༢༠༡༧ ཟླ་ ༡༡ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༡༡ ཚེས་ ༢༣ སྔ་དྲོ་ཆུ་ཚོད་ ༩:༣༠ ཐོག་རྡ་ས་མེག་གྷན་ནོར་བུ་གསོལ་མགྲོན་ཁང་དུ་ཨོ་གླིང་གྲོས་ཚོགས་འཐུས་མི་སྐུ་ཞབས་ཌེ་རི་ཧིན་ཆི་ Derryn Hinch མཆོག་དང་། སྐུ་ཞབས་ཀེ་ཝིན་ཨན་ཌིའུ་ Kevin Andrews མཆོག ཀིམ་བྷར་ལེ་ཀི་ཅིང་ Kimberly Kitching མཆོག་དང་། ལྕམ་སྐུ་མེ་རིལ་ཇེན་སྭན་སོན་མཆོག Meryl Jane Swanson བཅས་ཀྱིས་གསར་འགོད་ལྷན་ཚོགས་ཐོག་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཤུགས་ཆེ་གནང་འདུག
སྐབས་དེར་ཕྱི་ནང་གི་གསར་འགོད་པ་ཚང་འཛོམས་ཀྱི་ཐོག་མར་ཕྱི་དྲིལ་གསར་འགོད་འབྲེལ་མཐུད་འགན་འཛིན་འཇམ་དཔལ་གཞོན་ནུ་ལགས་ཀྱིས་གྲོས་ཚོགས་འཐུས་མི་རྣམས་ངོ་སྤྲོད་ཞུས་བསྟུན། ཨོ་གླིང་གྲོས་ཚོགས་འཐུས་མི་སྐུ་ཚབ་ཚོགས་ཆུང་གི་ཚོགས་གཙོ་སྐུ་ཞབས་ཌེ་རི་ཧིན་ཆི་ Derryn Hinch མཆོག་གིས་གསུང་དོན།
ཐེངས་འདིར་ང་ཚོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་རྒྱུའི་སྐལ་བཟང་གི་གོ་སྐབས་ཐོབ་བྱུང་། སྤྱིར་ང་ཚོས་དེ་སྔའང་ཁོང་དང་མཇལ་འཕྲད་ཞུ་མྱོང་ཡོད། རྒྱུན་ལྡན་བརྗོད་སྲོལ་ལྟར་ས་གནས་འདི་ནི་༸གོང་ས་མཆོག་གི་བཞུགས་སྒར་ཆགས་ཡོད། ཐེངས་འདིར་ང་ཚོས་རྡ་ས་བོད་ཁྱིམ་སློབ་གྲྭ་དང་དགོན་སྡེ་གྲྭ་ཚང་ཁག དེ་བཞིན་བོད་མིའི་སློབ་གྲྭ་དང་བོད་མིའི་སྒྲིག་འཛུགས་ཀྱི་ཕྱག་ལས་གནང་སྟངས་སོགས་རྒྱུས་ལོན་ཐུབ་བྱུང་། དེར་བརྟེན་ང་ཚོས་བོད་མི་རྣམས་ཀྱིས་རང་གི་ཐུན་མིན་ཆོས་དང་རིག་གཞུང་། སྐད་ཡིག་གཙོ་བོར་གྱུར་བའི་ངོ་བོ་རྒྱུན་འཛིན་ཇི་ལྟར་གནང་བཞིན་པ་གསལ་པོར་མཐོང་བྱུང་།
ལྷག་པར་གཞིས་བྱེས་བོད་མི་ཚོས་ཚོར་ཤུགས་ཆེན་པོའི་ཐོག་ནས་དབུ་མའི་ལམ་གྱི་སྲིད་བྱུས་འོག་ནས་མིང་དོན་མཚུངས་པའི་རང་སྐྱོང་གི་གནས་བབ་ཚད་ལྡན་ཞིག་ཐོབ་ཐབས་གནང་བཞིན་ཡོད་པ་མཐོང་བྱུང་།
དབུ་མའི་ལམ་གྱི་སྲིད་བྱུས་ནི་༸གོང་ས་ཏཱ་ལའི་བླ་མ་མཆོག་གིས་ཕྱི་ལོ་ ༡༩༧༤ ལོ་ནས་ཐུགས་བརྩོན་མཛད་པའི་འབྲས་བུར་ཕྱི་ལོ་ ༢༠༡༠ བར་རྒྱ་ནག་གཞུང་དང་ལྷན་གཞུང་འབྲེལ་དང་གཞུང་འབྲེལ་མིན་པའི་ཐོག་ནས་འབྲེལ་བ་གནང་ཐུབ་པ་བྱུང་ཡོད། གལ་ཏེ་དབུ་མའི་ལམ་གྱི་སྲིད་བྱུས་ལག་བསྟར་རྒྱུན་སྐྱོང་མ་ཐུབ་ཚེ་གོ་སྐབས་དེ་དག་ཤོར་ནས་ད་ལྟའི་གནས་སྟངས་ཧ་ཅང་ཛ་དྲག་ངང་གནས་རྒྱུ་རེད།
ང་ཚོའི་ལུང་པའི་ནང་ལོ་གཅིག་གོང་ཙམ་ནས་མང་ཚོགས་ཁྲོད་བཤད་སྲོལ་ཞིག་ལ། མི་རིགས་འཕེལ་རྒྱས་འགྲོ་དང་རྩ་མེད་འགྲོ། ཅེས་དེ་གཉིས་གང་རུང་འདམ་ག་བྱེད་དགོས་པ་བརྗོད་སྲོལ་ཡོད། སྤྱིར་དེར་འགྲེལ་བ་རྒྱག་སྟངས་རྣམ་པ་འདྲ་མིན་ཡོད་ཀྱང་རྒྱ་ནག་གཞུང་གིས་བོད་ནང་རྒྱ་ཧན་མི་རིགས་འཕོན་ཆེ་གཞི་སྤོ་བྱས་པ་བརྒྱུད་བོད་མི་རྩ་མེད་དུ་གཏང་ཐུབ་ན་བསམ་པའི་རེ་བ་བྱེད་བཞིན་ཡོད་སྐོར་ངས་ཐེངས་འདིར་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་སྐབས་ཞུས་པ་ཡིན། འོན་ཀྱང་བོད་མི་རྣམས་ནམ་ཡང་རྩ་མེད་དུ་འགྲོ་རྒྱུ་མ་རེད། གང་ཡིན་བརྗོད་ན་ང་ཚོས་འདིར་བོད་མིའི་འཐབ་རྩོད་ཀྱི་མ་རྩ་ཟེར་ནའང་མིན་འདུག རྒྱབ་ལྗོངས་ཀྱི་སྟོབས་ཤུགས་འདིར་མཐོང་བྱུང་། ཞེས་གསུངས།
དེ་རྗེས་སྐུ་ཞབས་ཀེ་ཝིན་ཨན་ཌིའུ་ Kevin Andrews མཆོག་གིས་དབུ་མའི་ལམ་གྱི་སྲིད་བྱུས་ནི་༸གོང་ས་ཏཱ་ལའི་བླ་མ་མཆོག་གིས་ཕྱི་ལོ་ ༡༩༧༤ ལོ་ནས་ཐུགས་བརྩོན་མཛད་བཞིན་པ་མ་ཟད། བཙན་བྱོལ་བོད་མིའི་གྲོས་ཚོགས་ནས་ཀྱང་བཞེངས་ཕྱོགས་དེར་རྒྱབ་སྐྱོར་མུ་མཐུད་ཞུ་མུས་ཡིན། ཐོག་མར་སྲིད་བྱུས་དེ་ལག་བསྟར་མཛད་པ་ནས་ད་བར་དངོས་ཡོད་གནས་ཚུལ་དང་ཧ་ཅང་འཚམས་པའི་སྲིད་བྱུས་ཤིག་ཐོག་མུ་མཐུད་ནས་གནས་ཡོད།
བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་དགོས་ཟེར་བའི་ལངས་ཕྱོགས་དེར་རྒྱལ་སྤྱིའི་དབུ་ཁྲིད་རྣམ་པས་ཧ་ཅང་རྒྱུ་མཚན་ལྡན་པ་ཞིག་ལ་གཟིགས་བཞིན་ཡོད། སྲིད་འཛིན་དང་སྲིད་བློན་སོགས་རྒྱལ་སྤྱིའི་དབུ་ཁྲིད་དང་གྲོས་ཚོགས་སོགས་ཀྱིས་དུས་ནས་དུས་སུ་བོད་ཀྱི་གནད་དོན་གསལ་དགོས་པའི་རེ་འདུན་ཐེངས་མང་བཏོན་དང་འདོན་བཞིན་ཡོད།
ང་ཚོ་ཐེངས་འདིར་ཨོ་གླིང་གྲོས་ཚོགས་སྐུ་ཚབ་ཚོགས་ཆུང་ངོ་བོའི་ཐོག་ནས་བཅར་དགོས་དོན་དེའང་རྒྱལ་སྤྱིའི་བོད་དོན་རྒྱབ་སྐྱོར་གྱི་འབོད་སྒྲ་དེར་ད་དུང་ཤུགས་ཆེ་རུ་གཏོང་ཆེད་ཡིན། ང་ཚོའི་བསམ་པར་བོད་ཀྱི་གནད་དོན་ངེས་པར་གསལ་དགོས་པ་དང་། དེ་གསལ་བར་ཐབས་ལམ་བཟང་ཤོས་དེ་དབུ་མའི་ལམ་གྱི་ཐབས་ལམ་དེ་མཐོང་བཞིན་འདུག
སྲིད་བྱུས་དེའི་འོག་བོད་མི་རྣམས་རྒྱ་ནག་དང་ཁ་བྲལ་བྱས་ནས་རང་བཙན་རྩོད་རྒྱུའི་མཐའ་དང་། ད་ལྟའི་རྒྱ་ནག་གི་མི་སེར་སྤེལ་བའི་ལམ་ལུགས་ཧ་ཅང་གདུག་རྩུབ་ཅན་གྱི་མཐའ་གཉིས་དང་བྲལ་ནས་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཐོབ་ཐབས་བྱ་རྒྱུ་དེ་རེད།
བོད་མིར་རང་སྐྱོང་ཐོབ་ཐང་ཡོད་སྐོར་རྒྱ་ནག་རང་གི་རྩ་ཁྲིམས་ནང་དུའང་འཁོད་ཡོད། དེར་བརྟེན་ངའི་བསམ་པར་དབུ་མའི་ལམ་གྱི་སྲིད་བྱུས་ཐོག་མུ་མཐུད་ནས་འབད་བརྩོན་བྱེད་དགོས་པ་ཧ་ཅང་གལ་ཆེ། ང་ཚོ་ཕྱིར་རང་ཡུལ་དུ་ལོག་རྗེས་བོད་དོན་ཐོག་གྲོས་ཚོགས་ནང་ཙམ་མ་ཟད། རྒྱལ་སྤྱིའི་སྡིངས་ཆའི་ཐོག་ཏུའང་མུ་མཐུད་རྒྱབ་སྐྱོར་ཞུ་རྒྱུ་དང་། བོད་ཀྱི་གནད་དོན་དེ་འཚེ་མེད་ཞི་བ་གྲོས་མོལ་གྱི་ལམ་ནས་བདེན་མཐའ་གསལ་ཐབས་ཆེད་འབད་བརྩོན་མུ་མཐུད་ཞུ་རྒྱུ་ཡིན། ཞེས་གསུངས་རྗེས་གྲོས་ཚོགས་འཐུས་མི་གཞན་གཉིས་ནས་རང་ཉིད་རྡ་སར་འཚམས་གཟིགས་སྐབས་ཀྱི་མྱོང་ཚོར་སྐོར་གསུངས།
དེ་རྗེས་གསར་འགོད་པའི་དྲི་བར་ལན་འདེབས་གནང་སྐབས་སྐུ་ཞབས་ཌེ་རི་ཧིན་ཆི་ Derryn Hinch མཆོག་གིས། དེ་སྔ་སྐབས་ཤིག་ལ་ཡུ་རོབ་རྒྱལ་ཁབ་ཁག་གིས་རྒྱ་ནག་གི་དཔལ་འབྱོར་གནོན་ཤུགས་ལ་ཞེད་སྣང་བྱས་ནས་༸གོང་ས་ཏཱ་ལའི་བླ་མ་མཆོག་ལ་མཇལ་འཕྲད་ཞུ་རྒྱུར་འཛེམས་ཟོན་བྱས་ཡོད་ཀྱང་། ཨ་རིའི་སྲིད་འཛིན་ཟུར་པ་སྐུ་ཞབས་བྷ་རག་ཨོ་བྷ་མ་ Barak Obama མཆོག་གིས་རྒྱ་ནག་གཞུང་གི་གནོན་ཤུགས་ལ་འཇིག་ཞུམ་སྤུ་ཙམ་མེད་པའི་ཐོག་ནས་བོད་ཀྱི་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་མཛད་པར་བརྟེན་ད་ཆ་རྒྱ་ནག་གི་དཔལ་འབྱོར་གནོན་ཤུགས་ལ་བརྟེན་ནས་༸གོང་ས་ཏཱ་ལའི་བླ་མ་མཆོག་དང་མཇལ་འཕྲད་ཞུ་རྒྱུ་མིན་ཟེར་བའི་དུས་ཚོད་དེ་མཇུག་སྒྲིལ་ཟིན་སྟབས། ཉེ་བའི་ཆར་ཡང་ཡུ་རོབ་རྒྱལ་ཁབ་མང་པོའི་ནང་རྒྱ་ནག་གཅིག་གི་ལངས་ཕྱོགས་དེར་བརྩི་བཀུར་ཞུ་ཐོག་བོད་དོན་རྒྱབ་སྐྱོར་བསྟུད་མར་གནང་བཞིན་པ་གསལ་པོ་རེད། ཅེས་སོགས་གསུངས།།
