༢༠༡༧ ཟླ་ ༡༡ ཚེས་ ༢༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༢༥ ཉིན་དགའ་ལྡན་ཕོ་བྲང་གིས་ཏཱ་ལའི་བླ་མའི་དྲ་རྒྱའི་སྟེང་གསལ་བཤད་སྤེལ་བའི་ནང་འཁོད་དོན།
ཕྱི་ལོ་ ༢༠༡༧ ཟླ་ ༡༠ ཚེས་ ༡༦ ཉིན་རྒྱ་གར་གྲོང་ཁྱེར་མེ་རཌ་ནང་སློབ་ཕྲུག་གཅིག་གིས་སྟོན་པ་ཤཱཀྱ་ཐུབ་པའི་སྐུ་ཚེའི་མཛད་རྣམ་ལས་འཕྲོས་པའི་དྲི་བར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ལན་སྩལ་བ་དེར་བསྙད་ནས་བལ་ཡུལ་གྱི་གསར་འགྱུར་བརྒྱུད་ལམ་ཁག་གཅིག་ནང་གནས་ཚུལ་སྤེལ་བའི་སྐོར་ང་ཚོས་ཤེས་རྟོགས་བྱུང་།
༸གོང་ས་ཏཱ་ལའི་བླ་མ་མཆོག་གི་བཀའ་ལན་དེའི་དགོངས་དོན་ལ་གོ་བ་ལོག་སྒྲུབ་བྱས་པ་དེར་ང་ཚོར་སེམས་འཚབ་འདུག ༸གོང་ས་ཏཱ་ལའི་བླ་མ་མཆོག་གིས་བལ་པོའི་ཆོས་གྲོགས་ཕོ་མོ་ཚོའི་ལ་རྒྱར་བརྩི་བཀུར་མ་མཛད་པ་དེ་འདྲ་རྩ་བ་ནས་མ་རེད། ཅེས་འདིར་གསལ་བཤད་ཞུ་འདོད་བྱུང་།
བཀའ་ལན་དེའི་དགོངས་དོན་གཙོ་བོ། དེ་སྔ་ཨེ་ཤི་ཡའི་ཁྱོན་ཡོངས་སུ་ནང་ཆོས་ཀྱི་ཤུགས་རྐྱེན་དེས་ཁྱབ་པ་དང་། ང་ཚོས་སྟོན་པའི་གསུང་ལ་སློབ་སྦྱོང་བྱ་དགོས། ཞེས་པ་དེ་ཡིན་པ་ལས་སྟོན་པ་ཤཱཀྱ་ཐུབ་པའི་འཁྲུངས་ཡུལ་ལུམ་བྷི་ནི་ཡིན་པར་༸གོང་ས་ཏཱ་ལའི་བླ་མ་མཆོག་ནས་ནང་པ་གཞན་དང་གཅིག་མཚུངས་མཐའ་གཅིག་ཏུ་མོས་མཐུན་མཛད་བཞིན་ཡོད།
དེ་བཞིན་སྟོན་པ་མངོན་པར་རྫོགས་པ་སངས་རྒྱས་པའི་གནས་དང་ཆོས་འཁོར་སྐོར་ཡུལ་རྒྱ་གར་འཕགས་པའི་ཡུལ་འདི་ཉིད་ཡིན་པ་ཡོངས་སུ་གྲགས་ཡོད། གསལ་བཤད་འདིས་ཐེ་ཚོམ་དང་གོ་བ་ལོག་པ་མཐའ་དག་སེལ་ཐུབ་རྒྱུའི་རེ་བ་ཞུ་བཞིན་ཡོད། ཅེས་འཁོད་འདུག །
ཨིན་ཡིག་ནས་ཕྱི་དྲིལ་བོད་ཡིག་ཚན་པས་ཕབ་སྒྱུར་ཞུས།
