༢༠༡༠ ཟླ་ ༡༡ ཚེས་ ༡༩ རེས་གཟའ་པ་སངས།
སུད་སི་གྲོས་ཚོགས་ཀྱི་ཚོགས་གཙོ་དང་གནད་ཡོད་མི་སྣ་གཞན།
༅༅། །འདི་གར་སུད་སི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། བལ་ཡུལ་གྲོས་ཚོགས་ཀྱི་ཚོགས་གཙོས་གདན་ཞུས་ལྟར། སུད་སི་གྲོས་ཚོགས་ཀྱི་ཚོགས་གཙོ་ལྕམ་སྐུ་པསི་ཀལ་སྦུ་རུ་དྷི་རར་ཝིས་མཆོག་དང་སྐུ་འཁོར་རྣམས་བལ་ཡུལ་དུ་གཞུང་འབྲེལ་འཚམས་གཟིགས་སུ་ཕེབས་ཡོད་ཅིང་། ཕྱི་ལོ་ ༢༠༡༠ ཟླ་ ༡༡ ཚེས་ ༥ ཉིན་སྔ་དྲོར་ཀཐ་མན་གྲུ་ཇོ་ལ་ཁེལ་བོད་མིའི་བཟོ་གྲྭར་འཚམས་གཟིགས་སུ་ཕེབས་ཡོད་པ་དང་། སྐབས་དེར་འབྲེལ་ཡོད་བཟོ་གྲྭའི་འགན་འཛིན་སྐུ་ཞབས་འཆི་མེད་རྡོ་རྗེ་ལགས་དང་། གངས་སེང་ཐེབས་རྩའི་དྲུང་ཆེ་སྐུ་ཞབས་ཚེ་རིང་སྟོབས་རྒྱལ་ལགས། ས་གནས་མི་མང་གི་སྐུ་ཚབ་སྐུ་ཞབས་ངག་དབང་ལགས་བཅས་ནས་ཁོང་རྣམ་པར་ལས་དོན་ངོ་སྤྲོད་དང་ས་གནས་བོད་རིགས་མི་མང་གི་དཀའ་ངལ་སྙན་གསན་ཞུས་འདུག གོང་འཁོད་བོད་མིའི་སྐུ་ཚབ་རྣམས་ནས་སུད་སི་གྲོས་ཚོགས་ཀྱི་ཚོགས་གཙོ་མཆོག་ལ་ཕྱི་ལོ་ ༡༩༦༠ ནས་བཟུང་སུད་སི་གཞུང་དམངས་གཉིས་ནས་བོད་མིར་འགྱུར་མེད་རྒྱབ་སྐྱོར་གནང་བར་ཐུགས་རྗེ་ཆེ་ཞུའི་ཕྱག་བྲིས་ཤིག་ཕུལ་འདུག
འདི་ལོ་ཕྱི་ཟླ་ ༡༠ ནང་སུད་སི་དོན་ཁང་ནས་སུད་སི་གྲོས་ཚོགས་ཀྱི་ཚོོགས་གཙོ་མཆོག་ལ་བལ་ཡུལ་ནང་འཚམས་གཟིགས་གནང་སྐབས་ཇོ་ལ་ཁེལ་བོད་མི་བཟོ་གྲྭར་ངེས་ཕེབས་ཡོང་བའི་ཡིག་ཐོག་འབོད་སྐུལ་ཞུས་ཡོད་པ་བཅས།།
