༢༠༡༠ ཟླ་ ༡༢ ཚེས་ ༡༧ རེས་གཟའ་པ་སངས།
༄༅། །འདི་གར་བོད་ཡིག་ཚན་པའི་སྤྱི་ཁྱབ་རྩོམ་སྒྲིག་པས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཕྱི་ཟླ་ ༡༢ ཚེས་ ༡༦ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འབྲས་ལྗོངས་གནས་ཀྱི་ལྟེ་བ་བྲག་དཀར་བཀྲ་ཤིས་སྡིངས་ཀྱི་ཆོས་རྒྱལ་ལྷ་ཁང་ནང་ཆིབས་སྒྱུར་བསྐྱངས་ཏེ་གནས་གཟིགས་གྲུབ་མཚམས་བཞུགས་ཁྲིར་༸ཞབས་སོར་འཁོད་རྗེས་རྟེན་འབྲེལ་གྲོ་མ་འབྲས་སིལ་དང་གསོལ་ཇ་འདེགས་འབུལ་ཞུས། དེ་ནས་དགོན་དེའི་དགེ་འདུན་པ་རྣམས་དང་ས་གནས་གྲོས་ཚོགས་འཐུས་མིས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་ཞུས་ཡོད།
དེ་རྗེས་༸གོང་ས་མཆོག་གིས་དེར་འདུས་དགེ་འདུན་པ་དང་མི་མང་བཅས་ཁྱོན་མི་གྲངས་ ༣༠༠ བརྒལ་བར་ནང་ཆོས་སློབ་སྦྱོང་བྱེད་དགོས་པ་སོགས་ཀྱི་བཀའ་སློབ་བཀའ་དྲིན་ཆེ་བ་སྩལ་ཡོད་པ་མ་ཟད་ཐུབ་པའི་གཟུངས་སྔགས་དང་། མ་ཎི། སྒྲོལ་མ། བཛྲ་གུ་རུ། ཨ་ར་པཙ། རྟ་མགྲིན་བཅས་ཀྱི་གཟུངས་སྔགས་ཀྱང་ལྗགས་ལུང་བཀའ་དྲིན་ཆེ་བ་སྩལ། དེ་ནས་དེར་བཅར་བའི་འབྲས་ལྗོངས་གཞུང་གི་བློན་ཆེན་གཉིས་དང་ས་གནས་རྫོང་དཔོན་གྱི་ལས་རོགས་སོགས་གནད་ཡོད་མི་སྣར་མཇལ་ཁ་དང་གསུང་མོལ་མཛད་ཡོད། དེ་དག་ཡོངས་སུ་གྲུབ་མཚམས་བྲག་དཀར་བཀྲ་ཤིས་སྡིངས་དགོན་དེའི་ཉེ་འདབས་སུ་འབྲས་ལྗོངས་གཞུང་ཕྱོགས་ནས་དམིགས་བསལ་གསར་དུ་བཞེངས་པའི་མཚམས་ཁང་དུ་ཆིབས་སྒྱུར་བཀའ་དྲིན་བསྐྱངས་ཏེ་ཉིན་གཉིས་རིང་གི་སྐུ་མཚམས་ལྗགས་ཐུན་དབུ་འཛུགས་མཛད་ཡོད།
ཐེངས་འདི་ནི་༸གོང་ས་༸སྐྱབས་མགོན་ཆེན་པོ་མཆོག་སྦས་ཡུལ་འབྲས་མོའི་ལྗོངས་ཀྱི་མངའ་ཁུལ་དུ་ཆིབས་སྒྱུར་བསྐྱངས་ཐེངས་དྲུག་པ་དེ་ཡིན་འདུག དེ་ཡང་ཐེངས་དང་པོ་ཕྱི་ལོ་ ༡༩༥༦ ལོའི་ཕྱི་ཟླ་ ༡༡ ནང་རྒྱ་གར་བྱང་ཆུབ་ཆེན་པོའི་ཆོས་ཚོགས་ནས་སངས་རྒྱས་མྱ་ངན་ལས་འདས་ཏེ་ལོ་ངོ་ ༢༥༠༠ འཁོར་བའི་དྲན་གསོའི་དུས་ཆེན་སྐབས་འབྲས་ལྗོངས་བརྒྱུད་ཆིབས་སྒྱུར་བསྐྱངས་ཡོད་པ་དང་། སྐབས་དེར་ཕྱིར་ཆིབས་ཞལ་བསྒྱུར་སྐབས་རི་རྩེར་གངས་བབས་ཆེ་བས་བོད་ཀྱི་ཕེབས་ལམ་མ་ཕྱེ་བར་ཟླ་གཅིག་མིན་ཙམ་འབྲས་ལྗོངས་སུ་བཞུགས་ཞག་མཛད་སྐབས་ཆོས་འབྲེལ་དང་བཀའ་སློབ་སོགས་སྩལ་ཡོད། ཐེངས་གཉིས་པ་ཕྱི་ལོ་ ༡༩༨༡ ལོའི་ཕྱི་ཟླ་ ༡༠ ཚེས་ ༡༦ ནས་ ༢༦ བར་སྒང་ཏོག་གི་རྒྱལ་སར་རྒྱལ་སྲས་ལག་ལེན་སོ་བདུན་མ་དང་སྤྱན་རས་གཟིགས་ཀྱི་དབང་སོགས་ཀྱི་ཆོས་འབྲེལ་དང་། དེ་བཞིན་གསང་ཆེན་པདྨ་ཡང་རྩེ་དང་བཀྲ་ཤིས་སྡིངས་དགོན་སོགས་དགོན་སྡེ་ཁག་གཅིག་ལ་ཆིབས་སྒྱུར་སོགས་བསྐྱངས། ཐེངས་གསུམ་པ་ཕྱི་ལོ་ ༡༩༩༢ འབྲས་ལྗོངས་མངའ་སྡེ་གཞུང་གིས་གདན་ཞུས་ལྟར་ཉིན་གྲངས་ལྔ་རིང་ནུབ་འབྲས་ལྗོངས་བཀྲ་ཤིས་སྡིངས་དང་རྒྱལ་ས་སྒང་ཏོག་སོགས་སུ་ཆིབས་སྒྱུར་གྱིས་དཔལ་དུས་འཁོར་དབང་ཆེན་ཐེངས་བཅོ་བརྒྱད་པ་སྩལ་ཡོད། ཐེངས་བཞི་པ་ཕྱི་ལོ་ ༡༩༩༧ ཟླ་ ༡༠ ཚེས་ ༢༡ ནས་ལྷོ་འབྲས་ལྗོངས་ཀྱི་རྫོང་གནམ་རྩེར་ཆིབས་སྒྱུར་བཀའ་དྲིན་བསྐྱངས་ཏེ་ཕྱི་ཚེས་ ༢༤ བར་མཛད་འཕྲིན་བསྐྱངས་ཡོད། ཐེངས་ལྔ་པ་ཕྱི་ལོ་ ༢༠༠༥ ལོའི་ཕྱི་ཟླ་ ༤ ཚེས་ ༢༠ ནས་ ༢༧ བར་བདུན་གཅིག་རིང་སྒང་ཏོག་དང་ར་བང་ལ། རྣམ་རྩེ་སོགས་ནང་༸ཞབས་སོར་འཁོད་དེ་མཛད་འཕྲིན་བསྐྱངས་ཡོད། ཐེངས་འདིར་པདྨ་པ་ཡང་རྩེ་དང་བཀྲ་ཤིས་སྡིངས། ར་བང་ལ། རྒྱལ་ས་སྒང་ཏོག་བཅས་སུ་ཆིབས་སྒྱུར་དང་མཛད་འཕྲིན་རྒྱ་ཆེ་སྐྱོང་བཞིན་ཡོད་པ་བཅས།།
