༄༅། །བཙན་བྱོལ་བོད་མི་མང་སྤྱི་འཐུས་ལྷན་ཁང་གིས་ནོ་སྦེལ་ཞི་བདེའི་གཟེངས་རྟགས་བཞེས་མཁན་ལྕམ་སྐུ་ཨང་སན་སུ་ཀི་མཆོག་ཆ་རྐྱེན་གང་ཡང་མེད་པར་གློད་གྲོལ་གནང་བར་དགའ་བསུ་ཞུ་རྒྱུ་ཡིན། ལྕམ་སྐུ་སུ་ཀི་མཆོག་གིས་རང་ཉིད་དུས་ཡུན་ལོ་བཅོ་ལྔའི་རིང་བཙོན་འཇུག་སྐབས་སུའང་འབར་མའི་ནང་མང་གཙོའི་ཆེད་དུ་སྐུ་ངལ་བསྐྱོན་པའི་བློ་སྟོབས་དེས་རང་དབང་དང་མང་གཙོའི་ཆེད་དུ་འདུན་པ་བྱེད་མཁན་ས་ཡ་མང་པོར་སེམས་འགུལ་ཐེབས་ཡོད་པ་རེད། ང་ཚོས་འབར་མའི་དམག་གཞུང་ལ་ཆབ་སྲིད་བཙོན་པ་མིན་ཀོ་ནེང་དང་། ཡུ་གྷམ་བི་ར། ཡུ་ཁུན་ཐུན་ནོ་དང་ཆབ་སྲིད་བཙོན་པ་གཞན་ཚང་མ་གློད་གྲོལ་ཡོང་བའི་འབོད་སྐུལ་ཞུ་བཞིན་ཡོད། ང་ཚོས་ཨང་སན་སུ་ཀི་མཆོག་གིས་རྒྱལ་ཡོངས་མཐུན་སྒྲིལ་སླད་འབོད་སྐུལ་གནང་བ་དེས་འབར་མའི་ནང་མིང་དོན་མཚུངས་པའིི་མང་གཙོ་ངོ་མ་ཞིག་འབྱུང་རྒྱུར་ལམ་ཕྱོགས་སྟོན་རྒྱུ་ཡིན་པའི་ཡིད་ཆེས་བྱེད་ཀྱི་ཡོད། ༸གོང་ས་མཆོག་གིས་དུས་རབས་ཉི་ཤུ་རྩ་གཅིག་པ་ནི་གྲོས་མོལ་གྱི་དུས་རབས་ཤིག་རེད་ཅེས་གསུངས་པ་བཞིན་ལྕམ་སྐུ་མཆོག་གི་དགོངས་གཞིར་ཡང་དེ་མཚུངས་ཡོད་པ་རེད། འབར་མའི་དམག་མིའི་གཞུང་འཛིན་པ་རྣམ་པས་འབར་མའི་གནད་དོན་རྣམས་གུ་ཡངས་ངང་འཚེ་མེད་ཞི་བའི་ཐབས་ལམ་ཕུགས་བརྟན་ཞིག་བཙལ་ཏེ་འབར་མའི་མི་མང་ཙམ་མ་ཟད་ཉེ་ཁུལ་ཡུལ་གྲུ་ཁག་དང་བཅས་པ་ཚང་མའི་ཁེ་ཕན་ལ་སྨན་པ་ཞིག་གནང་རྒྱུར་ང་ཚོས་ལྷག་བསམ་རྣམ་དག་གིས་རེ་འདུན་ཞུ་བཞིན་ཡོད། བོད་མི་མང་སྤྱི་འཐུས་ལྷན་ཁང་ནས་ཕྱི་ལོ་ ༢༠༡༠ ཟླ་ ༡༡ ཚེས་ ༡༥ ལ།
གསར་གནས།
འབྲེལ་གནས།
