༢༠༡༡ ཟླ་ ༢ ཚེས་ ༡༧ རེས་གཟའ་ཕུར་བུ།
༅༅། །ཕྱི་ལོ་ ༢༠༡༡ ཟླ་ ༢ ཚེས་ ༡༦ ཉིན་བདུན་གཅིག་རིང་འཚོགས་རྒྱུ་བོད་ཀྱི་ཞོ་སྟོན་རྒྱས་པ་ཐེངས་ ༡༦ པ་དེ་ཨོ་རི་ས་ཕུན་ཚོགས་གླིང་གཞིས་ཆགས་ལས་ཁུངས་ཀྱི་ཉེ་འགྲམ་ཐང་ཆེན་དུ་དབུ་འཛུགས་གནང་ཡོད། དེ་ཡང་མཛད་སྒོའི་ཐོག་རྙིང་མའི་བླ་ཆེན་ནམ་མཁའ་དྲི་མེད་རིན་པོ་ཆེ་མཆོག་སྐུ་མགྲོན་གཙོ་བོར་གདན་ཞུས་ལྟར་ཆེད་ཕེབས་གནང་ཡོད་པ་དང། དེ་བཞིན་ས་གནས་འགོ་འཛིན་གྱིས་གཙོས་ལས་ཀྱི་སྣེ་མོ་བ་གཞན་རྣམ་པ། ས་གནས་ཡུལ་མི། ཨོ་རི་ས་གཞིས་ཆགས་ཀྱི་མི་མང་བཅས་ཁྱོན་མི་གྲངས་སྟོང་ཕྲག་མང་པོས་མཉམ་ཞུགས་གནང་ཡོད། མཛད་སྒོའི་ཐོག་མར་བོད་གཞུང་ཟློས་གར་གྱི་འགན་འཛིན་ཤོ་ཟུར་བསོད་ནམས་ཆོས་འཕེལ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་གཞུང་ཟློས་གར་ལ་བཀའ་སློབ་ཕེབས་དོན་ལྟར་རང་རེའི་གནའ་བོའི་ལྷ་མོའི་རིག་གཞུང་བསྐྱར་གསོ་སླད་ཟློས་གར་ཚོགས་པ་ཟུར་འཛུགས་མཛད་པ་བཞིན་ལོ་ལྟར་རྡ་ས་དང་། དེ་བཞིན་བོད་མིའི་གཞིས་ཆགས་ཁག་འདྲ་མིན་གྱི་ནང་བོད་ཀྱི་ཞོ་སྟོན་གོ་སྒྲིག་ཞུས་དང་ཞུ་མུས་ཡིན། ཞེས་སོགས་ཀྱི་གསུང་བཤད་གནང་ཡོད། ཞོ་སྟོན་ནི་རྗེ་ཙོང་ཁ་པའི་དངོས་སློབ་འཇམ་དབྱངས་ཆོས་རྗེས་དཔལ་ལྡན་འབྲས་སྤུངས་དགོན་པ་ཕྱག་བཏབ་པའི་ཞལ་གྲོའི་མཛད་ཆེན་དེ་དབྱར་གནས་བོད་ཟླ་དྲུག་པའི་གནམ་གང་ཉིན་ཉེ་འཁོར་འབྲོག་པ་རྣམས་དཀར་ཆུ་བཟང་ཞིང་རྒྱས་པ་དང། ཞོ་ཁ་དཀར་པོ་ཡིན་པས་རྟེན་འབྲེལ་དུ་བསྒྲིགས་ཏེ་དགེ་འདུན་རྣམས་ལ་ཞོ་ཡི་སྟོན་མོ་འབུལ་སྲོལ་ཡོད་པར་འབྲས་སྤུངས་ཞོ་སྟོན་ཞེས་པ་བྱུང་ཞིང། དེ་ནས་རིམ་པས་༸རྒྱལ་མཆོག་ལྔ་པ་ཆེན་པོའི་སྐབས་ལྷ་གཞུང་འཁྲབ་སྲོལ་དར། ཐེངས་འདིའི་ཞོ་སྟོན་ཐོག་བཙན་བྱོལ་ནང་གི་ལྷ་མོ་ཚོགས་པ་དགུ་ཡོད་པ་ནས་བདུན་མ་གཏོགས་མཉམ་ཞུགས་བྱས་མེད།།
