༢༠༡༡ ཟླ་ ༢ ཚེས་ ༢༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༢༤ རེས་གཟའ་ཕུར་བུའི་ཉིན་རྒྱ་གར་རྒྱལ་ས་ལྡི་ལིའི་ནང་རྟེན་གཞི་བྱས་པའི་ཨ་རིའི་གཞུང་ཚབ་སྐུ་ཞབས་ཊི་མོ་ཐི་མཆོག་ (Timothy J.Roemer) རྡ་སའི་ཉེ་འགྲམ་ཤེས་རབ་དགའ་ཚལ་སློབ་གླིང་གི་རྒྱབ་ཏུ་རྡ་ས་དབུས་སྣེ་ལེན་འབྲེལ་མཐུད་ཁང་གསར་བཞེངས་ལེགས་གྲུབ་ཀྱི་དབུ་འབྱེད་མཛད་སྒོའི་སྐབས་སུ་སྐུ་མགྲོན་གཙོ་བོར་ཕེབས་ཡོད། རྡ་ས་དབུས་སྣེ་ལེན་འབྲེལ་མཐུད་ཁང་གསར་བཞེངས་ཆེད་ཨ་རིའི་གཞུང་གིས་ཨ་སྒོར་ས་ཡ་ ༡།༤  ཙམ་རོགས་རམ་གནང་ཡོད་པ་མ་ཟད། རྡ་ས་དབུས་སྣེ་ལེན་འབྲེལ་མཐུད་ཁང་གསར་རྒྱག་ཆེད་འགྲོ་གྲོན་བརྒྱ་ཆ་ ༦༠ ཙམ་ཨ་རི་གཞུང་གིས་རོགས་རམ་གནང་ཡོད། རྡ་ས་དབུས་སྣེ་ལེན་འབྲེལ་མཐུད་ཁང་གསར་པ་དེར་མི་གྲངས་ ༥༠༠ ཙམ་གནས་སྡོད་བྱ་རྒྱུའི་མཐུན་རྐྱེན་ཡོད། དེ་ཡང་དབུ་འབྱེད་མཛད་སྒོའི་ཉིན་ཨ་རིའི་གཞུང་ཚབ་མཆོག་གིས་གསུང་དོན། ལོ་ངོ་བཅུ་ཕྲག་འགའ་ཤས་རིང་རྒྱ་གར་གཞུང་གིས་བཙན་བྱོལ་བོད་མི་ཚོར་རོགས་རམ་རྒྱ་ཆེ་གནང་བ་ནི་མིག་དཔེ་བཟང་པོ་ཞིག་རེད། ང་ཚོ་ཨ་རི་ཡུལ་གྱིས་དེ་མཚུངས་བོད་མི་ཚོར་རོགས་རམ་བྱེད་རྒྱུའི་ལས་དོན་ཐོག་ཞབས་འདེགས་ཕྲན་བུ་ཞུ་ཐུབ་པར་དགའ་པོ་བྱུང་ཞེས་སོགས་གསུངས་ཡོད། ཨ་རིའི་གཞུང་ཚབ་མཆོག་ཕྱི་ཚེས་ ༢༣ ༢༤ བཅས་ཉིན་གཉིས་རིང་རྡ་སར་བཞུགས་ཡོད་པ་བཅས།།