༢༠༡༡ ཟླ་ ༢ ཚེས་ ༢༡ རེས་་གཟའ་ཟླ་བ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༡༨ རེས་གཟའ་པ་སངས་ཉིན་གྱི་ཕྱེད་ཡོལ་བཙན་བྱོལ་བོད་གཞུང་གི་བཀའ་ཁྲི་ཟམ་གདོང་རིན་པོ་ཆེ་མཆོག་སུད་སི་གྲོང་ཁྱེར་ཛུ་རིག་ཏུ་ཕེབས་སྐབས་སུད་སི་དང་ལེ་ཁེ་སི་ཊེན་ས་གནས་བོད་རིགས། དེ་བཞིན་སུད་བོད་མཛའ་འབྲེལ་ཚོགས་པའི་ཚོགས་མི་རྣམས་ཀྱིས་ཕེབས་བསུ་གཟབ་རྒྱས་ཞུས་ཡོད། ཕྱི་ཚེས་ ༡༩ ཉིན་རྒྱབ་བཀའ་ཁྲི་མཆོག་གིས་གྲོང་ཁྱེར་ཛུ་རིག་ཏུ་སུད་བོད་མཛའ་འབྲེལ་ཚོགས་པའི་ལོ་འཁོར་ཚོགས་ཆེན་ཐོག་ཕེབས་ཏེ་གསུང་བཤད་གནང་དོན། ངས་བོད་མི་ས་ཡ་དྲུག་གི་ཚབ་ཞུས་ཏེ་ཁྱེད་ཚོ་ཚང་མར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་མ་ཟད། ཁྱེད་ཚོ་བརྒྱུད་རྒྱལ་སྤྱི་དང་ལྷག་པར་སུད་སི་མི་མང་ཚོར་ཐུགས་རྗེ་ཆེ་ཞུ་རྒྱུ་ཡིན། ནུབ་ཕྱོགས་རྒྱལ་ཁབ་ནང་ནས་བོད་མི་སྐྱབས་བཅོལ་བ་ཚོར་གཞིས་ཆགས་ཀྱི་མཐུན་རྐྱེན་སྤྲོད་མཁན་ཐོག་མ་དེ་སུད་སི་ཆགས་ཡོད། སུད་སིར་གནས་སྡོད་བྱས་པའི་བཙན་བྱོལ་བོད་མི་ཚོ་བཙན་བྱོལ་བོད་མི་ནང་ནས་སྐྱིད་ཤོས་ཆགས་ཡོད། ང་ཚོར་དཀའ་ངལ་འཕྲད་སྐབས་སུད་སི་གཞུང་དང་མི་མང་གིས་རོགས་རམ་གནང་བ་དེ་དག་ང་ཚོས་ནམ་ཡང་བརྗེད་ཐབས་མེད་ཅེས་གསུང་བཤད་གནང་ཡོད་པ་མ་ཟད།
སྐབས་དེར་བཀའ་ཁྲི་མཆོག་གིས་བཙན་བྱོལ་ནང་བོད་མི་ཚོས་༸གོང་ས་མཆོག་གིས་གསོལ་རས་སྩལ་བའི་མང་གཙོའི་ལམ་བཟང་ཐོག་ལག་བསྟར་ཇི་འདྲ་བྱེད་བཞིན་པའི་གནས་ཚུལ་དང་། བོད་ཀྱི་བདེན་པའི་འཐབ་རྩོད་ལ་བོད་དོན་རྒྱབ་སྐྱོར་ཚོགས་པས་རྒྱབ་སྐྱོར་སྔ་ཕྱི་ཇི་འདྲ་གནང་མིན་དང་མ་འོངས་པར་ནུས་པ་ཕན་ཐོགས་ཇི་འདྲ་ཡོང་མིན་སོགས་གསལ་བཤད་གནང་།
སུད་བོད་མཛའ་འབྲེལ་ཚོགས་པ་དེ་བཞིན་ཕྱི་ལོ་ ༡༩༨༣ ལོར་བཙུགས་པ་ཞིག་ཡིན།
དེ་བཞིན་ཕྱི་ཚེས་ ༡༨ ཉིན་གྱི་སྔ་དྲོ་ཡུ་རོབ་བོད་ཀྱི་གཞོན་ནུ་ལྷན་ཚོགས་ཀྱིས་བཀའ་ཁྲི་མཆོག་མགྲོན་ཁང་དུ་གདན་ཞུ་གནང་སྟེ་གསོལ་སྟོན་བཤམས། སྐབས་དེར་གཞོན་ནུ་ལྷན་ཚོགས་ཀྱིས་བཀའ་ཁྲི་མཆོག་གིས་ད་བར་བོད་མི་རིགས་ཀྱི་ཆེད་དུ་ཕྱག་ལས་གནང་བར་ཐུགས་རྗེ་ཆེ་ཞུས་པ་དང་སྦྲགས། ཡུ་རོབ་ཁུལ་དུ་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་མི་རྣམས་ལ་བོད་ཡིག་འཛིན་གྲྭའི་ལས་གཞི་དང་ཡུ་རོབ་བོད་མི་ཚོར་འོས་བསྡུ་དང་འབྲེལ་བའི་གནས་ཚུལ་རྒྱ་ཁྱབ་གོ་རྟོགས་སྤེལ་རྒྱུའི་ལས་གཞི་གང་བརྩམས་པའི་སྐོར་གསལ་བཤད་ཞུས་ཡོད།
ཕྱོགས་མཚུངས་སྐབས་དེར་བཀའ་ཁྲི་མཆོག་ནས་ཀྱང་གཞོན་ནུ་ལྷན་ཚོགས་ཀྱིས་བོད་ཀྱི་བདེན་མཐའ་སེལ་ཆེད་ད་བར་ལས་འགུལ་སྤེལ་བར་བསྔགས་བརྗོད་གནང་ཡོད།
ཕྱི་ཚེས་ ༢༠ སྔ་དྲོ་བཀའ་ཁྲི་མཆོག་གིས་སུད་སི་དང་ལེ་ཁེ་སི་ཊེན་བོད་རིགས་གྲངས་ ༤༥༠ ཙམ་ལ་གསུང་བཤད་གནང་དོན། ཁྱེད་ཚོས་ད་བར་རྒྱབ་སྐྱོར་གནང་བར་ངས་བཙན་བྱོལ་བོད་གཞུང་བཀའ་ཤག་གི་ཚབ་ཞུས་ཏེ་ཐུགས་རྗེ་ཆེ་ཞུ་རྒྱུ་དང་། བཙན་བྱོལ་བོད་མི་ཚོ་རྒྱལ་ཁབ་ ༥༥ ཙམ་གྱི་ནང་གནས་སྡོད་བྱེད་བཞིན་ཡོད། ཡུ་རོབ་ནང་ནས་སུད་སིར་བོད་མི་གཞི་རྒྱ་ཆེ་ཤོས་གནས་སྡོད་བྱེད་བཞིན་ཡོད་པར་བརྟེན། བོད་དོན་ཆེད་ལས་འགན་ཆེ་ཤོས་ཡོད་པ་དང་ལས་འགུལ་གཞི་རྒྱ་ཆེ་ཤོས་སྒྲུབ་ཐུབ་པའི་རེ་བ་ཞུ་བཞིན་ཡོད་ཅེས་གསུངས།
ལྷག་པར་ཕྱི་རྒྱལ་དུ་འཚར་ལོངས་བྱུང་བའི་བོད་མི་གཞོན་སྐྱེས་ཚོས་བོད་སྐད་རྒྱག་ཐུབ་པ་དགོས་རྒྱུ་ཧ་ཅང་གལ་ཆེན་པོ་ཡིན་པར་བརྟེན། ཕ་མ་ཚོས་སོ་སོའི་ཕྲུ་གུར་བོད་སྐད་དང་བོད་ཀྱི་རིག་གཞུང་ངོ་སྤྲོད་བྱེད་རྒྱུ་ཧ་ཅང་གལ་ཆེན་པོ་ཡིན་སྐོར་གསལ་བཤད་གནང་ཡོད། ཕྱོགས་མཚུངས་བཀའ་ཁྲི་མཆོག་གིས་བོད་མི་བོད་སྐད་རྒྱག་མ་ཤེས་མཁན་བོད་དོན་ཐོག་སེམས་ཤུགས་ཧ་ཅང་ཆེན་པོ་ཡོད་པ་དེ་འདྲ་མང་པོ་ཞིག་ཡོད་པ་ཁོང་རྣམས་ནས་གལ་ཏེ་བོད་སྐད་ཤེས་ཚེ་བོད་དོན་ཆེད་དགེ་མཚན་འཕར་མ་ཡོང་རྒྱུ་ཡིན་སྐོར་སོགས་ཀྱི་གསུང་བཤད་གནང་གྲུབ་བསྟུན།
མང་ཚོགས་ཀྱི་བོད་རྒྱ་འབྲེལ་མོལ་སྐོར་དང་དང་བླང་དཔྱ་ཁྲལ། བཙན་བྱོལ་བོད་མིའི་གནས་སྟངས། བཙན་བྱོལ་བོད་གཞུང་གི་དཔལ་འབྱོར་དང་ཤེས་ཡོན་བཅས་ཀྱི་གནད་དོན་ཐོག་གི་དྲི་བར་བཀའ་ཁྲི་མཆོག་གིས་ལན་འདེབས་དང་གསལ་བཤད་ཟབ་རྒྱས་གནང་ཡོད་པ་བཅས།།
