༢༠༡༧ ཟླ་ ༡༢ ཚེས་ ༢༢ རེས་གཟའ་པ་སངས།

༄༅། །ཕྱི་ལོ་༢༠༡༧ ཟླ་༡༢ ཚེས་༢༢ རེས་གཟའ་པ་སངས་ཉིན་གྱི་སྔ་དྲོ་ ༡༡ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་ལྷོ་ཕྱོགས་སྦེལ་ཀོབ་གཞིས་ཆགས་སུ་རྟེན་གཞི་བྱས་པའི་སྔ་འགྱུར་རྙིང་མའི་བཤད་གྲྭ་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དང་བཙུན་དགོན་མཚོ་རྒྱལ་བཤད་སྒྲུབ་ཐོས་བསམ་དགའ་བའི་ཚལ་གྱི་བསླབ་པ་མཐར་སོན་མཛད་སྒོའི་གཙོ་མགོན་དུ་ཆིབས་སྒྱུར་བཀའ་དྲིན་བསྐྱངས། 

དེ་ཡང་ཐོག་མར་དགོན་པའི་དབུ་འཛིན་མཁན་སྤྲུལ་གྱང་ཁང་རིན་པོ་ཆེ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་སྐུ་མགྲོན་རྣམས་ལ་འཚམས་འདྲི་དང་མཛད་སྒོ་ངོ་སྤྲོད་ཀྱི་གསུང་བཤད་གནང་།  དེ་རྗེས་དྲུང་ཆེ་སློབ་དཔོན་ཨུ་རྒྱན་བསྟན་འཛིན་ནས་བསླབ་མཐར་སོན་པ་རྣམས་ཀྱི་མཚན་ཐོ་སྙན་སྒྲོན་ཞུས་པ་དང་འབྲེལ་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱག་འཁྱེར་གསོལ་བསྩལ་བཀའ་དྲིན་བསྐྱངས།

སློབ་དཔོན་རྣམས་ནས་ཀྱང་༸རྒྱལ་བའི་༸སྐུ་མདུན་དུ་བསྟན་འགྲོ་སྤྱི་དང་བྱེ་བྲག་ཀྱི་བདེ་ཐབས་ཁོ་ནའི་སླད་ལྷག་བསམ་རྣམ་དག་ཐོག་ནས་ཞབས་ཞུ་གནད་སྨིན་ཞུ་རྒྱུའི་དམ་བཅའ་ཕུལ།  དེ་རྗེས་རྒྱ་གར་ས་གནས་ཉེན་རྟོག་འགོ་དཔོན་སྐུ་ཞབས་  Vipul Kumar  ལགས་ཀྱིས་གསུང་བཤད་གནང་།

དེ་རྗེས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་གསུང་བཤད་གནང་དོན་།  བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མ་ཆོག་ལ་གུས་ཕྱག་དང་སྦྲགས། དགའ་ལྡན་ཁྲི་རིན་པོ་ཆེ་མཆོག་དང་། རྣམ་གྲོལ་གླིང་གི་འཇམ་མགོན་སྤྲུལ་སྐུས་དབུས་སྐྱབས་གནས་དགེ་འདུན་གྱི་སྡེ།  ཐོག་མར་བཀའ་ཤག་གི་ཚབ་ཞུས་ཏེ་འཚམས་འདྲི་ཞུ་བ་དང་སྦྲགས།  དེ་རིང་སྔ་འགྱུར་མཐོ་སློབ་ནས་བསླབ་པ་མཐར་སོན་པའི་སློབ་མ་རྣམས་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་ནས་དམིགས་བསལ་རྩ་ཆེའི་ཕྱག་འཁྱེར་ཐོབ་པར་བརྟེན་ངས་སློབ་དཔོན་རྣམས་ལ་འཚམས་འདྲི་ཞུ་རྒྱུ་དང་།  མ་འོངས་པར་སློབ་དཔོན་རྣམས་ཀྱིས་འཛམ་གླིང་སྤྱི་ཡོངས་ལ་བོད་བརྒྱུད་ནང་བསྟན་དར་སྤེལ་བརྒྱུད་འཛམ་གླིང་ཞི་བདེ་བསྐྲུན་ཐུབ་པའི་རེ་བ་དང་སྨོན་འདུན་ཞུ་རྒྱུ་ཡིན།

རྣམ་གྲོལ་གླིང་གི་བླ་སྤྲུལ་རྣམ་པ་དང་། ལས་བྱེད་རྣམས་ཀྱིས་ཐོག་མར་༸སྐྱབས་རྗེ་པད་ནོར་རིན་པོ་ཆེ་མཆོག་གི་འཆར་སྣང་ལྟར་ད་དུང་ཡང་འཛིན་སྐྱོང་སྟངས་འཛིན་དང་གང་ཅིའི་ཐད་མུ་མཐུད་ཡག་པོ་གནས་ཐུབ་པར་བཀའ་ཤག་ནས་ངོས་འཛིན་དང་བསྔགས་བརྗོད་ཞུ་རྒྱུ་ཡིན། 

ལོ་རྒྱུས་ཐོག་ནས་གཟིགས་ན་དགོན་ཆེན་རྣམ་གྲོལ་གླིང་བརྒྱུད་ནས་བོད་ས་ཡོངས་ལ་བསྟན་པ་འཕེལ་ཐུབ་པ་བྱུང་ཡོད། བོད་ས་ཤོོར་རྗེས་བཙན་བྱོལ་དུ་སླེབ་པའི་སྐབས་ཕྱི་ལོ་ ༡༩༥༦ ལོར་ཀ་ན་ཊ་མངའ་སྡེའི་སྤྱི་ཁྱབ་བློན་ཆེན་ Chief Minister S. Nijalingappa མཆོག་དང་འབྲེལ་བ་བྱུང་ནས་དམ་པ་ཁོང་ནི་༸གོང་ས་མཆོག་ལ་བརྩི་བཀུར་ཆེན་པོ་ཞུ་མཁན་ཞིག་དང་། བོད་དོན་ཐོག་རྒྱབ་སྐྱོར་ཤུགས་ཆེ་གནང་མཁན་ཞིག་ཀྱང་ཡིན་འདུག དེར་བརྟེན་མངའ་སྡེའི་འདིའི་ནང་བོད་མི་བཙན་བྱོལ་བ་རྣམས་ལ་ས་ཆ་ཕོན་ཆེན་པོ་ཞིག་གནང་ཡོད།  ད་ལྟའི་ཆར་ཀ་ན་ཊ་མངའ་སྡེའི་ཡོངས་ལ་ Golden Temple ཞེས་ས་གནས་འདིར་ཡོངས་གྲགས་ངོས་འཛིན་ཆེན་པོ་ཞུ་བཞིན་ཡོད། དུས་རྒྱུན་དུ་༸གོང་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་བ་ལྟར་ཕྱིའི་དངོས་པོ་ལས་ནང་གི་དོན་སྙིང་གལ་ཆེ་བར་བརྩི་དགོས་པའི་བཀའ་སློབ་ལམ་སྟོན་ཕེབས་པ་ལྟར་དགོན་འདིར་ཡང་གཙོ་བོ་བསླབ་པ་སློབ་གཉེར་ཐོག་ཤུགས་རྒྱག་རྒྱུ་ཤིན་ཏུ་གལ་ཆེན་པོ་ཡིན། ཞེས་སོགས་ཀྱི་གསུང་བཤད།།