༢༠༡༠ ཟླ་ ༡༢ ཚེས་ ༡༧ རེས་གཟའ་པ་སངས།
༄༅། །འདི་གར་ལྡི་ལིའི་བོད་སྒར་བསམ་ཡས་གླིང་ས་གནས་འགོ་འཛིན་ལས་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༢ ཚེས་ ༡༠ ཉིན་རང་ཅག་བོད་གངས་ཅན་པ་རྣམས་ཀྱི་མགོན་སྐྱབས་དཔུང་གཉེན་བླ་ན་མ་མཆིས་པ་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་འཛམ་གླིང་ནང་ཆེས་སྙན་པར་གྲགས་པའི་ནོ་བེལ་ཞི་བདེའི་གཟེངས་རྟགས་ཕུལ་ནས་ལོ་ངོ་ ༢༡ འཁོར་བའི་དགའ་སྟོན་གྱི་མཛད་སྒོ་སྔ་དྲོ་ཆུ་ཚོད་ ༩ ཐོག་ལྡི་ལི་བསམ་ཡས་གླིང་དུ་སྲུང་བརྩི་གཟབ་རྒྱས་ཞུས་ཡོད། དེ་ཡང་ལྡི་ལི་ཁུལ་དུ་གནས་སྡོད་བོད་རིགས་སེར་སྐྱ་མི་མང་རྣམས་རང་ལུགས་ཀྱི་གཟབ་མཆོར་ལེགས་པརགྱོན་ཏེ་ས་གནས་བོད་ཁྱིམ་ཉིན་སློབ་ཏུ་འདུ་འཛོམས་ཀྱིས་གངས་ལྗོངས་བསྟན་སྲུང་དམར་ནག་གིས་དབུས་དཀར་ཕྱོགས་སྐྱོང་བའི་སྲུང་མའི་འཕྲིན་སྐུལ་དང་སྐུ་ཁམས་མཐུན་པའི་སྐུ་རླུང་དར་འཛུགས། དར་ཆེན་ལ་ན་བཟའ་སྒྲོན་གནང་བ་དང་། ཆབས་ཅིག་བསངས་མཆོད་གཟབ་རྒྱས་ཕུལ་ཏེ་ལྷ་རྒྱལ་འཐེན། དེ་རྗེས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་སློབ་གྲྭའི་ཚོགས་ཁང་ནས་སེར་སྦྲེངས་དང་བཅས་གདན་ཞུས་ཀྱིས་བཞུགས་ཁྲིར་འཁོད་མཚམས་སྐུ་མགྲོན་རྣམས་དང་། ལས་བྱེད། སེར་སྐྱ་མི་མང་བཅས་ནས་རིམ་བཞིན་༸རྒྱལ་བའི་སྐུ་པར་མཐོང་གྲོལ་རིན་པོ་ཆེར་རྟེན་འབྱུང་མཇལ་དར་ཕུལ། དེ་ནས་བོད་སྒར་བསམ་ཡས་གླིང་བརྒྱ་འཐུས་ཡིག་ཚང་གིས་མཛད་སྒོར་ཕེབས་མི་ཡོངས་ལ་གསོལ་ཇ་དང་འབྲས་སིལ་ཕུལ་མཚམས། བོད་ཁྱིམ་ཉིན་མོའི་སློབ་ཕྲུག་རྣམས་ནས་རྔ་རོལ་དང་བཅས་འཕགས་བོད་གཉིས་ཀྱི་རྒྱལ་གླུ་དང་། ནོ་བེལ་ཞི་བདེའི་གཟེངས་རྟགས་ཀྱི་བསྟོད་དབྱངས་མཉམ་གཞས་ཕུལ་གྲུབ་བསྟུན། བོད་སྒར་བསམ་ཡས་གླིང་གི་ས་གནས་འགོ་འཛིན་ཚང་ལ་ལེགས་སྐྱེས་རྡོ་རྗེ་ལགས་ཀྱིས་སྐུ་མགྲོན་རྣམས་ལ་ཕེབས་བསུའི་འཚམས་འདྲི་དང་སྦྲགས་དུས་དྲན་དང་འབྲེལ་བའི་གསུང་བཤད་གནང་། དེ་རྗེས་ལྡི་ལི་དོན་གཅོད་ཀྱི་དྲུང་ཆེ་ཀརྨ་ཆོས་དབྱིངས་ལགས་ཀྱིས་དཔལ་ལྡན་རང་གཞུང་བཀའ་ཤག་གི་གསུང་བཤད་སྒྲོགས་སྦྱང་གནང་། དེ་ནས་བོད་མི་མང་སྤྱི་འཐུས་ཆོས་སྐྱོང་དབང་ཕྱུག་ལགས་ཀྱིས་བོད་མི་མང་སྤྱི་འཐུས་ལྷན་ཁང་གི་གསུང་བཤད་སྒྲོགས་སྦྱང་སྟེ་ཧིན་སྐད་ཐོག་དུས་དྲན་དང་འབྲེལ་བའི་གསུང་བཤད་གནང་བ་དང་ལྷན་རྒྱ་གར་དཔོན་རིགས་ཁག་ལ་ཐུགས་རྗེ་ཆེ་ཞུས། དེ་རྗེས་ས་གནས་འཁྲུངས་སྐར་གོ་སྒྲིག་ཚོགས་ཆུང་ནས་༸གོང་ས་མཆོག་གི་འཁྲུངས་སྐར་ནས་བཟུང་ལོ་འཁོར་མོར་རྣམ་དཀར་གྱི་ལས་འཆར་གང་མང་ཞིག་སྤེལ་རྒྱུར་གཏན་འབེབ་གནང་བ་གཞིར་བཟུང་རམ་སྒར་དུ་ཉ་གང་མང་སྲོག་བླུ་ཚེ་ཐར་བཏང་། ཕྱོགས་མཚུངས་བོད་མི་མང་སྤྱི་འཐུས་ཡེ་ཤེས་ཕུན་ཚོགས་ལགས་ཀྱིས་༸གོང་ས་མཆོག་གི་འཇིག་རྟེན་སྐྱེ་འགྲོ་སྤྱི་དང་། ཁྱད་པར་བོད་མི་ཡོངས་ལ་ཆོས་སྲིད་ལུགས་གཉིས་ཀྱི་བཀའ་དྲིན་ཇི་ལྟར་གཞལ་བར་བསྐྱངས་པའི་ཚུལ་ངོ་སྤྲོད་གནང་རྗེས་བོད་ཁྱིམ་ཉིན་སློབ་ཁང་གི་སློབ་ཕྲུག་རྣམས་ནས་གཞས་སྣ་ཁག་གཅིག་འཁྲབ་སྟོན་གནང་མཚམས་བོད་སྒར་བསམ་ཡས་གླིང་བརྒྱ་དཔོན་རྡོ་རྗེ་དོན་གྲུབ་ལགས་ཀྱིས་ཐུགས་རྗེ་ཆེ་ཞུས་ཏེ་སྐུ་མགྲོན་རྣམས་དང་མི་མང་ཡོངས་ལ་བོད་སྒར་བསམ་ཡས་གླིང་བརྒྱ་འཐུས་ཡིག་ཚང་གིས་ཉིན་གུང་གསོལ་ཚིགས་རྒྱས་འབུལ་བཤམས་ཏེ་དུས་སྟོན་དགའ་སྤྲོའི་རྣམ་པའི་ཁྲོད་དུ་གྲོལ་བ་བཅས།།