༢༠༡༡ ཟླ་ ༡ ཚེས་ ༡༡ རེས་གཟའ་མིག་དམར།
༄༅། །ཕྱི་དྲིལ་བོད་ཡིག་ཚན་པའི་གསར་འགོད་པས་ས་གནས་ནས་འདི་གར་བཏང་གནས་ནང་འཁོད་དོན། ཕྱི་ལོ་ ༢༠༡༡ ཟླ་ ༡ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལྡི་ལི་ནས་མཁའ་ལམ་བརྒྱུད་ཝར་ཎ་གནམ་ཐང་དུ་༸ཞབས་སོར་འཁོད་སྐབས་ཝར་ཎ་གཙུག་ལག་མཐོ་སློབ་ཀྱི་ངེས་སྟོན་པ་དགེ་བཤེས་ངག་དབང་བསམ་གཏན་ལགས་ཀྱིས་གཙོས་གསུང་ཆོས་ཀྱི་སྦྱིན་བདག་གནང་མཁན་གྱི་འཐུས་ཚབ་མི་གསུམ་དང་དེ་བཞིན་བོད་གཞུང་བདེ་སྲུང་བཀའ་བློན་མཆོག་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད།
དེ་ནས་ཕེབས་འགྲོ་བརྒྱུད་ཝར་ཎ་མཐོ་སློབ་ཀྱི་སྒོ་ཆེན་དུ་༸ཞབས་སོར་འཁོད་སྐབས་དད་ལྡན་སེར་སྐྱ་མི་མང་སྟོང་ཕྲག་བརྒལ་བས་ལག་ཏུ་དཀར་གཙང་གི་མཇལ་དར་ཐོགས་ཏེ་ཕེབས་བསུ་དང་རྒྱལ་སྒོ་ནང་དགའ་ལྡན་ཁྲི་རིན་པོ་ཆེ་མཆོག་དང་ཤར་བྱང་ཆོས་རྗེ་རྣམ་གཉིས་ཀྱིས་དབུས་གདན་ས་ཁག་གི་མཁན་བླ་སྤྲུལ་རྣམས་དང་ཝར་ཎ་མཐོ་སློབ་ཀྱི་སློབ་ཕྲུག་ཟློས་གར་ཚོགས་པའི་སློབ་བུ་ཁག་གཅིག་གིས་བཀྲ་ཤིས་ཞོལ་པའི་མཆོད་སྤྲིན་དང་།
དེ་བཞིན་དགེ་འདུན་འདུས་མང་རྣམས་ནས་དུང་རྒྱ་སྤོས་སྣེས་སྔོན་བསུས་ཏེ་ཕོ་བྲང་ནང་གདན་འདྲེན་ཞུས་ཡོད། ཕྱི་ཚེས་ ༡༡ ཉིན་བསྟན་འགྱུར་བོད་སྐད་ནས་སྐད་ཡིག་གཞན་ནང་ཕབ་སྒྱུར་ཞུ་རྒྱུའི་ཚོགས་ཆེན་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་གནང་མཛད་རྒྱུ་ཡིན་འདུག
ཚོགས་ཆེན་དེ་ཕྱི་ཚེས་ ༨ ནས་ ༡༡ བར་བཅས་ཉིན་གྲངས་བཞིའི་རིང་ཚུགས་བཞིན་ཡོད་པ་དང་ཚོགས་བཅར་བའི་ཁོངས་ཨ་རི་དང་ཁེ་ཎ་ཌ། ཇར་མ་ནི། ཕ་རན་སི། སུད་སི། ཌེན་མག ར་ཤི་ཡ། ཐེ་ཝན། ཉི་ཧོང། བལ་ཡུལ་སོགས་ནས་ཕེབས་ཡོད་པ་བཅས།།
