༢༠༡༡ ཟླ་ ༡ ཚེས་ ༢༡ རེས་གཟའ་པ་སངས།
༅༅། །སྐབས་བཅུ་བཞི་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པའི་གྲོས་ཆོད་ཨང་ ༢༠༡༠།༡༤།༩།༤ དགོངས་དོན། བོད་གཞུང་མང་རྒྱལ་ཡོངས་ཚོགས་ཆེན་ཐེངས་དང་པོ་ ༢༠༡༠ ལྷོ་ཕྱོགས་སྦེལ་ཀོབ་བོད་མིའི་གཞིས་ཆགས་སུ་ཕྱི་ལོ་ ༢༠༡༠ ཟླ་ ༨ ཚེས་ ༢༦ ནས་ཚེས་ ༣༡ བར་བསྐོང་འཚོགས་གནང་བའི་མཐའ་དོན་བསམ་འཆར་ཕྱོགས་བསྡོམས་སྙན་ཐོའི་དོན་ཚན་རྣམས་སྤྱི་འཐུས་རྒྱུན་ལས་ཀྱིས་དབྱེ་གསེས་གནང་སྟེ་འབྲེལ་ཆགས་ཁུངས་སོ་སོར་འབུལ་གཏོང་བྱ་རྒྱུ་དང། འབྲེལ་ཆགས་ཁུངས་སོ་སོས་ལག་བསྟར་ཐུབ་པ་ཁག་དང། ལག་བསྟར་མ་ཐུབ་པ་རྣམས་ལ་མ་ཐུབ་པའི་རྒྱུ་མཚན་གསལ་བཤད་དགོས་རྒྱུ་ཞེས་སྐབས་ ༡༤ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པའི་ཐོག་གཞུང་འབྲེལ་གྲོས་ཆོད་ཨང་ ༢༠༡༠།༡༤།༡༠།༤ འཁོད་པ་སྣོལ་འཇོག་གནང་དོན་ལྟར་སྤྱི་འཐུས་ལྷན་ཁང་དང་འབྲེལ་ཆགས་སྙན་ཐོའི་དོན་ཚན་རྣམས་ལག་བསྟར་བྱེད་ཕྱོགས་སོགས་ཕྱི་ལོ་ ༢༠༡༠ ཟླ་ ༡༢ ཚེས་ ༡༦།༡༧།༡༨ བཅས་སོ་སོར་སྤྱི་འཐུས་རྒྱུན་ལས་ལྷན་ཚོགས་གནང་སྟེ་བཀའ་བསྡུར་ཞིབ་ལྷུག་གནང་སྟེ་ལག་བསྟར་གནང་ཕྱོགས་ཐག་གཅོད་གཏན་འཁེལ་གནང་ཟིན་ཅིང། དེའི་ཁོངས་ནས་ཆབ་སྲིད་དང་འབྲེལ་བའི་སྐོར་དོན་ཚན་ ༥ དང། གཞིས་ཆགས་སྲ་བརྟན་སྐོར་དོན་ཚན་ ༤ དཔལ་འབྱོར་སྐོར་དོན་ཚན་ ༡ ཤེས་ཡོན་སྐོར་དོན་ཚན་ ༡ བོད་དོན་དྲིལ་བསྒྲགས་སྐོར་དོན་ཚན་ ༡ བཅས་དོན་ཚན་གྲངས་ ༡༢ ཐད་བཀའ་སྤྱི་ལྷན་རྒྱས་ཐོག་བཀའ་བསྡུར་གནང་གལ་དགོངས་འཐུན་ཐག་གཅོད་བྱུང་དོན་བཞིན་ཕྱི་ལོ་ ༢༠༡༡ ཟླ་ ༡ ཚེས་ ༡༥ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་རྒྱ་རི་སྒྲོལ་མ་མཆོག་དབུ་བཞུགས་ཐོག་བཀའ་བློན་ཁྲི་པ་ཟམ་གདོང་བློ་བཟང་བསྟན་འཛིན་མཆོག་དང། ཆོས་རིག་དང། དཔལ་འབྱོར། ཤེས་རིག ཕྱི་དྲིལ། འཕྲོད་བསྟེན་བཅས་ཀྱི་བཀའ་བློན་རྣམ་པ་དང། སྤྱི་འཐུས་རྒྱུན་ལས་རྣམ་པ་བཅས་ལྷན་འཛོམས་ཀྱིས་བཀའ་བསྡུར་ཞིབ་ཙམ་གནང་སྟེ་ཕྱག་ལེན་གནང་ཕྱོགས་སྐོར་ཐག་གཅོད་གཏན་འཁེལ་གནང་ཡོད་པ་བཅས།།