༢༠༡༨ ཟླ་ ༦ ཚེས་ ༡༩ རེས་གཟའ་མིག་དམར།
༄༅། །ཕྱི་ལོ་ ༢༠༡༨ ཟླ་ ༦ ཚེས་ ༡༨ ཉིན་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་སྲུང་སྐྱོབ་ལྷན་ཚོགས་ཐེངས་ ༣༨ ཐོག་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་མཆོག་ནས་རྒྱ་ནག་གཞུང་ལ་སྐྱོན་བརྗོད་ཤུགས་ཆེ་གནང་འདུག
དེ་ཡང་འདས་པའི་ལོ་ལྔའི་ནང་བོད་དང་ཡུ་གུར། དེ་བཞིན་རྒྱ་ནག་བཅས་ཀྱི་ནང་དུ་འགྲོ་བ་མིའི་ཐོབ་ཐང་གི་གནས་སྟངས་ཐད་རྟོག་ཞིབ་བྱ་རྒྱུའི་གོ་སྐབས་ཚད་ལྡན་ཞིག་མ་སྤྲད་པར་བརྟེན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་ཚོགས་གཙོ་སྐུ་ཞབས་པི་རིན་སི་ཛི་ཡ་དི་ར་ཐི་ཛི་ཡ་ཐི་ཨལ་ཧུ་སེན་ Prince Zeid Ra’ad Zeid མཆོག་གིས་རྒྱ་ནག་གཞུང་ལ་སྐྱོན་བརྗོད་ཤུགས་ཆེ་གནང་དོན།
“འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གིས་རྒྱ་ནག་དང་གྲོས་མོལ་བརྒྱུད་ནས་བོད་རང་སྐྱོང་ལྗོངས་དང་ཡུ་གུར་རང་སྐྱོང་ལྗོངས་གཉིས་ཀྱི་ནང་དེང་སྐབས་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་བཞིན་པའི་གནས་ཚུལ་དེ་དག་ལ་དོན་དངོས་ས་གནས་ས་ཐོག་ཏུ་ང་ཚོའི་ལས་བྱེད་བསྐྱོད་ནས་དངོས་ཡོད་གནས་ཚུལ་ཇི་ཡིན་ཤེས་ཐབས་བྱས་ཡོད་ཀྱང་རྒྱ་ནག་གཞུང་གིས་གོ་སྐབས་མ་སྤྲད་པ་རེད།
དེ་ཡང་འདས་པའི་ལོ་ལྔའི་རིང་སྟེ། ཕྱི་ལོ་ ༢༠༡༤ ནས་ད་བར་ང་ཚོས་འབོད་སྐུལ་ཞུ་སྙན་ཐེངས་ ༡༥ ཙམ་ཕུལ་ཡོད་ཀྱང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་སྐུ་དབང་ཡོད་མཁན་ལས་བྱེད་གཉིས་ལ་མ་གཏོགས་ཆོག་མཆན་སྤྲད་མེད། གཞུང་འབྲེལ་མིན་པའི་ཚོགས་པ་ཁག་གིས་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་རྟོག་ཞིབ་ཚན་པ་དང་། འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆིངས་དོན་བསྐྱར་ཞིབ་སྡེ་ཚན། UN Treaty Body reviews དེ་བཞིན་ལོ་རེའི་དུས་བཀག་བསྐྱར་ཞིབ་ Universal Periodic Review ལྟ་བུ་དང་། གཞན་ཡང་རྒྱལ་ཚོགས་ཀྱི་མཁས་ལས་རྟོག་ཞིབ་མི་སྣ་ mandate-holders སོགས་གཞུང་འབྲེལ་ལས་ཁུངས་ཁག་དང་འབྲེལ་བ་བྱ་རྒྱུར་རྒྱ་ནག་གཞུང་གིས་ཆེད་མངགས་འགོག་རྐྱེན་སྣ་ཚོགས་བཟོ་བཞིན་འདུག་པ་དེར་ང་རང་སེམས་འཚབ་ཧ་ཅང་འདུག དེར་བརྟེན་འབྱུང་འགྱུར་རྒྱ་ནག་གཞུང་གིས་རྒྱལ་སྤྱིའི་འགྲོ་བ་མིའི་ཐོབ་ཐང་རྟོག་ཞིབ་ཚན་པ་ཇི་འདྲ་ཞིག་ཡིན་ནའང་དེར་གུ་ཡངས་དང་གཉིས་མོས་ཀྱི་བསམ་བློའི་ཐོག་ནས་མཐུན་འགྱུར་ཞུ་ཐོག རྒྱ་ནག་ཁྱོན་ཡོངས་ནང་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་དགོས། ” ཞེས་གསུངས།
ཚོགས་གཙོ་མཆོག་གི་ལས་ཡུན་འདི་ལོའི་ལོ་མཇུག་ནང་གཙང་རྒྱུ་ཡིན་སྟབས་འགྲོ་བ་མིའི་ཐོབ་ཐང་སྲུང་སྐྱོབ་ཐོག་འཇིགས་ཞུམ་མེད་པར་དེ་སྔ་ལས་འབད་བརྩོན་ཤུགས་ཆེ་བ་གནང་དགོས་པའི་དུས་ལ་བབ་ཡོད་སྐོར་དང་། རང་ཉིད་ཙམ་མ་ཟད་འབྲེལ་ཡོད་གཞུང་སྒེར་སོགས་ལའང་དེ་ལྟར་གནང་དགོས་པའི་འབོད་སྐུལ་ཡང་གནང་འདུག་པ་བཅས། །
