༢༠༡༡ ཟླ་ ༢ ཚེས་ ༡༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༡ ཟླ་ ༢ ཚེས་ ༡༦ ཉིན་ཨ་རིའི་བོད་གཞུང་སྐུ་ཚབ་དོན་ཁང་གི་ཟུང་དྲུང་ཀུན་དགའ་བཀྲ་ཤིས་ལགས་ཀྱིས་བཏང་གནས་ནང་འཁོད་དོན། ཨ་མི་རི་ཁའི་གྲོང་ཁྱེར་ནིའུ་ཡོཀ་ནང་ཡོད་པའི་ཟླ་སྣང་ཀུན་ཕན་ཐེབས་རྩ་ལྷན་ཚོགས་ནས་ཨ་རི་སྐུ་ཚབ་དོན་གཅོད་ཁང་ལ་འབྲེལ་བ་ཞུས་ཏེ་རྒྱ་གར་ནང་ཡོད་པའི་དགོན་སྡེ་གྲྭ་ཚང་ཁོངས་སུ་ཡོད་པའི་
དགུང་ལོ་དྲུག་ཅུ་བརྒལ་ཞིང་། རྒྱུན་ལྡན་སྐུ་གཟུགས་ཞན་གཅོང་ཡིན་པའི་གྲྭ་བཙུན་ཞལ་གྲངས་ ༣༤༠ ལ་ཟླ་རེར་ཧིན་སྒོར་བརྒྱ་རེ་འཚོ་སྣོན་གྱི་ངོ་བོར་རོགས་རམ་ཞུ་རྒྱུའི་ཐག་གཅོད་གནང་ཡོད། སྐུ་ཚབ་དོན་གཅོད་ཁང་ནས་རང་གཞུང་ཆོས་རིག་ལས་ཁུངས་ལ་འབྲེལ་བ་ཞུས་པ་ལྟར། ཆོས་རིག་ལས་ཁུངས་ནས་རྒྱ་གར་ནང་ཡོད་པའི་ས་དགེ་བཀའ་རྙིང་གཡུང་དྲུང་བོན་དང་བཅས་པའི་ཆོས་ལུགས་རིས་མེད་ཀྱི་དགོན་སྡེ་གྲྭ་ཚང་ཁོངས་སུ་ཡོད་པའི་དགུང་ལོ་དྲུག་ཅུ་བརྒལ་ཞིང་། རྒྱུན་ལྡན་སྐུ་གཟུགས་ཞན་གཅོང་ཡིན་པའི་གྲྭ་བཙུན་ཞལ་གྲངས་ ༣༤༠ གི་མཚན་ཐོ་གནང་འབྱོར་བྱུང་བ་དང་། ཟླ་སྣང་ཀུན་ཕན་ཐེབས་རྩ་ལྷན་ཚོགས་ནས་ཕྱི་ཟླ་ ༥ ནས་འགོ་འཛུགས་ཏེ་ཟླ་དྲུག་གི་འཚོ་སྣོན་དངུལ་འབོར་ཐེངས་དང་པོ་སྐུ་ཚབ་དོན་གཅོད་ཁང་བརྒྱུད་ཆོས་རིག་ལས་ཁུངས་སུ་ཕུལ་ཟིན་ཡོད། ཟླ་སྣང་ཀུན་ཕན་ཐེབས་རྩ་ལྷན་ཚོགས་ནི་གནས་ནང་བླ་མ་ཚེ་དབང་ལགས་ནས་ཕྱི་ལོ་ ༢༠༠༢ ལོར་ཨ་རིའི་གྲོང་ཁྱེར་ནིའུ་ཡོཀ་ནང་ཁྲིམས་མཐུན་དེབ་སྐྱེལ་བྱས་པའི་ཁེ་གཉེར་ངོ་བོ་མེད་པའི་ཚོགས་སྡེ་ཞིག་ཡིན་ཞིང་། རིག་གཞུང་སྲུང་སྐྱོབ་དང་། སྐྱ་སེར་སློབ་གསོ། འཕྲོད་བསྟེན་སྨན་བཅོས། དབུལ་སྐྱོབ། སྦྱིན་གཏོང་བཅས་ནི་ལྷན་ཚོགས་དེའི་དམིགས་ཡུལ་གཙོ་བོ་ཡིན་པ་རེད། ལྷན་ཚོགས་ཀྱི་ད་ལྟའི་འགན་འཛིན་ནི་གནས་ནང་བླ་མ་ཚེ་དབང་ལགས་ཡིན་པ་དང་། ཁོང་ནི་དུས་རྒྱུན་ནས་སྐུ་ཚབ་དོན་གཅོད་ཁང་གི་བྱེད་སྒོ་ཁག་ལ་རྒྱབ་སྐྱོར་གནང་མཁན་ཞིག་ཡིན་ལ། གཞུང་འབྲེལ་མ་ཡིན་པའི་ཚོགས་སྐྱིད་ཁག་གཅིག་ལ་ཡང་གང་ཐུབ་རོགས་རམ་གནང་མཁན་ཞིག་ཡིན་འདུག་པ་བཅས། །
