ཕྱི་ལོ་ ༢༠༡༨ ཟླ་ ༢ ཚེས་ ༢ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག་རྒྱ་གར་བྱང་ཤར་ཨ་རུ་ནཱ་ཅལ་མངའ་སྡེའི་ཁྱབ་ཁོངས་ཊུ་ཊིང་ཁུལ་གྱི་མཐའ་མཚམས་དང་དཀའ་ངལ་ཆེ་བའི་བོད་མིའི་ཁ་ཐོར་གཞིས་ཆགས་ཁག་ལ་འཚམས་གཟིགས་ཐེངས་དང་པོ་ལེགས་གྲུབ་བྱུང་འདུག

དེ་ཡང་བཀའ་བློན་མཆོག་དང་ལྷན་ནང་སྲིད་དྲུང་ཆེ་འཆི་མེད་རིག་འཛིན་ལགས་ཀྱང་བཅར་གནང་ཡོད་པ་དང་། ཁོང་རྣམ་གཉིས་ཀྱིས་ཁྱོན་བདུན་ཕྲག་གཉིས་རིང་ཀྲུ་ཀྲིང་བོད་མིའི་གཞིས་ཆགས་དང་། མེའོ་ཆོས་འཕེལ་གླིང་། ཏེ་ཛུ་དར་རྒྱས་གླིང་བཅས་སུ་འཚམས་གཟིགས་གནང་འདུག

ལྷག་པར་བཀའ་བློན་མཆོག་གིས་ཕྱི་ཚེས་ ༡༩ ནས་ ༢༥ བར་ཀྲུ་ཀྲིང་ཁུལ་གྱི་ཁ་ཐོར་བོད་མིའི་གཞིས་ཆགས་ ༡༧ ཡོད་པའི་ཁོངས་ནས་ས་གནས་ཁག་ ༡༥ ཡི་བོད་མི་རྣམས་དང་ཐུག་འཕྲད་གནང་སྟེ་ས་གནས་ཀྱི་དགོས་མཁོར་གཞིག་ཏེ་དམིགས་བསལ་ལས་གཞི་ཡར་གཏོང་དགོས་ཇི་ཡོད་ཐད་རྟོག་ཞིབ་གནང་འདུག

ཁ་ཐོར་གཞིས་ཆགས་ཁག་གི་བོད་མི་དང་ཐུག་འཕྲད་སྐབས། སོ་ནམ་པ་ཚོར་ཞིང་ལས་ཆེད་ཆུ་ཡུར་དང་ཞིང་ཁ་གསར་བཟོ་མཚོན་པའི་སྐྱེལ་འདྲེན་ཕྲུལ་འཁོར་ power tillers and tractors སོགས་དགོས་ངེས་ཅན་ཡིན་པ་དང་། གཞིས་ཆགས་སུ་མི་ཚང་ཁ་ཤས་ད་ལྟ་ཡིན་ནའང་སྨྱུག་མའི་ཁང་པའི་ནང་སྡོད་ཀྱི་ཡོད་སྟབས། དེ་དག་བཟོ་བཅོས་དགོས་པ། དེ་བཞིན་ས་གནས་འགོ་འཛིན་ལས་ཁུངས་དང་ལས་ཤག སྨན་ཁང་བཅས་གསར་རྒྱག་དགོས་ཀྱི་ཡོད་པ་གཟིགས་ཚུལ་བྱུང་འདུག མ་འོངས་པར་སོ་ནམ་པ་ཚོས་ས་གནས་གཞིས་ཆགས་ཁག་ཏུ་ཀཀོ་ལ་  cardamom སོགས་འདེབས་ལས་བྱ་འཆར་ཡོད་འདུག   སྤྱིར་ཁ་ཐོར་ས་གནས་སུ་ཁྱིམ་ཚང་ ༢༠༤ དང་མི་འབོར་ ༡༠༦༣ ཡོད་འདུག

རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་ཁྱབ་ཁོངས་སུ་འཚམས་གཟིགས་ལེགས་གྲུབ་རྗེས་ཀ་རྡོར་སྒང་གསུམ། ར་སྦང་ལ་ཀུན་ཕན་གླིང༌། སུ་ནྭ་ཌ། ས་ལུ་སྒར་བཅས་སུ་འཚམས་གཟིགས་ཕེབས་གནང་རྒྱུ་ཡིན་འདུག་པ་བཅས།།