༢༠༡༡ ཟླ་ ༡ ཚེས་ ༢༩ རེས་གཟའ་སྤེན་པ།
༄༅། །ཕྱི་ལོ་ ༢༠༡༡ ཟླ་ ༡ ཚེས་ ༢༧ ཉིན་རྒྱབ་བཀའ་ཁྲི་ཟམ་གདོང་རིན་པོ་ཆེ་མཆོག་གིིས་ཧུན་སུར་རབ་རྒྱལ་གླིང་གི་ཚོགས་ཁང་ནང་སེར་སྐྱ་མི་མང་སྟོང་ཕྲག་བརྒལ་བར་རང་ཐག་རང་གཅོད་ཀྱིས་སྒོ་ནས་བཀའ་སྤྱི་གཉིས་ཀྱི་འོས་འཕེན་དགོས་པའི་སྐོར་ལ་ལམ་སྟོན་གསུང་བཤད་གནང་དོན། ངས་འགོ་ཁྲིད་པའི་བཀའ་ཤག་གི་ལས་རྒྱུན་རིང་ལ་རྒྱ་ཆེའི་མི་མང་རྣམ་པས་ཁ་ཞེ་གཉིས་མེད་དང་ལྷག་བསམ་རྣམ་དག་ཐོག་ནས་རྒྱབ་སྐྱོར་དང་མོས་མཐུན་གནང་བར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་བཀའ་ཤག་གི་ལས་དོན་ཐོག་དགག་ཆ་གནང་མཁན་རྣམས་ནས་དགག་ཆ་གནང་རྐྱེན་ལེགས་བཅོས་དང་གསལ་བཤད་བྱེད་རྒྱུའི་གོ་སྐབས་བྱུང་བར་བརྟེན་ཕན་ཐོགས་བྱུང་ཡོད། ཡང་མཐའ་གཅིག་ཏུ་རྒྱབ་སྐྱོར་གནང་མཁན་ཚོས་རྒྱབ་སྐྱོར་གནང་ཡོད་སྟབས། བཀའ་ཤག་གི་ལས་དོན་ལམ་ལྷོང་བྱུང་བར་བརྟེན། ངས་ཕྱོགས་གཉིས་ཀར་ཐུགས་རྗེ་ཆེ་ཞུ་རྒྱུ་ཡིན། དེ་མིན་བར་གནས་སུ་སྡོད་མཁན་ཡོད་ཚེ་མང་གཙོའི་སྤྱི་ཚོགས་ཀྱི་འགན་ཁུར་ཡོད་པའི་ཐོག་ནས་རྗེས་སུ་ཕེབས་རྒྱུའི་བཀའ་ཁྲི་དང་བཀའ་ཤག་གི་ལས་དོན་ཐོག་ལ་ཐུགས་སྣང་དང་རྒྱབ་སྐྱོར། དེ་བཞིན་དགག་ཆ་གང་གནང་ཡང་གཞུང་གི་ལས་དོན་ཚགས་ཚུད་ཡར་རྒྱས་འགྲོ་རྒྱུ་ནི་ཧ་ཅང་གལ་ཆེན་པོ་ཡིན། ཕྱོགས་མཚུངས་ཕྱི་ལོ་ ༢༠༠༡ ནས་བཟུང་ད་ལྟ་བར་དུ་ངས་བཀའ་ཤག་གི་འགོ་ཁྲིད་བྱས་པའི་རིང་ལ་རྒྱ་ཆེའི་མི་མང་རྣམ་པས་ཁ་ཞེ་གཉིས་མེད་དང་ལྷག་བསམ་རྣམ་དག་ཐོག་ནས་རྒྱབ་སྐྱོར་དང་མོས་མཐུན་གནང་བ་བཞིན། མ་འོངས་པར་ཇི་སྲིད་བོད་དོན་བདེན་མཐའ་མ་གསལ་བར་དུ་བཀའ་བློན་ཁྲི་པ་དང་བཀའ་ཤག་རིམ་བྱོན་སུ་ཞིག་བསླེབ་ཀྱང་མང་ཚོགས་ཀྱི་ངོས་ནས་རྒྱབ་སྐྱོར་དང་མཐུན་འགྱུར་རྣམས་ཉམས་མེད་གནས་ཐུབ་པ་གནང་རོགས་ཞེས་དེ་རིང་གི་གོ་སྐབས་འདི་བཟུང་ནས་འབོད་སྐུལ་ཞུ་རྒྱུ་ཡིན། ཕྱི་ལོ་ ༢༠༡༠ དང་ ༢༠༡༡ གཉིས་ཀྱི་བཀའ་སྤྱིའི་འོས་འདེམས་ལ་མི་མང་ནས་སྔར་དང་མི་འདྲ་བའི་ཆ་ཤས་རྒྱ་ཆེ་བླངས་པར་རྗེས་སུ་ཡི་རང་ཞུ་རྒྱུ་དང་ཆབས་ཅིག་མ་འོངས་པར་ཡང་རང་གི་རྣམ་དཔྱོད་བེད་སྤྱད་དེ་ལེགས་ཉེས་གང་མཐོང་བ་དེ་གཞན་གྱིས་གནོན་ཤུགས་དབང་དུ་མ་སོང་བར་འོས་ཤོག་བླུག་རྒྱུ་དེ་ཧ་ཅང་གལ་ཆེན་པོ་ཡིན། གང་ལ་ཞེ་ན། དེ་ནི་བོད་སྤྱི་པའི་རྩ་དོན་གྱི་གནད་འགག་ཅིག་ལ་ཐུག་གི་ཡོད་པར་བརྟེན། སྟབས་བདེ་པོ་ཞིག་དང་ལས་སླ་པོ་མིན་པའི་ཐོག་ནས་ཚང་མས་གཟབ་ནན་བྱེད་དགོས་པ་ཞིག་ཡིན་ཞེས་སོགས་ཀྱི་གསུང་བཤད་གནང་།  དེ་བཞིན་མང་ཚོགས་ཀྱི་དྲི་བར་ལན་འདེབས་ཀྱང་གནང་ཡོད་པ་བཅས། །