༢༠༡༡ ཟླ་ ༢ ཚེས་ ༡༧ རེས་གཟའ་ཕུར་བུ།
༄༅། །ཕྱི་ལོ་༢༠༡༡ཟླ་ ༢་ཚེས་ ༡༡ ཉིན་སྤོན་ཊ་སཾ་བྷོ་ཊ་བོད་གཞུང་གཏན་སློབ་ཏུ་༸རྒྱལ་བའི་བཀྲིན་རྗེས་དྲན་ཚོགས་ཆུང་གིས་གོ་སྒྲིག་འོག་སློབ་གྲྭའི་གཞི་རིམ་འོག་མ་ནས་གོང་མ་བར་གྱི་འཛིན་གྲྭ་སྡེ་ཚན་བརྒྱད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་༧༥ཕེབས་པ་དང། མགོན་པོ་གང་ཉིད་མཆོག་གིས་ལུགས་གཉིས་ཆོས་སྲིད་ཀྱི་ཐུགས་འགན་བཞེས་ཏེ་ད་བར་གཞིས་བྱེས་བོད་མི་སྤྱི་བོ་གནམ་བསྟན་ཡོངས་ཀྱི་ཆེད་འཕྲལ་ཕུགས་ཡུན་དུ་རླབས་ཆེན་གྱི་མཛད་ཕྲིན་རྒྱ་ཆེ་བསྐྱངས་དང་སྐྱོང་མུས་ལ་སྙིང་ཐག་པ་ནས་བཀའ་དྲིན་རྗེས་དྲན་སླད་༸གོང་ས་མཆོག་གི་སྐུའི་མཛད་རྣམ་དང་འབྲེལ་བའི་འགྲེམས་སྟོན་ཞུས་ཡོད། དེ་ཡང་སྔ་དྲོའི་ཆུ་ཚོད་ ༩།༣༠ ཐོག་སྐུ་མགྲོན་གཙོ་བོ་སྤོན་ཊ་ཆོལ་གསུམ་ས་གནས་གཞིས་འགོ་ཀརྨ་སྒྲོལ་མ་ལགས་དབུས་པའི་སྐུ་མགྲོན་རྣམ་པ་དང་ས་གནས་མི་མང་། དགེ་ལས་སློབ་ཕྲུག་བཅས་ལྷན་འཛོམས་ཐོག་རྔ་རོལ་དང་བཅས་བོད་རྒྱལ་ཁབ་ཆེན་པོའི་རྒྱལ་གླུ་དང་སློབ་ཕྲུག་རང་ངོས་ནས་བརྩམས་པའི་༸རྒྱལ་བའི་བཀྲིན་རྗེས་དྲན་གྱི་མཉམ་གཞས་ཁག་གཉིས་ཀྱིས་མདུན་བསུས་ཏེ་སློབ་གྲྭའི་སློབ་སྤྱི་མིག་དམར་ཚེ་རིང་ལགས་ནས་འགྲེམས་སྟོན་ངོ་སྤྲོད་དང་སྐུ་མགྲོན་རྣམས་ལ་འཚམས་འདྲི་ཞུས་ཡོད། དེ་ནས་སྐུ་མགྲོན་གཙོ་བོ་དབུས་པའི་སྐུ་མགྲོན་རྣམ་པས་སློབ་གྲྭའི་མཆོད་ཁང་གཡས་གཡོན་དུ་ཤིང་སྣ་འདེབས་འཛུགས་དང། འགྲེམས་སྟོན་དུ་༸རྒྱལ་བའི་བཀྲིན་རྗེས་དྲན་ཚོགས་ཚུང་གིས་མགྲོན་འབོད་གནང་བ་བཞིན་སྐུ་མགྲོན་གཙོ་བོ་གཙོས་པའི་སྤུ་རུ་ཝ་ལ་དང་། ས་ཊོན། ལཱ་ཁན་ཝ་ལ་བཅས་ཀྱི་ས་གནས་དང་སི་ལ་ཁུ་ཝི་སློབ་གཉེར་ཁང་གི་ངེས་སྟོན་པ་གཙོས་པའི་སློབ་ཕྲུག་དང་ཧར་པ་པུར་གཏན་སློབ་ཀྱི་སློབ་སྤྱི་དང་སློབ་ཕྲུག་ཁག་གཅིག སྤུ་རུ་ཝ་ལ་སཾ་བྷོ་ཊ་སློབ་གྲྭའི་དགེ་ཆེ་དང་།དགེ་ལས་སློབ་ཕྲུག་མང་དག་ཅིག་མཉམ་ཞུགས་
གནང་ཡོད། དེ་རྗེས་སློབ་གྲྭའི་སློབ་ཕྲུག་ངོས་ནས་གཟིགས་མོ་བ་རྣམས་ལ་འགྲེམས་སྟོན་ཞུས་པའི་བརྗོད་གཞིའི་ཐོག་བློ་ཡིད་ཚིམས་པའི་འགྲེལ་བརྗོད་གནང་། ཐེངས་འདིའི་འགྲེམས་སྟོན་སྐབས་༸གོང་ས་མཆོག་གི་མཛད་རྣམ་དང་། སྐུའི་རླབས་ཆེན་གྱི་མཛད་འཁུར་གསུམ། མགོན་པོ་གང་ཉིད་མཆོག་ལ་འབུལ་ལམ་ཞུས་པའི་ནོ་བེལ་ཞི་བདེའི་གཟེངས་རྟགས་སོགས། དེ་བཞིན་དབྱིན་བོད་གཉིས་ཀྱི་ཐོག་གསུང་ཆོས་བཀའ་དྲིན་བསྐྱངས་པ། ཕྱོགས་མཚུངས་མགོན་པོ་གང་ཉིད་མཆོག་གིས་ལྗགས་རྩོམ་མཛད་པའི་དཔེ་དེབ་ཁག་དང་པར་རིགས་བཅས་འགྲེམས་སྟོན་ཞུས་ཡོད་པ་བཅས།།
