༢༠༡༠ ཟླ་ ༡༢ ཚེས་ ༡༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༡༢ ཚེས་ ༨ ནས་ཉིན་གཉིས་རིང་མཉམ་མེད་དྭགས་པོ་ལྷ་རྗེའི་ཐུགས་སྲས་གྲུབ་ཐོབ་ཁམས་པ་མི་གསུམ་གྱི་ཡ་གྱལ། ཁམས་པ་དབུ་སེའམ་རྗེ་ཀརྨ་པ་སྐུ་ཕྲེང་དང་པོ་དུས་གསུམ་མཁྱེན་པ་མཆོག་བོད་མདོ་ཁམས་ཏྲེ་ཤོད་དུ་སྐུ་འཁྲུངས་ནས་མི་ལོ་ཧྲིལ་པོ་ ༩༠༠ འཁོར་བར་རྗེས་དྲན་གྱི་མཛད་སྒོ་འདི་བཞིན་ལོ་ངོ་གཅིག་རིང་འཛམ་གླིང་རྒྱལ་ཁབ་དུ་མར་རྣམ་པ་སྣ་ཚོགས་ཀྱི་སྒོ་ནས་སྲུང་བརྩི་ཞུ་རྒྱུའི་དབུ་འབྱེད་མཛད་སྒོ་གནས་མཆོག་རྡོ་རྗེ་གདན་དུ་ཚོགས་ཡོད།
མཛད་སྒོ་ཉིན་དང་པོའི་ཞོགས་པ་ཆུ་ཚོད་ ༩།༠༠ ཐོག་རྡོར་གདན་ཡོངས་དགེ་གཏེར་སྒར་དགོན་གྱི་ཉེ་འགྲམ་དགུ་བརྒྱའི་དུས་དྲན་མཛད་སྒོའི་དབུ་གུར་ནང་རྒྱལ་བ་ཀརྨ་པ་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་ཚོགས་མགོན་དུ་ཕེབས་པ་དང་། གཞན་ཡང་འཇམ་མགོན་ཀོང་སྤྲུལ་རིན་པོ་ཆེ་དང་། གོར་ཤྲཱི་རྒྱལ་ཚབ་རིན་པོ་ཆེ། བཙན་བྱོལ་བོད་གཞུང་གི་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་། ཆོས་རིག་བཀའ་བློན་ཚེ་རིང་ཕུན་ཚོགས། འཕྲོད་བསྟེན་བཀའ་བློན་དཔལ་འབྱོར་ཚེ་རིང་། བཀའ་བློན་ཁྲི་ཟུར་འཇུ་ཆེན་ཐུབ་བསྟན་རྣམ་རྒྱལ། སྤྱི་འཐུས་ཚོགས་གཙོ་ཟུར་པ་ཀརྨ་ཆོས་འཕེལ། ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་པའི་སྤྱི་འཐུས་རྒྱུན་ལས་རྣམ་པ། ས་སྐྱ་ཁྲི་འཛིན་གོང་མ་རིན་པོ་ཆེའི་སྐུ་ཚབ། འབྲི་གུང་ཆེ་ཚང་རིན་པོ་ཆེའི་སྐུ་ཚབ། འབྲུག་ཁམས་སྤྲུལ་རིན་པོ་ཆེའི་སྐུ་ཚབ། རྒྱུད་སྟོད་མཁན་རིན་པོ་ཆེ། གཞན་ཡང་མཉམ་མེད་དྭགས་པོ་བཀའ་བརྒྱུད་ཀྱི་བླ་སྤྲུལ། མཁན་པོ། གྲྭ་ཚང་ཁག་གི་ཕྱག་མཛོད་སོགས་གནད་ཡོད་སྐུ་མགྲོན་ ༣༠༠ ཙམ་དང།
པར་ལེན་བསོད་སྟོབས།
རྒྱལ་ཕྱི་ནང་ནས་ཕེབས་པའི་སེར་སྐྱ་མི་གྲངས ༦༠༠༠ ལྷག་འཛོམས་ནས་དུང་རྒྱ་རོལ་མོ་འཕན་གདུགས་རྒྱལ་མཚན་སོགས་མཆོད་པའི་སྤྲིན་ཕུང་དཔག་ཏུ་མེད་པས་མདུན་བསུས་ཏེ་རྗེ་དུས་གསུམ་མཁྱེན་པའི་སྐུ་གསུང་བྱོན་མ་གདན་འདྲེན་ཞུས་རྗེས་མཛད་སྒོའི་གཙོ་སྐྱོང་པ་གོར་ཤྲཱི་རྒྱལ་ཚབ་རིན་པོ་ཆེ་མཆོག་གིས་ཤིས་ཚིག་བརྗོད་ནས་ཚོགས་མི་ཡོངས་ལ་འཚམས་འདྲི་གནང་།
དེ་རྗེས་རྒྱལ་བ་ཀརྨ་པ་རིན་པོ་ཆེ་མཆོག་དང་། དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་རྣམ་གཉིས་ནས་མཛད་སྒོ་དབུ་འབྱེད་ཀྱི་སྣང་གསལ་ཞལ་དབྱེ་དང་། དགུ་བརྒྱའི་དུས་དྲན་དང་འབྲེལ་བའི་དཔེ་དེབ་ཁག་གཉིས་དབུ་འབྱེད་གནང་རྗེས་རྒྱ་གར་ལྷོ་ཕྱོགས་ནས་གདན་དྲངས་པའི་སྲོལ་རྒྱུན་རོལ་དབྱངས་དང་ལྷག་པར་དོ་ཧཱ་རྡོ་རྗེའི་མགུར་དབྱངས་ལ་བྱང་ཆུབ
་པ་ཁག་གཅིག་གིས་དོ་ཧཱ་རྡོ་རྗེའི་མགུར་ལེགས་སྦྱར་གྱི་སྐད་ཐོག་ནས་གདངས་སུ་གྱེར།
དཔལ་ལྡན་རང་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྩལ་བའི་གསུང་འཕྲིན་རིན་པོ་ཆེ་དང་། ས་སྐྱའི་སྤྱི་འཐུས་ག་གཟི་དགེ་བཤེས་ཚེ་རིང་པོ་མཆོག་གིས་ས་སྐྱ་གོང་མ་རིན་པོ་ཆེའི་གསུང་འཕྲིན། རུམ་བཏེག་ཕྱག་མཛོད་ཀརྨ་ཅུང་རྒྱལ་པས་རྒྱ་གར་བྷི་ཧར་མངའ་སྡེའི་སྤྱི་ཁྱབ་བློན་ཆེན་དང། འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་གཉིས་ཀྱི་གནས་འཕྲིན་བཅས་མཛད་སྒོ་འདིར་ཆེད་དུ་གནང་བའི་གསུང་འཕྲིན་དང་གནས་འཕྲིན་ཁག་སྒྲོགས་སྦྱང་ཞུས།
དཔལ་རྒྱལ་བ་ཀརྨ་པ་མཆོག་གིས་དུས་དྲན་མཛད་སྒོ་འདི་བཞིན་ཚོགས་དགོས་པའི་དམིགས་ཡུལ་དང་རྒྱུ་མཚན་སྐོར་ལ་གསུང་བཤད་གནང་དོན། ད་རེས་མཛད་སྒོར་ཕེབས་པ་ཚང་མར་འཚམས་འདྲི་དང་སྦྲགས་ང་རང་ལྟ་བུར་མཚོན་ན་ལོ་དགུ་བརྒྱ་ལྷག་གི་ལོ་རྒྱུས་ཡོད་པའི་ཀརྨ་བཀའ་བརྒྱུད་ཀྱི་བསྟན་པའི་ཤིང་རྟ་ཆེན་པོ་རྗེ་ཀརྨ་པའི་ཐུགས་རྗེའི་གྲིབ་བསིལ་གྱི་འོག་ཏུ་འཚོ་མཁན་ཞིག་ཡིན་པའི་ཆ་ནས་ད་རེས་ཀྱི་མཛད་སྒོ་འདི་བཞིན་ལོ་རྒྱུས་ཀྱི་བྱུང་རབས་ནང་རྗེ་ཀརྨ་པས་རྒྱལ་བསྟན་འཛིན་སྐྱོང་སྤེལ་གསུམ་གྱི་མཛད་པ་ཇི་བསྐྱངས་རྣམས་གསལ་འདེབས་དང། མ་འོངས་པར་ཡང་བསྟན་པ་མི་ཉམས་རྒྱུན་འཛིན་ཡོང་ཐབས་ཀྱི་ཆེད་དུ་དམིགས་པ་ཞིག་ཡིན། ཞེས་དང། གཞན་ཡང་ད་ལྟའི་དུས་རབས་འདིར་ཚན་འཕྲུལ་སོགས་ཕྱིའི་དངོས་པོ་ཡར་རྒྱས་ཕྱིན་ཡོད་ཀྱང་ནང་སེམས་ཀྱི་བདེ་བ་
པར་ལེནསྤྱི་འཐུས་དགེས་བཤེས་་སྨོན་ལམ་མཐར་ཕྱིན།
དེ་ཙམ་ཡར་རྒྱས་ཡོང་གི་མེད་སྟབས་གཞོན་སྐྱེས་མི་རབས་རྣམས་ཀྱི་ནང་ཆོས་ལས་གསུངས་པའི་ཡ་རབས་བཟང་སྤྱོད་ལས་བརྩམས་ཏེ་ནང་སེམས་ཀྱི་བདེ་བ་བསྐྲུན་ཐབས་ལ་འབད་འབུངས་ཡོང་བའི་རེ་བ་བཅས་ཀྱིས་འདི་བཞིན་གོ་སྒྲིག་གནང་བ་ཡིན་སྐོར་གྱི་གསུང་བཤད་སྙིང་གི་བདུད་རྩི་ཅི་དགའ་རུ་གནང་ཡོད།
དམིགས་བསལ་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་འཕྲིན་སྒྲོགས་སྦྱང་གནང་བའི་ནང། ཀརྨ་པ་དུས་གསུམ་མཁྱེན་པ་མཆོག་གིས་གངས་རིའི་ལྗོངས་འདིར་མཛད་འཕྲིན་བསྐྱངས་པ་ཁག་ལ་སྒོ་གསུམ་གུས་པས་དྲིན་གཟོ་དང་མངོན་བསྟོད་ཞུ་བཞིན་ཡོད་པ་དང། བསྟན་པ་ཕྱི་དར་གྱི་ཉག་ཕྲའི་གནས་སྟངས་འོག་བོད་གངས་ཅན་གྱི་ལོ་རྒྱུས་འཕེལ་ཕྱོགས་དང་། མི་རིགས་ཀྱི་ལས་དབང། རྒྱལ་བསྟན་དར་གུད་ཀྱི་སོ་མཚམས་སུ་ཕན་ནུས་རླབས་ཆེན་བསྐྱངས་པ། དེ་བཞིན་སྐུ་ཕྲེང་བཅུ་དྲུག་པ་མཆོག་གི་མཛད་འཕྲིན་ལ་བསྔགས་བརྗོད།
ཁྱད་པར་དུ་སྒྲུབ་བརྒྱུད་བསྟན་པའི་གཙུག་རྒྱན་དཔལ་རྒྱལ་བ་ཀརྨ་པ་ཨོ་རྒྱན་འགྲོ་འདུལ་འཕྲིན་ལས་རྡོ་རྗེ་མཆོག་རྒྱ་ནག་གི་དབང་བསྒྱུར་འོག་ནས་བཤོལ་ཕེབས་ཀྱིས། དེང་རྒྱ་གར་རང་དབང་ལུང་པའི་ནང་གསན་བསམ་སློབ་གཉེར་ལ་རྟག་འགྲུས་དབྱེར་མེད་ངོས། འཁོར་ལོ་གསུམ་གྱི་མཛད་འཕྲིན་ཡར་ངོའི་ཟླ་ལྟར་འཕེལ་བཞིན་པར་བཀྲ་ཤིས་བདེ་ལེགས་ཀྱི་མཚམས་སྨོན་དང་སྦྲགས། དམ་པ་གོང་མའི་རྣམ་ཐར་བདག་གིར་བཞེས་ཏེ་བོད་ཀྱི་ཆོས་དང་རིག་གཞུང་ཡུན་གནས་སླད་སྙིང་སྟོབས་གོ་ཆ་བཙན་པར་བགོ་གནང་ཡོང་བའི་གསོལ་འདེབས་དང་། གང་མྱུར་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ་ཞབས་སོར་འགོད་རྒྱུའི་སྨོན་འདུན་བཅས་ཞུས་གནང་ཡོད་པ་རེད།
སྐུ་མགྲོན་གཙོ་བོ་བཀའ་བློན་ཁྲི་པ་མཆོག་ནས་གསུང་བཤད་གནང་དོན། ཐེངས་འདིའི་མཛད་སྒོ་འདི་ཉིད་ལོ་རྒྱུས་ཀྱི་བྱུང་རབས་ནང་དོན་སྙིང་ལྡན་པ་དང་མ་འོངས་པར་རྒྱལ་བསྟན་སྤྱི་དང་ཁྱད་པར་བཀའ་བརྒྱུད་པའི་བསྟན་པ་འཛིན་སྐྱོང་གནང་ཕྱོགས་སྐོར་ཚང་མས་ཐུགས་ལ་འཛིན་དགོས་པའི་གསལ་འདེབས་ཤིག་ཆགས་ཀྱི་ཡོད་ཚུལ་དང་། གཞན་ཡང་ཀརྨ་པ་སྐུ་ཕྲེང་ན་རིམ་གྱི་མཛད་རྗེས་གཙོ་བོ་ཁག་རེ་རེ་བཞིན་ངོ་སྤྲོད་དང་སྦྲགས་ང་ཚོ་བོད་དུ་སངས་རྒྱས་ཀྱི་བསྟན་པ་དར་ནས་ལོ་ངོ་ཆིག་སྟོང་ལྷག་སོང་ཡོད་པ་དང། བོད་སིལ་བུའི་སྐབས་རྒྱལ་བསྟན་ཉག་ཕྲ་བའི་སྐབས་སུ་རྗེ་ཀརྨ་པ་སྐུ་ཕྲེང་ན་རིམ་གྱིས་རྒྱ་ནག་གོང་མ་རིམ་བྱོན་གྱི་དབུ་བླར་ཕེབས་ནས་བསྟན་པ་སྟོབས་ཀྱིས་སྐྱོང་བའི་བཀའ་དྲིན་བརྗོད་ཀྱིས་མི་ལང་པ་བསྐྱངས་ནས་ད་བར་མི་ལོ་ ༩༠༠ འགྲོ་གི་ཡོད་དུས་ང་ཚོས་ངེས་པར་དུ་རྗེས་དྲན་ཞུ་འོས་པ་ཞིག་ཡིན་པ་དང། ཁྱད་པར་ཀརྨ་པ་སྐུ་ཕྲེང་དགུ་པ་ནས་བཟུང་༸གོང་ས་སྐུ་ཕྲེང་རིམ་བྱོན་བར་འབྲེལ་བ་དམ་ཟབ་བྱུང་ཡོད་ལ། ལྷག་པར་༸གོང་ས་སྐུ་ཕྲེང་བཅུ་བཞི་པ་མཆོག་དང་ཀརྨ་པ་སྐུ་ཕྲེང་བཅུ་དྲུག་པ་རྣམ་གཉིས་ཕན་ཚུན་ཐུགས་སྣང་གཅིག་འདྲེས་ཀྱིས་རྒྱ་དཀར་ནག་སོགས་ཡུལ་གྲུ་དུ་མར་ལྷན་ཅིག་ཏུ་ཕེབས་པ། བཙན་བྱོལ་དུའང་བོད་ཀྱི་བདེན་མཐའ་བསལ་ཐབས་ཆེད་༸གོང་ས་སྐྱབས་མགོན་ཆེན་པོ་མཆོག་ལ་དབུ་འོག་དཔུང་འདེགས་ཀྱི་མཛད་འཕྲིན་རླབས་པོ་ཆེ་བསྐྱངས་ཡོད་པས་མཚོན་བོད་བསྟན་སྲིད་ཀྱི་ཆེད་དུ་སྐུ་ངལ་མང་པོ་བསྐྱོན་ཡོད་པ་དང། ད་ལྟའི་སྐུ་ཕྲེང་བཅུ་བདུན་པ་ཨོ་རྒྱན་འཕྲིན་ལས་རྡོ་རྗེ་མཆོག་ཁོང་ལྟ་བུར་མཚོན་ན་ད་ལྟ་བར་དུ་སྐུ་ཕྲེང་བཅུ་དྲུག་བར་ཕེབས་པའི་མཛད་པ་ཚང་མ་བདག་གིར་བཞེས་ཐུབ་པའི་རེ་བ་དང་གོ་སྐབས་གཉིས་ཀ་ཡོད་པ་རེད། ཁོང་རྣམ་པའི་མཛད་འཕྲིན་རྒྱས་མིན་དེ་གདུལ་བྱའི་བསོད་ནམས་ཀྱི་དཔུང་པས་འཁྱོག་མིན་ལ་རག་ལུས་ཡོད་པས་གདུལ་བྱ་ཚུལ་རོལ་མཐོང་བ་རྣམས་བསོད་ནམས་མ་ཡིན་པའི་རྒྱུ་ཚོགས་འཕེལ་བའི་སྐབས་བསྟན་འཛིན་གྱི་སྐྱེས་ཆེན་ཚོར་དད་ལོག་དང་ཕན་ཚུན་ཐུགས་སྣང་མ་གཤིན་པའི་རྣམ་པ་མཐོང་བ་ལས་ཁོང་རྣམ་པ་ནི་ཐུགས་ཆོས་ཀྱི་དབྱིངས་ལས་གཡོ་བ་མེད་པ་ཤ་སྟག་ཡིན་དུས་ཚུར་མཐོང་གི་སྣང་ངོར་གྲུབ་པ་ནང་བཞིན་ཡོད་མི་སྲིད། དེས་ན་ང་ཚོ་བོད་གངས་ཅན་པའི་བསྟན་འཛིན་སྐྱེས་ཆེན་ཚོའི་མཛད་འཕྲིན་རྒྱས་པར་གདུལ་བྱ་རྣམས་ཀྱིས་བསོད་ནམས་གསོག་རྒྱུ་གལ་ཆེན་ཡིན་སྐོར་ཀྱང་གསུངས་སོང་།
ལྷག་པར་ཁོང་སྐུ་སྒེར་གྱི་ངོས་ནས་ཀྱང་ཀརྨ་པར་འབྲེལ་བ་ཆེན་པོ་ཞིག་ཡོད་པ་ནི་ང་ཚོའི་ལུང་པའི་མི་དེ་ཚོའི་ཁ་རྒྱུན་དུ་འཇགས་བསྡད་པ་ཞིག་ལ་གནད་དོན་གལ་ཆེན་ཞིག་གོ་བ་དང་མཐོང་བ་སོགས་ཀྱི་སྐབས། ལམ་སེང་ཨོའོ་ཀརྨ་པ་མཁྱེན་ཞེས་ཀུན་གྱིས་ངག་ནས་རང་བྱུང་གིས་འཐོན་བཞིན་པ་ཞིག་ཡོད། འདི་ནི་རྗེ་ཀརྨ་པཀ་ཤི་ཁ་བ་དཀར་པོའི་གནས་སུ་ཡུན་རིང་བཞུགས་པ་ལོ་རྒྱུས་སུ་གསལ་ཡོད་པ་དེའི་སྐབས་ནས་འདི་བཞིན་ང་ཚོའི་ལུང་པར་ངག་རྒྱུན་དུ་འཇགས་པ་ཞིག་ཡིན་ས་རེད། ཅེས་གསུངས། གཞན་ཡང་ད་རེས་ཁོང་མཛད་སྒོ་འདིར་ངོ་བཅར་ཐུབ་པ་དེ་ཆེས་སྐལ་པ་བཟང་པོ་ཞིག་བྱུང་ལ། ང་ད་ལྟ་བཀའ་ཁྲིའི་ལས་ཡུན་རྫོགས་མེད་སྟབས་ལོ་རྒྱུས་ཀྱི་དེབ་ཐེར་ནང་འཁོད་པའི་བྱ་བ་རླབས་ཆེན་ཞིག་ཀྱང་ཆགས་པ་རེད། ཅེས་སོགས་གསུངས་སོང་།
དེ་རྗེས་བོད་གཞུང་ཟློས་གར་ཚོགས་པས་ཀརྨ་པ་དུས་གསུམ་མཁྱེན་པའི་བསྟོད་ཚོགས་དང་འབྲེལ་བའི་གླུ་གར་མཁའ་ཁྱབ་མ་ཞེས་པ་ཚོགས་ཞུགས་པ་ཡོངས་ལ་གཟིགས་འབུལ་ཞུས་ཏེ་མཛད་སྒོ་ཐོག་མ་དེ་རྒྱལ་ཁའི་ངང་ནས་གྲོལ་ཡོད་པ་རེད།
ཕྱི་ཚེས་ ༨ ཉིན་གྱི་དགོང་མོ་ཆུ་ཚོད་ ༥།༣༠ ནས་ ༩།༣༠ བར་གཏེར་སྒར་འདུ་ཁང་ནང་རྒྱལ་བ་ཀརྨ་པ་མཆོག་དང་ཡབ་སྲས་བླ་སྤྲུལ་རྣམ་པ། དགེ་སློང་ཕ་མ་རྣམ་པ། ལོ་གསུམ་ཕྱོགས་གསུམ་མཐར་སོན་གྱི་སེར་སྐྱ་ཕོ་མོ་རྣམས་ཀྱིས་དུས་མཁྱེན་བླ་སྒྲུབ་ཀྱི་ཚོགས་འཁོར་རྒྱ་ཆེ་བསྐོར་གནང་མཛད།
ཀརྨ་པ་དགུ་བརྒྱའི་དུས་དྲན་གྱི་དབུ་འབྱེད་མཛད་སྒོའི་ཉིན་གཉིས་པ་སྟེ་ ༢༠༡༠ ཟླ་ ༡༢ ཚེས་ ༩ ཉིན་གྱི་ཞོགས་པ་གཏེར་སྒར་དགོན་གྱི་ཉེ་འདབས་གསུང་ཆོས་རྭ་བའི་དབུ་གུར་ནང་ཞོགས་པ་ཆུ་ཚོད་ ༥།༣༠ ནས་ ༩།༣༠ བར་རྒྱལ་བ་ཀརྨ་པ་མཆོག་དང་ཡབ་སྲས་བླ་སྤྲུལ་རྣམ་པ། དགེ་འདུན་པ་སྟོང་ཕྲག་མང་པོ་དང་དེ་བཞིན་རང་གཞུང་གི་བཀའ་བློན་དང་སྤྱི་འཐུས། སྤྱི་ཟུར་ཁག་ཅིག་བཅས་སེར་སྐྱ་མང་པོ་འདུ་འཛོམས་ཀྱིས་བསང་གསོལ་རྒྱས་འབུལ་དབུ་འཛུགས་སྐབས་རྒྱལ་བ་མཆོག་གིས་གསུང་བཤད་གནང་དོན།
དེ་རིང་གསུང་ཚོགས་ཀྱི་ཡི་དམ་གཙོ་བོ་མ་ཧྭ་ཀ་ལ་ཡིན་ཅིང་། མ་ཧྭ་ཀ་ལའི་ལོ་རྒྱུས་རྒྱབ་ལྗོངས་སུ་དཔྱད་སྐབས་དེ་ཉིད་ཐོག་མ་ནས་ཀཾ་ཚང་དང་ཐུན་མོང་མ་ཡིན་པའི་འབྲེལ་བ་ཡོད་པའི་ལྷ་ཞིག་ཡིན་པས། དགུ་བརྒྱའི་དུས་དྲན་ལ་མགོན་པོ་དང་འབྲེལ་བའི་མཛད་རིམ་གོ་སྒྲིག་བྱ་རྒྱུ་འདི་བཞིན་ཡི་དམ་མགོན་པོའི་བཀའ་དྲིན་རྗེས་དྲན་མཚོན་བྱེད་ཕྱིར་ཡིན་ཚུལ་གསུངས་པ་དང།
གཞན་ཡང་ཚོགས་ཕེབས་པའི་འདུས་པ་ཡོངས་ལ། རྒྱལ་བ་མཆོག་གིས་རེ་སྐུལ་གནང་དོན། དགེ་འདུན་ནང་ཕན་ཚུན་ཐུགས་མཐུན་ཁྲིམས་གཙང་ཡོང་བ་དང་། ལྷག་པར་བླ་སློབ་དབར་ཐུགས་མཐུན་དམ་གཙང་ཡོང་དགོས་པ་ཤིན་ཏུ་གནད་ཆེ་བ་དང་། བསྟན་པ་འཛིན་པའི་བླ་མ་ཡང་མིང་དང་དགོན་པ་ཆེན་པོ་ཡོད་པ་ཙམ་གྱིས་ཆེན་པོ་དང་ལུང་རྟོགས་ཀྱིས་ཡོན་ཏན་མི་འབྱུང་བར་བློ་ཆོས་སུ་སོང་ཞིང་རང་སེམས་ཞི་དུལ་བག་ཡོད་བྱ་རྒྱུ་གལ་ཆེ་བ་དང་། ཁྱད་པར་རང་རེ་བཀའ་བརྒྱུད་པ་རྣམས་སྒྲུབ་བརྒྱུད་ཉམས་ལེན་པའི་བརྒྱུད་པ་ཡིན་སྟབས། བློ་ཆོས་དང་མཐུན་ཞིང་རྒྱུན་དུ་ཀུན་སློང་བཟང་པོའི་ལག་ལེན་བྱ་རྒྱུ་ཤིན་ཏུ་གཅེས་ཤིང་། ལག་ཏུ་དཔེ་ཆ་མེད་ཀྱང་གཙོ་བོ་ཀུན་སློང་བཟང་པོ་ཞིག་མཆིས་ཚེ་དེ་གས་ཆོག་པས་དེ་དོན་ཡོང་ཐབས་ལ་སྙིང་ནས་འབད་དགོས་པ་དང་། སྙིགས་བདོའི་དུས་མཐའ་འདི་ཉིད་ལ་གཙོ་བོ་ངེས་འབྱུང་གི་སྐྱོ་ཤས་དྲག་པོ་དགོས་རྒྱུ་ཧ་ཅང་གལ་འགངས་ཆེ་བ་དང་། རང་རེ་རྣམས་སྤྱིར་ལྔ་བརྒྱའི་དུས་མཐར་སྐྱེས་པ་ཞིག་ཡིན་ཀྱང་རྒྱལ་བའི་ལུང་རྟོགས་ཀྱི་བསྟན་པ་འཇིག་རྟེན་གྱི་ཁམས་སུ་བཞུགས་ཡོད་པ་དང་། སྒྲུབ་བརྒྱུད་ཀྱི་རིང་ལུགས་དྲི་མ་མེད་པ་འདི་ལྟ་བུ་དང་མཇལ་དུ་ཡོད་པ་འདི་སྐལ་པ་དང་ལྡན་པ་ཞིག་ཀྱང་ཡིན་པས་རིང་ལུགས་འདི་བཞིན་རྟག་ཏུ་གཅེས་འཛིན་གྱིས་མུ་མཐུད་རྒྱལ་བསྟན་ཡུན་དུ་གནས་ཐབས་ལ་ཀུན་གྱིས་འབད་དགོས་ཞེས་ལམ་སྟོན་གསུང་བཤད་གནང།
ཉིན་རྒྱབ་རྡོ་རྗེ་གདན་དང་མི་རིང་བའི་སར་རྒྱ་གར་གྲུབ་ཆེན་ཤྭ་ཝ་རི་པར་ཡེ་ཤེས་ཀྱི་མགོན་པོས་ཞལ་དངོས་སུ་གཟིགས་པའི་གནས་དུར་ཁྲོད་ཆེན་པོ་བསིལ་བ་ཚལ་ཞེས་ཡོངས་སུ་གྲགས་པ་དེར་རྒྱལ་བ་ཀརྨ་པ་མཆོག་ཚོགས་མགོན་དུ་དབུ་བཞུགས་ཀྱིས་འཇམ་མགོན་ཀོང་སྤྲུལ་རིན་པོ་ཆེ་སོགས་བླ་སྤྲུལ་ཆེ་ཁག་དུ་མ་དང། དགེ་འདུན་བརྒྱ་ཕྲག་གཉིས་ལྷག གཞན་ཡང་དད་སྦྱིན་དུ་མ་གདན་འཛོམས་ཀྱིས་དཔལ་ལྡན་མགོན་པའི་ཚོགས་མཆོད་དང་བསྐང་གསོ་བཅས་གསུང་འདོན་གནང་བ་དང། གཏེར་སྒར་དགོན་གྱི་འདུ་ཁང་དུ་སྐྱབས་རྗེ་གོ་ཤྲི་རྒྱལ་ཚབ་རིན་པོ་ཆེ་མཆོག་དབུ་བཞུགས་ཀྱིས་དུས་མཁྱེན་བླ་སྒྲུབ་དང་འབྲེལ་བའི་ཚོགས་མཆོད་རྒྱས་པ་ཞིག་ཚོགས་ནས་དགེ་འདུན་པ་ ༥༠༠ ལྷག་ཚོགས་ཕེབས་གནང་ཡོད་པ་བཅས་ཀྱིས་དགུ་བརྒྱའི་དུས་དྲན་གྱི་དབུ་འབྱེད་མཛད་སྒོ་ལེགས་གྲུབ་བྱུང་ཡོད་པ་རེད།
ཕྱི་ཚེས་ ༡༠ ནས་ཉིན་གསུམ་རིང་དཔལ་རྒྱལ་དབང་ཀརྨ་པ་མཆོག་གིས་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་སྒྲོན་གྱི་གསུང་ཆོས་གནང་བ་དང། ཕྱི་ཚེས་ ༡༥ བདུན་ཕྲག་གཅིག་ལྷག་རིང་བཀའ་བརྒྱུད་སངྒྷ་སྨོན་ལམ་ཆེན་མོ་ཐེངས་ ༢༨ པ་འཚོགས་གནང་རྒྱུ་ཡིན་པ་བཅས་ཀྱི་གནས་ཚུལ་དུ།
བསྟན་པ་ཡར་འཕེལ་གྱིས་མཁོ་སྤྲོད་གནང་བ་ལ་སྣོན་འཕྲི་ཁ་ཤས་དང་བཅས་སྨོན་ལམ་མཐར་ཕྱིན་པས་ཕུལ།།
