་ས་ཚིགས་ Tibet Square ཞེས་པའི་ས་གནས་སུ་ཆིབས་སྒྱུར་བཀའ་དྲིན་བསྐྱངས་ཏེ་ཡུལ་དེ་ཉིད་རང་བཙན་ཐོབ་ནས་མི་ལོ་ཧྲིལ་པོ་བརྒྱ་འཁོར་བའི་ཉིན་མོ་དང་བསྟུན། བོད་དང་ལི་ཐུ་ཝི་ཡ་ན་ཡུལ་གཉིས་དབར་མཛའ་བརྩེའི་འབྲེལ་ལམ་མཚོན་སླད་ཤིང་སྣ་འདེབས་འཛུགས་མཛད།
ཕྱི་ཚེས་ ༡༤ ཉིན་གྱི་སྔ་དྲོར་ཡོ་རོབ་བྷལ་ཊིག་མངའ་ཁུལ་གྱི་རྒྱལ་ཁབ་ལི་ཐུ་ཝེ་ནི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམ་པ་དང་བོད་དོན་རྒྱབ་སྐྱོར་བ་བཅས་ལ་མཇལ་ཁ་དང་བཀའ་སློབ་སྩལ་རྗེས་སི་མེན་སི་ཚོགས་ཁང་ཆེན་མོར་ Siemens Arena ཆིབས་སྒྱུར་བཀའ་དྲིན་བསྐྱངས་ནས་མང་ཚོགས་ ༢༥༠༠ བརྒལ་བར་བདེ་སྐྱིད་ཀྱི་ཐབས་ལམ་ The Art of Happiness ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ།
ཕྱི་ཚེས་ ༡༥ ཉིན་ལ་ཏི་ཝི་ཡའི་རྒྱལ་ས་རི་གར་༸ཞབས་སོར་བདེ་བར་འཁོད་དེ་ཚེས་ ༡༦ དང་ ༡༧ བཅས་ཉིན་གྲངས་གཉིས་རིང་ཡུ་རོབ་བྱང་བརྒྱུད་ལ་ཊི་ཝེ་ཡའི་རྒྱལ་ས་རི་གྷའི་ Riga ནང་རྟེན་གཞི་བྱས་པའི་སྐོན་ཊོ་ Skonto ཚོགས་ཁང་ཆེན་མོའི་ནང་རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་དང་། རྟེན་འབྲེལ་བསྟོད་པ། རྡོ་རྗེ་གཅོད་པ་བཅས་ཀྱི་བཀའ་ཆོས་དང་། ཕྱི་ཚེས་ ༡༨ ཉིན་སྤྱན་རས་གཟིགས་ཀྱི་བཀའ་དབང་དང་འཇམ་དབྱངས་དཀར་པོའི་རྗེས་སྣང་སྩལ་བ་སོགས་ཀྱི་མཛད་འཕྲིན་རྒྱ་ཆེ་བསྐྱངས་ཏེ་ཕྱི་ཚེས་ ༢༠ ཉིན་གྱི་ཕྱེད་ཡོལ་ཆུ་ཚོད་ ༡༢།༡༥ ཐོག་རྡ་ས་གྷ་གྷལ་གནམ་ཐང་དུ་༸ཞབས་སོར་བདེ་བར་འཁོད་སྐབས་སྲིད་ཚབ་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་དང་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་གིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། དེ་ནས་ཆིབས་འགྲོ་བརྒྱུད་བཞུགས་སྒར་ཕོ་བྲང་དུ་༸ཞབས་སོར་འཁོད་སྐབས་དད་ལྡན་སེར་སྐྱ་མི་མང་བརྒྱ་ཕྲག་མང་པོས་ལག་ཏུ་དྲི་བསང་བདུག་སྤོས་དང་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད་པ་བཅས། །
