ཕྱི་ལོ་ ༢༠༡༧ ཟླ་ ༡༡ ཚེས་ ༢༩ རེས་གཟའ་ལྷག་པ།
སྐུ་པར། དགའ་ལྡན་ཕོ་བྲང་།
༄༅། །༸རྒྱལ་བ་རིན་པོ་ཆེའི་༸སྐུའི་རླབས་ཆེན་གྱི་མཛད་ཁུར་མཐའ་ཡས་པ་ལས་གཙོ་བོ་བཞི་སྟེ། འགྲོ་བ་མིའི་གཤིས་རྒྱུད་དང་འབྲེལ་བའི་བྱམས་པ་དང་བརྩེ་བ། བཟོད་སྲན། ཆོག་ཤེས་སོགས་བཟང་པོའི་རིན་ཐང་གོང་འཕེལ་དང་། ཆོས་ལུགས་ནང་ཕན་ཚུན་གུས་རྩི་དང་འཆམ་མཐུན་བསྐྲུན་དགོས་པ། བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དགོས་པ་དང་ཉམས་པ་གསོར་ཆུད། ཁོར་ཡུག་སྲུང་སྐྱོབ་བཅས་དེ་སྔར་མཛད་ཁུར་དེ་གསུམ་ཡིན་པ་ཕྱོགས་གཏོགས་གང་སར་བཀའ་སློབ་བསྩལ་ཡོད་ཀྱང་། བར་ལམ་ནས་རླབས་ཆེན་གྱི་མཛད་ཁུར་རམ་ཐུགས་བསྐྱེད་དམ་བཅའ་གཙོ་བོ་དེ་གསུམ་ཐོག་དཔལ་ནཱ་ལེནྡཱ་ནས་བརྒྱུད་པའི་སེམས་ཁམས་རིག་པའི་རྣམ་གཞག་གཙོ་བོར་གྱུར་པའི་རྒྱ་གར་ཧིན་དུ་དང་། གཅེར་བུ་བ། གྲངས་ཅན་པ། ནང་པ་སངས་རྒྱས་པ་སོགས་ཆོས་ལུགས་དེ་དག་གི་ནང་གཞི་རྩའི་གང་ཟག་གི་བདག་འདོད་མིན་ཇི་ལྟར་ཡང་། ཞི་གནས་དང་ལྷག་མཐོང་། བྱང་ཕྱོགས་སོ་བདུན། བསླབ་པ་གསུམ་སོགས་ཕྱི་ནང་ཐུན་མོང་བའི་རྣམ་གཞག་དེ་དག་གི་ཐོག་ནས་མིའི་བསམ་བློ་གཏོང་སྟངས་ལ་བཟང་ཕྱོགས་ཀྱི་འགྱུར་བ་དང་། ཤུགས་རྐྱེན་ཆེན་པོ་སྤྲད་ཐུབ་རྒྱུའི་རྒྱ་ཆེའི་དགོངས་པ་བཞེས་ནས་མགོན་པོ་གང་ཉིད་མཆོག་གིས་རྒྱ་གར་གྱི་སློབ་ཕྲུག་དང་དགེ་རྒན། ཚོང་པའི་ལྷན་ཚོགས། ཤེས་ཡོན་མི་སྣ་དང་། ཆེད་ལས་པ། བསམ་བློ་སྨྲ་བ། ཆོས་ལུགས་ཀྱི་དབུ་ཁྲིད་སོགས་མི་མང་སྟོང་ཕྲག་མང་པོར་རྒྱ་གར་གནའ་རབས་ཀྱི་རིག་གཞུང་སླར་གསོའི་གལ་གནད་སྐོར་བཀའ་སློབ་བསྩལ། དེ་ཡང་རྒྱུད་ཆགས་སྡང་གི་བློ་ཕྲན་བུ་ཤུགས་ཆུང་ངུར་བཏང་ནས་འཛམ་གླིང་སྤྱི་ལ་ཞི་བདེ་བག་ཕེབས་ཤིག་བསྐྲུན་རྒྱུའི་དགོངས་བཞེས་རླབས་ཆེན་མཛད་བཞིན་ལགས།
སྤྱིར་རྒྱ་གར་གནའ་བོའི་སྲོལ་རྒྱུན་ནང་ཆོས་ལུགས་ནས་གསུང་པའི་ལྟ་གྲུབ་རྣམ་གཞག་ཤིན་ཏུ་རྒྱ་ཆེ་ཞིང་། ལྷག་པར་ཚད་མ་རིག་པའི་རྣམ་གཞག་སྐོར་ལ་གནས་ཚད་ཆེས་མཐོན་པོར་སོན་པ་དེ་དག་ནི་དེང་དུས་ཚན་རིག་དང་མཉམ་དུ་དཔུང་པ་མཉམ་གཤིབ་བྱས་ཏེ་འགྲོ་ཐུབ་པ་ཞིག་མགོན་པོ་མཆོག་ནས་གཟིགས་བཞིན་པ་ལྟར་བཀའ་སློབ་བཀའ་དྲིན་བསྐྱངས་ནས་ཚན་རིག་པའི་མཁས་པ་ཆེན་པོ་དུ་མ་ཞིག་ལ་བློའི་སྒོ་འཕར་ཡངས་པོར་ཕྱེ་བ་བྱུང་བ་དང་ཚན་རིག་པར་གྲུབ་འབྲས་སྔར་ལས་ཆེས་ཆེར་འཕེལ་བ་བྱུང་དང་འབྱུང་བཞིན་ཡོད།
འོན་ཀྱང་བློ་ཕམ་པ་ཞིག་ལ་རྒྱ་གར་རང་ཉིད་ནང་དུས་འགྱུར་དབང་གིས་ད་ཆ་ལེགས་བཤད་དེ་དག་ལ་འཆད་ཉན་བྱ་རྒྱུར་ཉམས་ཆག་ཕྱིན་ཏེ་ཆོས་བྱེད་ཅེས་པའི་སྐབས་གཙོ་བོ་ཕྱི་ཚུལ་གྱི་རྣམ་པ། ལྷ་ཁང་ནང་སྐུ་འདྲའི་མདུན་དུ་སྨོན་ལམ་བརྒྱག་རྒྱུ་དང་། ཁ་འདོན་རིགས་བཏོན་པ་སོགས་ཀྱིས་ཆོག་ཤེས་བྱས་པ་ཙམ་ལས་སྐྱོན་ཐམས་ཅད་ཀྱི་གཞི་མ་ནང་གི་ཆགས་སྡང་སོགས་ཀྱི་རྣམ་རྟོག་དེ་དག་བཏང་སྙོམས་སུ་བཞག་ནས་འགྲོ་བཞིན་མཆིས། དེ་ཡང་། ༸གོང་ས་མཆོག་གིས། “ང་ཚོས་སྨོན་ལམ་བཏོན་པ་ཙམ་གྱིས་དཀའ་ངལ་དེ་དག་སེལ་ཐབས་མེད།” ཅེས་དང་། “ད་ལྟའི་འཛམ་གླིང་ནང་འཇིགས་སྐུལ་དྲག་སྤྱོད་པ་དང་། རྒྱལ་ཁབ་ཕན་ཚུན་དམག་འཁྲུག དེ་བཞིན་གོ་ལའི་ཚ་དྲོད་རྒྱས་བཞིན་པ་སོགས་དཀའ་ངལ་མང་ཆེ་བ་མིས་བཟོས་པའི་དཀའ་ངལ་ཡིན་པར་བརྟེན་དེ་དག་སེལ་དགོས་ན་དྲག་པོའི་སྟོབས་ཤུགས་ཐོག་ནས་སེལ་ཐབས་མེད་སྟབས། དཀའ་ངལ་དེ་དག་གི་རྩ་བ་ཆགས་སྡང་གི་བློ་དེ་དག་མགོ་སྣོན་ཐུབ་པ་བྱུང་ན་དཀའ་ངལ་དེ་དག་སེལ་ཐུབ།” ཅེས་བཀའ་སློབ་བསྩལ་བ་དེའི་རྒྱབ་ལྗོངས་སུ་རྒྱ་གར་གནའ་རབས་དཔལ་ནཱ་ལེནྡཱའི་དབུ་མའི་ལྟ་གྲུབ་སྨྲ་བ་ཆེན་པོ་དཔལ་ལྡན་ཟླ་བ་གྲགས་པའི་
དབུ་མ་འཇུག་པ་སེམས་བསྐྱེད་དྲུག་པའི་ནང་གང་ཟག་གི་བདག་འགོག་པའི་སྐབས་སུ།
ཉོན་མོངས་སྐྱོན་རྣམས་མ་ལུས་འཇིག་ཚོགས་ལ། །ལྟ་ལས་བྱུང་བར་བློ་ཡིས་མཐོང་གྱུར་ཅིང་།།
བདག་ནི་འདི་ཡི་ཡུལ་དུ་རྟོགས་བྱས་ནས། །རྣལ་འབྱོར་པ་ཡིས་བདག་ནི་དགོག་པར་བྱེད། །
ཅེས་གསུངས་པ་ལྟར། འཛམ་གླིང་ནང་གི་རྙོག་ཁྲ་ཕལ་མོ་ཆེ་རང་ཕྱོགས་ལ་ཆགས། གཞན་ཕྱོགས་ལ་སྡང་ནས་ང་ཚོ་དང་ཁོ་པ་ཚོ་ཞེས་འགྲོ་བ་མི་གཅིག་གྱུར་གྱི་འདུ་ཤེས་ཡལ་བར་དོར་ནས་རང་རྒྱལ་གཞན་ཕམ་གྱི་བསམ་བློ་ཁོ་ནར་གཙིགས་ཆེར་འཛིན་པ་ལས་འབྱུང་བཞིན་ཡོད་པ་དེར་དགོངས་ནས་༸གོང་ས་༸སྐྱབས་མགོན་ཆེན་པོ་མཆོག་གིས། “འཛམ་གླིང་ནང་གི་རྙོག་ཁྲ་ཕལ་མོ་ཆེ་མིས་བཟོས་པའི་རྙོག་ཁྲ་ཡིན་སྟབས་རྙོག་ཁྲ་དེ་དག་སེལ་རྒྱུའི་འགན་དང་ཐབས་ལམ་དེའང་མི་ལ་ཡོད་དགོས།” ཞེས་བཀའ་སློབ་རྒྱུན་མར་ཕེབས་ཡོད།
དཔེར་ན་འདི་ལོའི་ཕྱི་ཟླ་ ༡༡ ནང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ New Delhi དང་། རྒྱ་གར་གྱི་བྱང་ཤར་ཨོ་ཌི་ཤ་ Odisha མངའ་སྡེའི་རྒྱལ་ས་བྷུབ་ནེཤ་ཝར། ནུབ་བྷང་གྷལ་མངའ་སྡེའི་རྒྱལ་ས་ཀོལ་ཀ་ཊ་ Kolkata བཅས་སུ་ཆིབས་བསྒྱུར་བཀའ་དྲིན་བསྐྱངས་ཏེ་སློབ་ཕྲུག་དང་དགེ་རྒན། ཚོང་པ་ལྷན་ཚོགས་སོགས་སུ་མི་མང་སྟོང་ཕྲག་མང་པོར་རྒྱ་གར་གནའ་རབས་ཀྱི་རིག་གཞུང་སླར་གསོའི་སྐོར་རྒྱ་ཆེ་ལ་གཏིང་ཟབ་པའི་བཀའ་སློབ་ལམ་སྟོན་བསྩལ་སྟབས་འཕགས་ཡུལ་འདིར་རླུང་ལྟར་གྲགས་ཏེ་དོ་སྣང་མ་བྱས་ཐབས་མེད་ཀྱི་གནས་སུ་གྱུར།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ནཱ་ལེནྡྲའི་ནང་པའི་ལྟ་གྲུབ་དང་། སེམས་ཁམས་རིག་པར་གསན་བསམ་མཐིལ་ཕྱིན་མཛད་པ་ལྟར་ཚན་རིག་ལའང་ཆེས་ཐུགས་སྣང་དང་དགོན་པ་གྲྭ་ཚང་སོགས་སུ་ཚན་རིག་གི་སློབ་གཉེར་གཏིང་ཚུགས་པ་ཞིག་འཛུགས་རྒྱུར་ཐུགས་ཁུར་ཧ་ཅང་མཛད་དང་མཛད་བཞིན་ལགས།
དེ་དང་ཕྱོགས་མཚུངས་ཚན་རིག་པ་སོགས་ལའང་༸གོང་ས་མཆོག་གིས་བོད་བརྒྱུད་ནང་བསྟན་ལ་ཞིབ་དཔྱོད་དང་སློབ་སྦྱོང་བྱ་དགོས་པ་གལ་འགངས་ཆེ་ཚུལ་དང་། བོད་བརྒྱུད་ནང་བསྟན་ལས་གཞི་ལམ་འབྲས་གསུམ་དང་། དེའི་ནང་ཚན་ནས་གཙོ་བོ་གཞི་དངོས་པོའི་རྣམ་གཞག་གཏན་ལ་འབེབས་སྐབས་ཆོས་རྣམས་ཀྱི་གནས་ལུགས་ལ་དཔྱད་པ་བྱེད་བཞིན་ཡོད། ཚན་རིག་པས་དེང་སྐབས་ཚད་རྡུལ་དངོས་ཁམས་རིག་པའི་རྣམ་གཞག་ quantum physics ཐོག་ནས་དོན་དམ་དངོས་པོའི་གནས་ལུགས་ལ་ངོ་མཚར་སྐྱེ་བཞིན་ཡོད་ཀྱང་། རྒྱ་གར་གནའ་རབས་དཔལ་ནཱ་ལེནྡཱའི་མཁས་པ་དཔལ་མགོན་འཕགས་པ་ཀླུ་སྒྲུབ་ Nagarjuna ཀྱིས་ལོ་ངོ་ཉིས་སྟོང་གོང་ནས་གཏན་ལ་ཕབ་པའི་རིག་པའི་རྣམ་གཞག་དེའི་ཐོག་ནས་ཚད་རྡུལ་དངོས་ཁམས་རིག་པའི་རྣམ་གཞག་འདི་ཉིད་ནང་པ་སངས་རྒྱས་པའི་གཞུང་ནང་རིག་པ་གསར་པ་ཞིག་གང་ཡང་ཆགས་མེད།
ལྷག་པར་བོད་མི་ཚོས་མེས་པོ་གོང་མ་ནས་བརྒྱུད་པའི་རིག་གནས་དེ་དག་དེང་སྐབས་དུས་རབས་ ༢༡ ནང་དུའང་ཕྱི་ནང་གི་འགལ་རྐྱེན་དུ་མ་ཞིག་འཕྲད་མིན་ལ་མ་ལྟོས་པར་གཙོ་ཆེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀའ་དྲིན་ཉག་ཅིག་ལ་བརྟེན་ནས་བོད་གངས་ཅན་གྱི་ལྗོངས་སུ་རང་དབང་མེད་ཀྱང་བཙན་བྱོལ་དུ་འཛམ་གླིང་གི་བཙན་བྱོལ་བ་གཞན་དང་འདྲ་འདྲའི་ནང་ནས་མི་འདྲ་ཙམ་ཡོད་པའི་གནས་བབ་འདིའི་འོག་རིག་གནས་དེ་དག་གྲ་མ་ཉམས་གྲུ་མ་ཞིག་པར་ཐོས་བསམ་སྒོམ་གསུམ་ཡ་མ་བྲལ་བའི་སྒོ་ནས་གཅེས་ཉར་མུ་མཐུད་བྱེད་ཐུབ་པའི་འབྲས་བུར། ད་ཆ་བོད་བརྒྱུད་ནང་བསྟན་འདི་ཉིད་འཛམ་གླིང་གི་གཅེས་ནོར་ཡིན། ཞེས་ཕྱི་ནང་མི་རིགས་ཚོའི་ཁྲོད་དུ་བོད་མི་ཚོས་ངོམས་སུ་ཆོག་པའི་གནས་སྟངས་འདི་ནི་མགོན་པོ་གང་ཉིད་ནས་ཉིན་མཚན་ལྟོས་མེད་ངལ་བ་བརྒྱ་ཕྲག་ལྷུར་བཞེས་ཐོག་གདུལ་བྱ་གྲངས་ལས་འདས་པར་ཐབས་མཁས་ཐུགས་རྗེ་ཆེན་པོས་ཡང་ནས་ཡང་དུ་བཀའ་སློབ་གསུང་གི་བདུད་རྩིས་འགྲོ་བའི་མ་རིག་རྨོངས་པ་སེལ་བར་མཛད་པའི་ཉེར་ལེན་ལ་བརྟེན་ནས་བྱུང་།
ད་ཆ་རྒྱ་གར་གནའ་རབས་ཀྱི་རིག་གནས་སྤྱི་དང་ཁྱད་པར་དཔལ་ནཱ་ལེནྡཱ་ནས་བརྒྱུད་པའི་བོད་བརྒྱུད་ནང་བསྟན་ལ་སློབ་སྦྱོང་གཤའ་མ་ཞིག་བྱ་དགོས་ན་བོད་བརྒྱུད་ནང་བསྟན་མ་ལག་དང་བཅས་པར་བོད་སྐད་ཡིག་གཅིག་པོའི་ནང་བཞུགས་ཡོད་པས། བོད་ཀྱི་སྐད་ཡིག་དེ་ངེས་པར་དུ་སྦྱངས་དགོས་པའི་གནས་སྟངས་འདི་ལོང་བས་བལྟས་ཀྱང་རྒྱལ་ཁམས། ཟེར་བའི་དཔེ་ལྟར་སྣང་།
དེང་སྐབས་འཛམ་གླིང་སྟེང་ཕྱི་དངོས་པོའི་ཡར་རྒྱས་ཆེས་ཚད་མཐོན་པོར་སོན་ཡོད་ནའང་། འགྲོ་བ་མིའི་ནང་སེམས་ཀྱི་དཀའ་ངལ་དཔེར་ན། འཇིགས་སྣང་དང་། སེམས་ངལ། གྲོགས་མེད་གཅིག་པུར་ལུས་པ་སོགས་ཉིན་རེ་བཞིན་ཤུགས་ཆེ་རུ་འགྲོ་བཞིན་ཡོད་པར་བརྟེན། ཆོས་ལུགས་ལ་མ་བརྟེན་པའི་བཟང་སྤྱོད་དང་རྒྱ་གར་གྱི་དཔལ་ནཱ་ལེནྡཱའི་གནའ་བོའི་རིག་གཞུང་སེམས་ཁམས་རིག་པའི་རྣམ་གཞག་ཐོག་ནས་ང་ཚོ་འགྲོ་བ་མིའི་སེམས་ཀྱི་དཀའ་ངལ་དེ་དག་སེལ་རྒྱུར་ཞབས་འདེགས་རླབས་ཆེན་ཞིག་བསྒྲུབས་དང་སྒྲུབ་བཞིན་མཆིས་པའང་༸གོང་ས་༸སྐྱབས་མགོན་རྒྱལ་བ་ཐམས་ཅད་མཁྱེན་པའི་རླབས་ཆེན་གྱི་མཛད་རྗེས་ཤིག་ཡིན།
ནུབ་ཕྱོགས་པའི་སེམས་ཁམས་རིག་པ་དང་རྒྱ་གར་གྱི་དཔལ་ནཱ་ལེནྡཱའི་གནའ་བོའི་སེམས་ཁམས་རིག་པ་གཉིས་མཚུངས་བསྡུར་བྱ་སྐབས་རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དེ་དག་ཧ་ཅང་ཚད་མཐོ་བོ་ཞིག་ཡིན་སྐོར་༸གོང་ས་མཆོག་གིས། “ངོས་ཀྱིས་ལོ་ངོ་ ༣༠ ལྷག་རིང་ཚན་རིག་པ་མང་པོ་ཞིག་དང་ཐུག་ནས་གོ་བསྡུར་དང་བགྲོ་གླེང་བྱེད་སྐབས་རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དེ་དག་ཧ་ཅང་ཕྱུག་པོ་འདུག ངོས་ཀྱི་སྐབས་རེ་རྩེད་མོ་དང་སྦྲགས་གལ་ཏེ་རྒྱ་གར་གནའ་རབས་ཀྱི་སེམས་ཁམས་རིག་པའི་རྣམ་གཞག་དེ་ནུབ་ཕྱོགས་པའི་དེང་རབས་ཅན་གྱི་སེམས་ཁམས་རིག་པ་དང་བསྡུར་བ་ཡིན་ན་ནུབ་ཕྱོགས་པའི་སེམས་ཁམས་རིག་པའི་རྣམ་གཞག་དེ་དག་སྔོན་འགྲོ་ལྟ་བུ་འདུག ཅེས་བརྗོད་ཀྱི་ཡོད།” ཅེས་བཀའ་སློབ་བསྩལ་ཡོད།
དེས་ན་རང་རིགས་བོད་མི་རྣམས་ལ་སྐབས་བབ་ལས་འགན་ནི་ཕ་མེས་ནས་རླུང་འཚུབ་ནང་གི་མར་མེ་ལྟར་གཅེས་སྐྱོང་མཛད་པའི་བོད་བརྒྱུད་ནང་བསྟན་སྤྱི་དང་། ལྷག་པར་སེམས་ཁམས་རིག་པའི་རྣམ་གཞག་དང་རིགས་ལམ་སྐོར་ལ་དོ་སྣང་གནང་དགོས་པ་འདི་ཡིན། རབ་བྱུང་ན་ཐེག་པ་ཆེ་ཆུང་སྔགས་དང་བཅས་པར་ཐོས་བསམ་སྒོམ་གསུམ་ཐོག་ནས་སྒྲུབ་པའི་གོ་འཕང་མཐོན་པོར་སྙེགས་རྒྱུ་དང་། མ་མཐར་ཡང་ཚེ་འདི་སྒང་མི་ཚེ་བདེ་ཞིང་སྐྱིད་པ་ཞིག་འདོད་པའི་གསུང་གི་བདུད་རྩི་མས་བུ་ལ་གདམས་པ་ལྟར་ལན་བརྒྱར་བཀའ་སློབ་ཕེབས་ན་འུ་ཅག་བོད་འབངས་རྣམས་བོད་བརྒྱུད་ནང་བསྟན་འདི་ཉིད་ཕྱི་ནང་རྐྱེན་དུ་མའི་འོག་གཉན་འཕྲང་ཅན་གྱི་དུས་སྐབས་འདིར་གཅེས་པའི་སྲོག་བཞིན་རྩིས་སྲུང་བྱས་ཏེ་གསན་བསམ་ཚུལ་བཞིན་དུ་གནང་དགོས་པ་གལ་ཆེར་མཐོང་།།
