༢༠༡༠ ཟླ་ ༡༢ ཚེས་ ༢༡ རེས་གཟའ་མིག་དམར།
ཟུང་དྲུང་དང་ས་གནས་སྤྱི་མཐུན་ཚོགས་པའི་རྒྱུན་ལས།
༄༅། །དེ་ཡང་ཨ་རི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཟུང་དྲུང་ཀུན་དགའ་ བཀྲིས་ལགས་བདུན་ཕྲག་སྔོན་མའི་ནང་མི་ནི་སུད་ཊར་ས་གནས་བོད་རིགས་སྤྱི་མཐུན་ ཚོགས་པས་གདན་ཞུ་གནང་བ་ལྟར། མིན་ནཱ་པོ་ལིསི་གྲོང་ཁྱེར་དུ་ཕེབས་ནས་དེར་ཡོད་ རྒྱ་རིགས་སློབ་ཕྲུག་དང་། མཁས་དབང་ཁག་གཅིག་ཐུག་འཕྲད་གནང་ཡོད། ཁོང་གིས། ཐུག་འཕྲད་བྱུང་བའི་རྒྱ་རིགས་རྣམས་ལ་༸གོང་ས་༸སྐྱབས་མགོན་ཆེན་པོས་ བོད་ཀྱི་དཀའ་རྙོག་སེལ་ཐབས་ཀྱི་དགོངས་གཞི་བཞེངས་ཕྱོགས་གཙོ་བོ་གང་ཡིན་པ་ དང་། བཙན་བྱོལ་བོད་གཞུང་གིས་རྒྱུ་མཚན་གང་ལ་བརྟེན་ནས་རྒྱ་རིགས་མི་མང་དང་ འབྲེལ་ལམ་གཏིང་ཟབ་ཏུ་གཏོང་རྒྱུའི་སྲིད་བཟུང་བའི་སྐོར་འགྲེལ་བརྗོད་གནང་བ་ ཕུད། མ་འོངས་ལས་དོན་དོན་གཞན་གྱི་སྐོར་ལ་ཡང་བཀའ་བསྡུར་གནང་ཡོད་པ་ རེད། སྤྱི་མཐུན་ཚོགས་པའི་ཚོགས་གཙོ་ཚེ་དབང་དངོས་གྲུབ་ལགས་དང་། རྒྱ་རིགས་ལ་ འབྲེལ་ལམ་གནང་མཁན་རྒྱུན་ལས་ངག་དབང་འཆི་མེད་ལགས་གཉིས་རྒྱ་རིགས་ཐུག་འཕྲད་ སྐབས་མཉམ་དུ་ཕེབས་ཡོད་པ་རེད།
ལས་དོན་ཐོག་ཕན་ཚུན་གྲོས་བསྡུར་གནང་བའི་སྐབས་རྒྱ་རིགས་ཚོས་སེམས་ཁུར་བྱེད་ པའི་གནད་དོན་ཁག་ལ་ཚོགས་གཙོ་ཚེ་དབང་དངོས་གྲུབ་ལགས་དང་། རྒྱ་རིགས་འབྲེལ་ མཐུད་པས་ལན་འདེབས་གསལ་བཤད་གནང་ཡོད་ཅིང་། ཚོགས་གཙོ་ཚེ་དབང་དངོས་གྲུབ་ལགས་ ནས་ཐོག་མའི་ངོ་སྤྲོད་གསུང་བཤད་ཀྱང་གནང་ཡོད་པ་རེད།
གཞན་ཡང་ཟུང་དྲུང་ཀུན་དགའ་བཀྲིས་ལགས་ནས་ཚོགས་པའི་རྒྱུན་ལས་རྣམ་པ་དང་ཐུག་ འཕྲད་བྱས་ཏེ་རྒྱ་རིགས་དང་འབྲེལ་ལམ་བྱེད་ཕྱོགས་སྐོར་དང་། རྒྱ་ནག་འཐབ་ཕྱོགས་ གཅིག་གྱུར་ཁང་གིས་བཙན་བྱོལ་བོད་མིའི་ཆིག་སྒྲིལ་གཏོར་བཤིག་གཏོང་ཐབས་ཀྱི་ངན་ བྱུས་ཇི་ལྟར་བཤམས་ཀྱི་ཡོད་པ་དེ་ཚོར་ས་གནས་རྒྱུན་ལས་ཚོས་ཐུགས་སྣང་ཆེན་པོ་ དགོས་པའི་འབོད་སྐུལ་གནང་བ་དང་འབྲེལ་འཐབ་ཕྱོགས་གཅིག་གྱུར་ཁང་གི་བྱེད་སྟངས་ དེ་ཚོ་རྒྱུན་ལས་རྣམས་བརྒྱུད་ནས་ས་གནས་མང་ཚོགས་ཀྱིས་ཤེས་ཐབས་བཟོ་རྒྱུ་གལ་ ཆེན་པོ་ཡིན་པའི་ནན་བརྗོད་ཀྱང་གནང་ཡོད་པ་རེད།།
