༢༠༡༡ ཟླ་ ༡ ཚེས་ ༡༤ རེས་གཟའ་པ་སངས།
༄༅། ། ཕྱི་ལོ་ ༢༠༡༡ ཟླ་ ༡ ཚེས་ ༡༤ ཉིན་བོད་གཞུང་ཨ་རིའི་སྐུ་ཚབ་དོན་གཅོད་ཁང་ནས་བཏང་གནས་ནང་འཁོད་དོན། བོད་གཞུང་བྱང་ཨ་རིའི་སྐུ་ཚབ་དོན་གཅོད་ཁང་གིས་གོ་སྒྲིག་ཐོག་ཨ་རིའི་མཐོ་སློབ་ཁག་ནང་སློབ་སྦྱོང་བྱེད་བཞིན་པའི་བོད་རིགས་གཞོན་སྐྱེས་རྣམས་ཀྱི་ནང་ཆོས་གོ་རྟོགས་མཐོ་རུ་གཏོང་སླད་གྲོང་ཁྱེར་ནིའུ་ཡོག་ནང་དགུན་དུས་ཀྱི་ཟབ་སྦྱོང་ཞིག་ཚོགས་གནང་ཡོད། དེ་ཡང་ཕྱི་ཚེས་ ༡༣ ཉིན་ནས་ནང་ཆོས་ཀྱི་ཟབ་སྦྱོང་དེར་སློབ་ཁྲིད་གནང་མཁན་གཙོ་བོ་ནི་༸གོང་ས་སྐྱབས་མགོན་ཆེན་པོ་མཆོག་གི་སྐུའི་གསུང་སྒྱུར་བ་དགེ་བཤེས་ཐུབ་བསྟན་སྦྱིན་པ་ལགས་ཀྱི་གཙོས་ཕྱག་རོགས་སུ་ཀླད་པའི་ཚན་རིག་མཁས་དབང་རི་ཆཌ་ཌེ་ཝིཌ་སན་ལགས། བླ་མ་མིག་དམར་ལགས། ས་སྐྱ་ཆོས་ཚོགས་ཀྱི་བླ་མ་པདྨ་དབང་གྲགས་ལགས། སྒྱུ་རྩལ་མཁས་དབང་རྗལ་ཕྷི་ཝོ་ཀྲེ་སོགས་མཁས་དབང་ཁག་གཅིག་ཕེབས་ཡོད་པ་དང་། གཞོན་སྐྱེས་སློབ་སྦྱོང་བྱེད་བཞིན་པ་རྣམས་ཀྱི་ཆེད་ནང་ཆོས་ཀྱི་ཟབ་སྦྱོང་གོ་སྒྲིག་ཞུ་བའི་དགོས་དམིགས་གཙོ་བོ་ནི་གཞོན་སྐྱེས་ཚོས་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་གི་ཁྱད་ཆོས་ངོས་ཟིན་ཐུབ་པ་དང་། དེ་འདྲའི་ཟབ་སྦྱོང་བརྒྱུད་ནས་གཞོན་སྐྱེས་རྣམས་དེང་དུས་ཀྱི་ཤེས་བྱ་ལྡན་ཐོག ཡ་རབས་བཟང་སྤྱོད་དང་གཞན་ཕན་གྱི་བསམ་བློ་ལྡན་པའི་གང་ཟག་ཞིག་ཏུ་གྱུར་ཐབས་བྱེད་རྒྱུ་ཡིན་པ་སྐུ་ཚབ་དོན་གཅོད་བློ་བཟང་སྙན་གྲགས་ལགས་ཀྱིས་དབུ་འབྱེད་གསུང་བཤད་སྐབས་གསུངས་དོན། དེ་རིང་གི་ཟབ་སྦྱོང་འདི་ནི་ཕྱི་ལོ་ ༢༠༠༩ ཕྱི་ཟླ་ ༤ པར་༸གོང་ས་མཆོག་གིས་ཧི་མཱ་ལ་ཡའི་རི་བརྒྱུད་ཀྱི་མི་རིགས་དང་། སོག་རིགས། བོད་པའི་ཚོགས་ཁག་གི་སྐུ་ཚབ་ཁག་གཅིག་ལ་མཇལ་ཁ་སྩལ་སྐབས་དམིགས་བསལ་བཀའ་སློབ་ཕེབས་པའི་དགོངས་དོན་ལྟར་གོ་སྒྲིག་ཞུས་པ་ཞིག་ཡིན་པ་དང་། ཟབ་སྦྱོང་དེ་རིགས་བརྒྱུད་ནུབ་ཕྱོགས་སྤྱི་ཚོགས་ནང་གི་གཞོན་སྐྱེས་ཚོས་འཛམ་གླིང་སྟེང་ངོམས་སུ་ཆོག་པའི་བོད་ཀྱི་ཆོས་དང་། རིག་གཞུང་གི་ཐུན་མོང་མ་ཡིན་པའི་ཁྱད་ཆོས་བཟང་པོ་ངོས་འཛིན་ཐུབ་པའི་ཐོག་མི་ཉམས་རྒྱུན་འཛིན་བྱེད་ཐུབ་པ་དང་། དེ་དག་ནས་གསུང་པའི་ཡ་རབས་བཟང་སྤྱོད་ཀྱི་བསླབ་བྱ་དག་ཁོང་དུ་ཆུད་པ་བྱས་ཏེ་འབྱུང་འགྱུར་རང་སྐྱིད་གཞན་ཕན་གྱི་བྱ་བ་བསྒྲུབ་ཐུབ་པའི་རེ་བ་བྱེད་ཀྱི་ཡོད། ཅེས་དམིགས་སུ་བཀར་ནས་གསུངས། ༸གོང་ས་མཆོག་གིས་བཀའ་སློབ་ལམ་སྟོན་ཕེབས་རྗེས་ལོ་དེའི་ཕྱི་ཟླ་ ༨ པར་ནང་ཆོས་ཀྱི་གོ་རྟོགས་སྤེལ་བའི་ཟབ་སྦྱོང་ཐེངས་དང་པོ་དེ་ཚོགས་ཡོད་པ་དང་། ད་ཐེངས་ཀྱི་ཟབ་སྦྱོང་དེ་ཐེངས་གཉིས་པ་ཡིན་ལ་ཉིན་བཞིའི་ཟབ་སྦྱོང་དེར་མཐོ་སློབ་ཁག་ནང་སློབ་སྦྱོང་བྱེད་བཞིན་པའི་བོད་རིགས་སློབ་ཕྲུག་དང་། གཞན་ཡང་འབྲུག་པ་དང་། སོག་རིགས། ལ་དྭགས་པ། ཤར་པ་བཅས་ཧི་མ་ལ་ཡའི་རི་རྒྱུད་ཀྱི་གཞོན་སྐྱེས་མི་གྲངས་ ༩༠ ཙམ་ཟབ་སྦྱོང་ནང་མཉམ་ཞུགས་གནང་ཡོད། ཟབ་སྦྱོང་སྐབས་དགེ་བཤེས་ཐུབ་བསྟན་སྦྱིན་པ་ལགས་གཙོ་བོར་གྱུར་བའི་མཁས་དབང་ཚོས་རང་སོ་སོའི་སློབ་ཁྲིད་ཐབས་ལམ་དང་། ཤེས་རབ་ལ་བརྟེན་ནས་བོད་ཀྱི་ནང་ཆོས་ཀྱི་དོན་སྙིང་ངོ་མ་དང་། དམིགས་བསལ་གྱི་ཁྱད་ཆོས་རྣམས་ཁ་གསལ་གོ་བདེའི་ལམ་ནས་གནང་རྒྱུ་མ་ཟད། ནང་ཆོས་དང་དེང་དུས་ཚན་རིག་གི་འབྲེལ་བ་དེ་དེང་སང་གནས་ཚད་གང་འདྲ་ཞིག་ཏུ་སླེབས་ཡོད་པའི་སྐོར་ཡང་ངོ་སྤྲོད་གནང་རྒྱུ་ཡིན་ཞིང་། ཕན་ཚུན་དྲི་བ་དྲི་ལན་གྱི་ལམ་ནས་བགྲོ་གླེང་ཡང་གནང་རྒྱུ་ཡིན་པ་བཅས།།
