༢༠༡༨ ཟླ་ ༢ ཚེས་ ༡ རེས་གཟའ་ཕུར་བུ།
༄༅། །རྒྱ་ནག་གཞུང་གིས་གསེར་རྟ་བླ་རུང་སྒར་གྱི་གྲྭ་ཤག་གཏོར་བཤིག་དང་གྲྭ་བཙུན་ཕྱིར་ཕུད་བཏང་བའི་ལས་རིམ་ཡོངས་རྫོགས་ཚར་རྗེས་མ་འོངས་དགོན་པའི་འཛིན་སྐྱོང་དང་བདེ་འཇགས། དེ་བཞིན་དཔལ་འབྱོར་དང་། ལྷག་པར་དགོན་པའི་ནང་སློབ་ཞུགས་དང་སློབ་ཁྲིད་གནང་ཕྱོགས་ཐད་ལ་དེ་སྔ་བྱུང་མྱོང་མེད་པའི་སྲིད་བྱུས་གསར་པ་ཞིག་ལག་བསྟར་བྱེད་ཆེད་དམར་ཤོག་ཚོགས་པའི་ལས་བྱེད་ ༢༠༠ ཙམ་བསྐོ་འཛུགས་བྱ་རྒྱུའི་གནས་ཚུལ་ཕྱིར་གྱར་བྱུང་བ་དང་།
དེ་ཡང་གོང་གི་གནས་ཚུལ་དེ་དག་ཁ་གསལ་འཁོད་པའི་རྒྱ་ནག་གཞུང་འབྲེལ་ཡིག་ཆ་ཞིག་ཕྱི་ལོ་ ༢༠༡༨ ཟླ་ ༡ ཚེས་ ༢༤ ཉིན་ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པར་ལག་སོན་བྱུང་འདུག
གནད་དོན་དེ་དང་འབྲེལ་ཁ་ཉིན་ཨ་རིའི་གྲོས་ཚོགས་ཀྱི་ Tom Lantos འགྲོ་བ་མིའི་ཐོབ་ཐང་ཚོགས་ཆུང་གི་ཚོགས་གཙོ་མང་གཙོ་ཚོགས་པའི་གྲོས་ཚོགས་འཐུས་མི་རྒན་གྲས་སྐུ་ཞབས་ ཇིམ་མེག་གྷོ་ཝན་ Jim McGovern མཆོག་གིས་གྲོས་ཚོགས་ཀྱི་ལས་རིམ་ཐོག་གླེང་སློང་ཤུགས་ཆེ་དང་སྦྲགས། རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་ལ་མཐའ་གཅིག་ཏུ་ངོ་རྒོལ་གནང་བ་མ་ཟད། ཐེངས་འདིར་རྒྱ་ནག་དམར་ཤོག་ཚོགས་པའི་ལས་བྱེད་ ༢༠༠ ཆེད་མངགས་བསྐོ་འཛུགས་བྱས་པ་བརྒྱུད་བོད་མིའི་ཆོད་དད་རང་དབང་ཐོག་དམ་བསྒྲགས་དང་བཏང་འཛིན་བྱེད་ཤུགས་ཆེ་རུ་བཏང་བ་དེ་ནི་རྒྱ་ནག་ཙམ་མ་ཟད། བོད་ནང་གི་བོད་མིའི་ཆོས་དད་རང་དབང་གི་གནས་སྟངས་ཇེ་ཞན་ཇེ་སྡུག་ཏུ་གཏང་རྒྱུའི་རྣམ་འགྱུར་ཞིག་ཡིན་སྐོར་གསུངས།
ཐེངས་འདིར་རྒྱ་ནག་གཞུང་གི་དམ་བསྒྲགས་ཅན་གྱི་སྲིད་བྱུས་འདི་ལྟ་བུ་བརྒྱུད་གསེར་རྟ་བླ་རུང་སྒར་གྱིས་གཙོས་བོད་ཀྱི་དགོན་སྡེ་ཁག་གཏོར་བཤིག་དང་། བོད་མིའི་ཆོས་དད་རང་དབང་ལ་དམ་བསྒྲགས་སྔར་ལས་ལྷག་བྱེད་བཞིན་པར་བརྟེན་ཨ་རིའི་སྲིད་འཛིན་སྐུ་ཞབས་ཌོ་ནལ་ཊམ་མཆོག་གིས་རང་ཉིད་ཀྱི་བཞེངས་ཕྱོགས་ངེས་གཏན་ཞིག་དང་། དེ་འབྲེལ་གླེང་སློང་མ་གནང་བ་ཡིན་ན་ཨ་རིའི་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་རྣམས་ནས་རྒྱ་ནག་གཞུང་གི་བྱ་སྤྱོད་དེ་དག་གི་མཇུག་འབྲས་གང་ཡོང་ཐོག་གླེང་སློང་གནང་དགོས་པའི་སྐོར་གསུངས་ཡོད།།
