༢༠༡༧ ཟླ་ ༩ ཚེས་ ༡༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༧ ཟླ་ ༩ ཚེས་ ༡༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཇར་མན་གྲོང་ཁྱེར་ཕེརེངྐ་ཕོཌ་ Frankfurt ནང་སྦེལ་ཇམ་དང་སུད་སི། ཧོལ་ལེན་ཌི་སོགས་ནས་བཅར་བའི་བོད་རིགས་རྣམས་ལ་བོད་རྒྱའི་འབྲེལ་ལམ་ཐོག་བཀའ་སློབ་སྩལ་དོན། རྒྱ་མི་དང་འབྲེལ་བ་བྱ་རྒྱུ་གོང་དུ་བརྗོད་པ་བཞིན་རྒྱ་རིགས་སློབ་ཕྲུག་དང་ངོས་རང་འབྲེལ་བ་ཧ་ཅང་ཡོད། དེ་བཞིན་རྒྱ་རིགས་ཚོང་པ་མང་པོ་ཞིག་དང་ངོས་རང་འབྲེལ་བ་ཡོད། དེ་བཞིན་རྒྱ་མིའི་ལས་བྱེད་རྒས་ཡོལ་ཕྱིན་པ་དེ་འདྲ་མང་པོ་ཞིག་དང་འབྲེལ་བ་ཡོད།
དེའི་ཐོག་ནས་ངོས་རང་འབྲེལ་བ་ཞིག་ཡོང་བཞིན་ཡོད། དུས་དུས་ལ་ཕར་ཕྱོགས་ནས་མི་ཡོང་། ང་ཚོ་ཐུག ང་ཚོའི་དབུ་མའི་ལམ་ནི་ཕྱི་གསལ་ནང་གསལ་ཡིན། དེར་བརྟེན་ཕན་ཚུན་གོ་རྟོགས་སྤེལ་བ་བརྒྱུད་ག་ལེར་བཟོ་ལྟ་ཞིག་འཐོན་བཞིན་འདུག འདི་ངོས་ཀྱི་ཁྱེད་ཚོར་ལས་བསྡོམས་ལྟ་བུ་ཡིན། ཁྱེད་ཚོས་སེམས་ནང་ངེས་པར་བྱོས། ཚང་མས་སེམས་སྐྱིད་པོ་བྱོས། སེམས་ཀྱི་སྤོབས་པ་མ་ཞུམ་པ་བྱོས། ང་བོད་རིགས་ཡིན། དངོས་གནས་ང་ཚོ་རླབས་ཆེན་གྱི་མི་རིགས་ཤིག་ཡིན་བམས་པ། ང་ཚོའི་མེས་པོ་དངོས་གནས་ཧ་ཅང་རྣམ་དཔྱོད་ཅན་དང་བྱས་རྗེས་ཅན་དེའི་བརྒྱུད་འཛིན་ཡིན་བསམ་པའི་ཐོག་ནས་སྤོབས་པ་བྱེད་ནས་སྡོད་དགོས། སེམས་མ་ཞུམ་པ་བྱོས། ངོས་ཀྱིས་ལོ་རྒྱུས་ཤིག་བརྗོད་ཆོག ཕྱི་ལོ་ ༡༩༨༠ ནང་བོད་ནས་ཚུར་གཉེན་འཕྲད་ཡོང་རྒྱུ་དང་། ཕར་བོད་ནང་གཉེན་འཕྲད་འགྲོ་རྒྱུའི་འགོ་ཞིག་འཛུགས་པ་རེད། ཕྱི་ལོ་ ༡༩༧༩ ལོར་རྒྱལ་ལོ་དོན་གྲུབ་ལ་པེ་ཅིང་དུ་ཤོག་ཟེར་བའི་ལན་ཞིག་འབྱོར་བ་རེད། རྒྱལ་ལོ་དོན་གྲུབ་ཆེད་མངགས་ངོས་རང་ཐུག་ཏུ་བསླེབས་བྱུང་། འགྲོ་རྐྱང་བྱོས་ལབ་པ་ཡིན། ང་ཚོས་འདི་ཁ་བྲལ་བྱེད་ཀྱི་མེད།
ང་ཚོ་དབུ་མའི་ལམ་ཐོག་ཤར་བསྐྱོད་བྱེད་བཞིན་ཡོད། དེར་བརྟེན་འགྲོ་རྐྱང་བྱོས་ལབ་པ་ཡིན། ཕར་ཕྱིན་ནས་ཏིང་ཞའོ་ཕིང་ཐུག་པ་ནས་ཁོང་དང་ཆུ་ཚོད་གཅིག་གཉིས་ཙམ་རིང་སྐད་ཆ་བཤད་འདུག སྐབས་དེར་ཏིང་ཞའོ་ཕིང་གིས་རང་བཙན་མ་གཏོགས་གཞན་གང་ཡིན་ཡང་ང་ཚོས་སྐད་ཆ་བྱེད་ཆོག་རྒྱུ་རེད། ཅེས་དེ་འདྲ་བཤད་ཡོད། དེ་འདྲའི་ལམ་ནས་ང་ཚོ་འབྲེལ་བ་བྱུང་ཡོད།
བོད་ལ་ལྟ་སྐོར་ཡང་ཐེངས་འགའ་ཤས་ཕྱིན་པ་རེད། ང་ཚོའི་བསམ་བློའི་ནང་ད་ཆ་ལུང་པ་ཤོར་སོང་། ལོ་ངོ་ ༥༨ རིང་བསྒུགས་པ་ཡིན། གང་ཡང་ཡོང་རྒྱུ་མིན་འདུག ཁྱེད་ཚོ་འགའ་ཤས་ཀྱིས་འདི་འདྲ་དྲན་མདོག་ཁ་པོ་རེད། ཏཱ་ལའི་བླ་མས་དབུ་མའི་ལམ་ཟེར་ནས་གཅིག་བཤད་ཀྱང་གྲུབ་འབྲས་འཐོན་རྒྱུ་གང་ཡང་མིན་འདུག ད་ཆ་གང་ཡང་བྱུང་མ་སོང་བསམ་པའི་བསམ་བློ་ཁྱེད་ཚོ་འགའ་ཤས་ལ་ཡོད་སྲིད། ཞུམ་མི་དགོས། ང་ཚོ་བོད་ཀྱི་གནས་ཚུལ་འདི་མི་རིགས་ཤིག་གི་གནད་དོན་ལས་ཁྱིམ་ཚང་ཞིག་གི་གནད་དོན་མིན།
བོད་མི་རིགས་ནམ་ཡང་རྩ་བརླག་ཏུ་འགྲོ་རྒྱུ་མ་རེད། མུ་མཐུད་གནས་རྒྱུ་རེད། འདི་འདྲ་ཡོང་བ་དེ་གཙོ་བོ་བོད་ཀྱི་སྐད་ཡིག ཆོས་དང་རིག་གཞུང་ཐོག་ནས་ཡོང་བཞིན་ཡོད། ཉེ་འཆར་རང་སྐྱོང་ལྗོངས་ཀྱི་ཚོགས་འདུ་ཞིག་སར་སྐད་ཆ་དེ་འདྲ་བྱུང་སྐོར་ངོས་ཀྱིས་གོ་ཐོས་བྱུང་། ཕྱི་རྒྱལ་ལ་ཡོད་པའི་བཙན་བྱོལ་བ་དེ་ཚོ་ཤུགས་ཆེ་རུ་འགྲོ་བཞིན་པ་དང་། རྒྱབ་སྐྱོར་བྱེད་མཁན་ཡང་འཛམ་གླིང་གང་ས་ནས་ཤུགས་ཆེ་རུ་འགྲོ་བཞིན་ཡོད་པ། དེ་བཞིན་རྒྱ་ནག་རང་གི་ནང་དུ་རྒྱ་རིགས་ནང་པ་མང་དུ་འགྲོ་བཞིན་པ་འདི་ཉེན་ཁ་རེད་འདུག ཅེས་བཤད་པའི་སྐད་ཆ་ཞིག་གོ་རྒྱུ་འདུག
དེར་བརྟེན་གོང་དུ་བཤད་པ་ལྟར་རེད། ཕྱི་ལོ་ ༡༩༥༩ ལོར་དྲག་གནོན་བྱས་པ་དང་། ཕྱོགས་མཚུངས་ཕྱི་ལོ་ ༢༠༠༨ ལོར་དྲག་གནོན་ཧ་ཅང་བྱས་ནས་བོད་པ་ལང་རྒྱུ་མེད་པ་བཟོས་ཡོད་བསམ་པའི་ཚོད་དཔག་བྱས་པ་ནང་བཞིན་བྱུང་མེད། ང་ཚོ་བོད་པ་འགྱེལ་ཡང་ཤི་མེད། འགྱེལ་ས་ནས་ལང་ཐུབ་པ་ཞིག་ཏན་ཏན་ཡོང་རྒྱུ་རེད། བློ་བདེ་པོ་བྱོས། ཚང་མས་སྙིང་སྟོབས་སྐྱེད་ནས་སྡོད།
ལོ་ཡར་རྒས་བཞིན་ཡོད་ཀྱང་གཟུགས་པོར་སྐྱོན་གང་ཡང་མིན་འདུག ཀླད་པ་ཡང་གྲུང་ཐག་ཆོད་བྱས་ནས་བསྡད་ཡོད། དེར་བརྟེན་ད་དུང་ལོ་བཅོ་ལྔ་ཉི་ཤུ་ཕལ་ཆེར་སྡོད་རྒྱུ་རེད། དེའི་གོང་དུ་བོད་དོན་བཟང་ཕྱོགས་ཀྱི་འགྱུར་བ་ཞིག་ཏན་ཏན་ཡོང་རྒྱུ་རེད། ང་ཚོ་གཞིས་བྱེས་མཉམ་འཛོམས་ཡོང་ཐུབ་པའི་རེ་བ་ཏན་ཏན་ཡོད། ཚང་མས་ཧུར་ཐག་བྱོས། གོང་དུ་བརྗོད་པ་ལྟར་བོད་པ་གང་དུ་ཡོད་ཀྱང་བོད་པ་ཡིན་བསམ་པའི་འདུ་ཤེས་དེ་མ་བརླག་པའི་ཐོག་ནས་ཞབས་འདྲེན་མ་ཞུ་ཨང་། བོད་པའི་མཚན་ལ་གོང་མཐོར་ཡོང་བ་ཞིག་བྱོས། སུ་ཡིན་རུང་བོད་པ་རེད། ཧ་ཅང་ཡག་པོ་ཡོད། བློས་འགེལ་ཆོག རྫུན་བཤད་རྒྱུ་མ་རེད། ཟེར་ཡག་ཅིག་དགོས། དེར་གཟབ་དགོས། ཞེས་སོགས་ཀྱི་བཀའ་སློབ་སྩལ།།
