༢༠༡༡ ཟླ་ ༡ ཚེས་ ༡༡ རེས་གཟའ་མིག་དམར།
༅༅། །འདི་གར་ཨོ་སི་ཊོ་ལི་ཡའི་བོད་གཞུང་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༢ ནས་བཟུང་བསྟུད་མར་ཉིན་འགར་དྲག་ཆར་བབས་པའི་རྐྱེན་གྱིས་ཨོ་སི་ཊོ་ལི་ཡའི་ཁོན་སི་ལེན་ཌེའི་(Queensland)མངའ་སྡེའི་ནང་ཆུ་ལོག་གི་གནོད་སྐྱོན་ཚབས་ཆེན་བྱུང་བར། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ས་གནས་མངའ་སྡེའི་བློན་ཆེན་ (Anna Bligh) མཆོག་གི་མཚན་ཐོག་ནས་ཐུགས་གསོའི་འཚམས་འཕྲིན་སྩལ་བའི་ནང་འཁོད་དོན།  སྐུ་ཉིད་ཀྱི་མངའ་སྡེའི་ས་ཁུལ་ནང་ལོ་མང་བྱུང་མྱོང་མེད་པའི་ཆུ་ལོག་གི་གནོད་འཚེ་ཚབས་ཆེན་ཕོག་སྟེ། ཆུ་ལོག་གི་གནོད་སྐྱོན་དེའི་ཁྲོད་མང་ཚོགས་ཀྱི་རྒྱུ་ནོར་ལ་གྱོང་གུན་དང་དཀའ་ངལ་ཆེན་པོ་འཕྲད་བཞིན་པའི་ཡིད་སྐྱོའི་གནས་ཚུལ་དེ་དག་ལ་ངོས་རང་བློ་ཕམ་བྱུང། འོན་ཀྱང་ཨོ་སི་ཊོ་ལི་ཡ་གཞུང་ཕྱོགས་ནས་ཆུ་ལོག་གི་གནོད་འཚེའི་བྱུང་བ་དེར་གདོང་ལེན་དང་རོགས་སྐྱོབ་གནང་རྒྱུའི་གྲ་སྒྲིག་ལ་ཡི་རང་བསྔགས་བརྗོད་ཞུ་བཞིན་ཡོད། ཆུ་ལོག་སྐབས་ཡུལ་མིར་སྲོག་སྐྱོན་མི་ཡོང་བ་དང། ཁང་ཁྱིམ་རྩ་གཏོར་ཕྱིན་པ་རྣམས་བསྐྱར་གསོ་གང་མགྱོགས་ཡོང་བ་དང། ཆུ་ལོག་གི་གནོད་འཚེ་གང་མགྱོགས་ཞི་བའི་སྨོན་ལམ་འདེབས་བཞིན་ཡོད།  ཅེས་འཁོད་ཡོད།  ཕྱི་ཟླ་ ༡ ཚེས་ ༡༡ ཉིན་ཨོ་སི་ཊོ་ལི་ཡའི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། གྲོང་ཁྱེར་ཁག་འགའི་ནང་ཆུ་ལོག་གི་གནོད་འཚེ་ཚབས་ཆེ་རུ་འགྲོ་བ་དང། ཡུལ་མིའི་ཁྱིམ་ཚང་ཆུས་བསྣུབས་ཡོད་པ་མ་ཟད། ཉུང་མཐར་མི་ ༨ ཙམ་ཤི་སྐྱོན་དང་གཞན་མི་གྲངས་ ༧༠ ཙམ་གར་སོང་ཆ་མེད་དུ་གྱུར་ཡོད་འདུག ཁུལ་དེའི་ཆུ་ལོག་ནི་ལོ་ངོ་བཅུ་ཕྲག་མང་པོའི་རིང་བྱུང་མ་མྱོང་བའི་རྐྱེན་ངན་ཚབས་ཆེ་ཤོས་ཤིག་ཆགས་ཡོད་འདུག་པ་བཅས།།