༢༠༡༨ ཟླ་ ༤ ཚེས་ ༡༨ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ནས་ཕྱི་ལོ་ ༢༠༡༨ ཟླ་ ༤ ཚེས་ ༩ ནས་ ༡༨ བར་ཉིན་གྲངས་བརྒྱད་རིང་ས་ལུ་སྒ་རར་རྟེན་གཞི་བྱས་པའི་སྲས་རྒྱུད་གྲྭ་ཚང་དུ་རྒྱ་གར་བྱང་ཤར་དང་། བལ་ཡུལ་ཁུལ་གྱི་སྨན་ཞབས་པ་དང་། འཕྲོད་ལས་པ་ཁྱོན་མི་གྲངས་ ༡༩ ལ་མཉམ་བསྡུས་ལྟ་རྟོག་དང་གོ་རྟོགས་ཐུབ་པའི་སྤྱི་ཚོགས་ཀྱི་འཕྲོད་བསྟེན་ཁྱབ་ཚད་དང་། འཕྲུལ་ཆས་ཊེབ་ལེཌ་ནང་འཕྲོད་བསྟེན་གྲངས་ཐོ་འཇོག་སྟངས་སྐོར་གྱི་ཟབ་སྦྱོང་གནང་འདུག
དེ་ཡང་འཕྲོད་བསྟེན་ལས་ཁུངས་ཀྱི་འབྲེལ་ཡོད་ལས་བྱེད་སྨན་པ་བློ་བཟང་ཚེ་རིང་ལགས་ཀྱིས་ཕྱི་ཚེས་ ༩ ཉིན་ནས་ཉིན་གྲངས་བཞི་རིང་མཉམ་བསྡུས་ལྟ་རྟོག་དང་གོ་རྟོགས་ཐུབ་པའི་སྤྱི་ཚོགས་ཀྱི་འཕྲོད་བསྟེན་ཁྱབ་ཚད་ཐོག་དང་། ཉིན་གྲངས་གཉིས་རིང་གློ་གཅོང་ནད་གཞི་ TB སྔོན་འགོག་དང་འབྲེལ་བའི་ལས་གཞིའི་ཟབ་ཁྲིད་གནང་ཡོད།
ཕྱོགས་མཚུངས་ར་ཞི་བྷན་ཏ་ Ms. Rashi Banta ལགས་ཀྱི་སྣེ་འཁྲིད་པའི་མི་སྣ་གསུམ་གྱིས་ཨན་ཌི་རོ་ཡི་ཌ་མཉེན་ཆས་ནང་ Android based DHIS2 software འཕྲོད་བསྟེན་གྲངས་ཐོ་འཇོག་སྟངས་སྐོར་ཉིན་གྲངས་གཉིས་རིང་སྦྱོང་བརྡར་སྤྲད་གནང་ཡོད།
ཟབ་སྦྱོང་གི་དགོས་པ་དང་དམིགས་ཡུལ་གཙོ་བོ་ནི། བཙོན་བྱོལ་བོད་མིའི་སྤྱི་ཚོགས་ཁྲོད་འཕྲོད་བསྟེན་དང་ནད་གཞི་སྔོན་འགོག་སྐོར་གོ་རྟོགས་གོང་མཐོར་སྤེལ་ཆེད་དང་། འཕྲོད་བསྟེན་ལས་ཁུངས་ཀྱིས་འབྲེལ་ཡོད་མི་སྣ་ཆེད་གཏོང་གནང་སྟེ་བོད་མིའི་གཞིས་ཆགས་ཁག་གིས་གཙོས་བོད་མི་གནས་སྡོད་ཁྱོན་ཡོངས་ལ་འཕྲོད་བསྟེན་ཡར་རྒྱས་ལས་གཞི་དང་འབྲེལ་བའི་སྐོར་ཟབ་སྦྱོང་སྤྲད་དང་སྤྲོད་མུས་ཡིན་པ་བཅས། །
