ཕྱི་ལོ་ ༢༠༡༨ ཟླ་ ༥ ཚེས་ ༤ རེས་གཟའ་པ་སངས།

༄༅། །ཕྱི་ལོ་ ༢༠༡༨ ཟླ་ ༥ ཚེས་ ༣ ཉིན་རྒྱ་གར་རྒྱལ་ཡོངས་གློག་བརྙན་གཟེངས་རྟགས་ཐེངས་ ༦༥ པའི་མཛད་སྒོ་དེ་བཞིན་རྒྱ་གར་གྱི་རྒྱལ་ས་ལྡི་ལིར་ཚོགས་ཡོད་པ་དང་། མཛད་སྒོའི་ཐོག་བོད་རིགས་བསྟན་འཛིན་དཀོན་མཆོག་ཟེར་བ་ཞིག་ལ་གློག་བརྙན་ཆེད་སྒྲིག་རྩེ་ཕུད་ཀྱི་གཟེངས་རྟགས་ཐོབ་འདུག

དེ་ཡང་གསར་འགྱུར་བརྒྱུད་ལམ་ཁག་གཅིག་གི་ནང་གནས་ཚུལ་ཐོན་གསལ་ལྟར་ན། བསྟན་འཛིན་དཀོན་མཆོག་ལགས་དང་ཁོང་གི་ཕྱག་རོགས་རྒྱ་གར་བ་མོན་གྷ་ Sanjiv Monga ལགས་རྣམ་གཉིས་ནས་ཆེད་སྒྲིག་གནང་བའི་གློག་བརྙན་གྱི་མིང་ལ་བོད་སྐད་དུ་འདས་མཆོད་ Mrityobhoj: The Death Feast ཟེར་ཞིང་། རྒྱལ་ཡོངས་གློག་བརྙན་གྱི་གཟེངས་རྟགས་ཐེངས་ ༦༥ པའི་མཛད་སྒོའི་ཐོག་རྒྱ་གར་དབུས་གཞུང་གི་གསར་འགྱུར་བརྒྱུད་ལམ་དང་རྒྱང་བསྲིང་ལས་ཁུངས་ཀྱི་བློན་ཆེན་སི་མྲི་ཏི་ཨི་རཱ་ནི་ Shmt Smriti Irani, Union minister of Information and Broadcasting མཆོག་གིས་བསྟན་འཛིན་དཀོན་མཆོག་ལགས་ལ་གློག་བརྙན་ཆེད་སྒྲིག་རྩེ་ཕུད་ཀྱི་གཟེངས་རྟགས་དེ་གནང་འདུག

གློག་བརྙན་སྒྲིག་པ་པོ་བསྟན་འཛིན་དཀོན་མཆོག་ལགས་ནི། རྡ་སྟེང་བོད་ཁྱིམ་སློབ་གྲྭ་ནས་སློབ་སྦྱོང་གནང་རྗེས་རྒྱ་གར་གྱི་རྒྱལ་ས་ལྡི་ལིར་ཡོད་པའི་ལྡི་ལི་སྒྱུས་རྩལ་དང་ཚོང་ལས་མཐོ་སློབ་ Delhi College of Arts & Commerce ཏུ་སློབ་སྦྱོང་གནང་།
སློབ་མཐར་ཕྱིན་རྗེས་བྷི་བྷི་སེ་གསར་འགྱུར་བརྒྱུད་ལམ་ BBC Media Action དང་། རྒྱ་གར་གྱི་ཨན་ཌེ་བརྙན་འཕྲིན་ལས་ཁུངས་ NDTV བཅས་ནས་ཕྱག་ལས་གནང་འདུག་པ་མ་ཟད། བསྟན་འཛིན་དཀོན་མཆོག་ལགས་ནས་ཁོང་སྒེར་གྱི་གློག་བརྙན་ཕྱོགས་སྒྲིག་ཁང་ཞིག་ཀྱང་གསར་འཛུགས་གནང་ཡོད་པ་བཅས། །