༢༠༡༠ ཟླ་ ༡༡ ཚེས་ ༡༦ རེས་གཟའ་མིག་དམར།
༄༅། །འདི་གར་བོད་མིའི་རང་དབང་རྩོམ་སྒྲིག་པས་བཏང་གནས་ནང་འཁོད་དོན། ཕྱི་ལོ་ ༢༠༡༠ ཟླ་ ༡༡ ཚེས་ ༡༥ ཉིན་རྒྱབ་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་དགྱེས་ཚོར་ཆེན་པོས་ཧི་རོ་ཤི་མའི་གྲོང་ཁྱེར་གྱི་གྷ་རན་ཌི་མགྲོན་ཁང་དུ་ཕྱི་ནང་གི་གསར་འགོད་པ་མི་གྲངས་ ༣༠ ཙམ་ལ་བཀའ་སློབ་དང་གསར་འགོད་པ་ཁག་གཅིག་གིས་དྲི་བར་བཀའ་ལན་སྩལ་ཡོད། དེ་ཡང་གསར་འགོད་པའི་དྲི་བ་མ་ཕུལ་སྔོན་དུ་ཐོག་མར་མགོན་པོ་གང་ཉིད་མཆོག་གི་རླབས་ཆེན་མཛད་ཁུར་གསུམ་གྱི་སྐོར་བཀའ་སློབ་སྩལ་དོན། ངོས་རང་ཉི་ཧོང་གི་གྲོང་ཁྱེར་ཧི་རོ་ཤི་མའི་ནང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་རྒྱལ་སྤྱིའི་ཞི་བདེ་ལྷན་ཚོགས་ཐེངས་ ༡༡ པ་དེར་ཉམས་ཞུགས་ཐུབ་པར་ཧ་ཅང་དགའ་པོ་དང་ཆེ་མཐོང་ཐོབ་པ་ཞིག་བྱུང་། ཐོག་མར་ངོས་ཀྱིས་འགན་ཁུར་གསུམ་ཡོད་པ་དེའི་ཐོག་འདོར་བསྡུས་ཤིག་ཞུ་འདོད་བྱུང་།
འགན་ཁུར་དང་པོ། ངོས་རང་འགྲོ་བ་མི་ཞིག་ཡིན་པའི་གཞི་རིམ་གྱི་གནས་སྟངས་ཐོག་ནས་བརྗོད་ན་འཛམ་གླིང་ནང་འགྲོ་བ་མི་ཐེར་འབུམ་དྲུག་ལྷག་ཙམ་ཡོད་པའི་ཆ་ཤས་ཤིག་ཆགས་ཡོད། ང་ཚོ་འགྲོ་བ་མི་རྣམས་སྤྱི་ཚོགས་ལ་རྟེན་པའི་སེམས་ཅན་ཞིག་ཡིན། དེང་སྐབས་འཛམ་གླིང་གི་དངོས་ཡོད་གནས་ཚུལ་དེ་ང་ཚོ་ཕན་ཚུན་གཅིག་གིས་གཅིག་ལ་རྟེན་ནས་གནས་དགོས་པ་ཆགས་ཡོད། འཛམ་གླིང་ནང་གི་དཀའ་ངལ་དེ་དག་གོ་ལ་སྤྱི་ཡོངས་ཀྱི་དཀའ་ངལ་ཞིག་ཆགས་ཡོད། འཛམ་གླིང་ནང་ས་ཆ་ལུང་ཁུག་གི་དཀའ་ངལ་འཕྲད་པ་དེས་ཀྱང་འཛམ་གླིང་ཡོངས་ལ་ཕན་གནོད་ཡོང་གི་ཡོད། གོ་ལའི་ཁོར་ཡུག་དང་དཔལ་འབྱོར་གྱི་དཀའ་ངལ་དེ་དག་ང་ཚོ་ཕན་ཚུན་གཅིག་ལ་གཅིག་རྟེན་གྱི་ཐོག་ནས་སེལ་དགོས་པའི་གནས་སྟངས་ཤིག་ཆགས་ཡོད་པར་བརྟེན། གོ་ལ་ཁྱོན་ཡོངས་ཀྱི་གནས་སྟངས་དེ་ང་ཚོའི་ཆ་ཤས་ཤིག་ཆགས་ཡོད་པས་འཛམ་གླིང་མི་ཚང་མ་ང་ཚོའི་ཆ་ཤས་ཡིན་བསམ་པའི་གཅིག་གྱུར་གྱི་འདུ་ཤེས་ཤུགས་ཆེན་པོ་འཛིན་ཐུབ་པའི་བསམ་བློ་གཏོང་དགོས། ཆོས་ལུགས་དང་རིགས་རུས། རྒྱལ་ཁབ་སོགས་ཀྱི་དབྱེ་བ་མེད་པར་དོན་དམ་གྱི་འགན་ཞིག་འཁྱེར་རྒྱུའི་འབད་བརྩོན་བྱེད་ཀྱི་ཡོད།
འགན་ཁུར་གཉིས་པ། དེར་ངོས་རང་ནང་པའི་དགེ་སློང་ཞིག་ཡིན་པའི་གནས་སྟངས་ཀྱི་ཐོག་ནས་བརྗོད་རྒྱུ་ཡིན། ཆོས་ལུགས་གཙོ་ཆེ་བ་ཚང་མའི་ལྟ་གྲུབ་ཀྱི་ཐོག་ནས་མི་འདྲ་བ་ཡོད་ཀྱང་བྱམས་པ་དང་བརྩེ་བ། བཟོད་བསྲན་སོགས་ཀྱི་བཟང་པོའི་བསླབ་བྱ་དེ་དག་ཆོས་ལུགས་ཚང་མའི་ནང་གསུངས་ཡོད། འགྲོ་བ་མི་ལ་ཕན་པ་སྒྲུབ་རྒྱུའི་དམིགས་ཡུལ་དེ་ཆོས་ལུགས་ཚང་མར་གཅིག་མཚུངས་སུ་ཡོད་པ་མ་ཟད། དམིགས་ཡུལ་དེ་སྒྲུབ་རྒྱུའི་ནུས་པ་དེ་ཡང་ཆོས་ལུགས་ཚང་མར་ཡོད། དེར་བརྟེན་ཆོས་ལུགས་ཕན་ཚུན་བསམ་ཤེས་བྱ་རྒྱུ་དང་གུས་བརྩི་ཞུ་རྒྱུ་དེ་ཧ་ཅང་གལ་ཆེན་པོ་ཆགས་ཡོད། འདས་པའི་ལོ་བཅུ་ཕྲག་འགའ་ཤས་ཀྱི་ཉམས་མྱོང་གི་ཐོག་ནས་ང་ཚོ་ཚང་མ་འཆམ་མཐུན་གྱི་ཐོག་ནས་མཉམ་གནས་ཐུབ་པར་ངོས་ལ་ངེས་པ་བརྟན་པོ་ཐོབ་བྱུང་། དེ་ལྟ་བུ་ཞིག་ཡོང་ཐུབ་པའི་དཔེ་མཚོན་ཡག་ཤོས་དེ་རྒྱ་གར་ཆགས་ཡོད། འཛམ་གླིང་ནང་ལོ་ངོ་ ༢༠༠༠ ལྷག་ཙམ་རིང་ཆོས་ལུགས་འདྲ་མིན་གྱི་རྗེས་འབྲང་པ་རྣམས་མཉམ་གནས་ཐུབ་པའི་དཔེ་མཚོན་ཡག་ཤོས་ནི་རྒྱ་གར་ཁོ་ན་ཡིན།
འགན་ཁུར་གསུམ་པ། བོད་ཀྱི་གནས་སྟངས་དེ་ཡིན། སྤྱིར་ངོས་རང་ཡང་བོད་མི་ཞིག་ཡིན་པས་འགན་ཞིག་ཡོད། ལྷག་པར་ཏཱ་ལའི་བླ་མའི་མིང་ཞིག་ཡོད་པས་དམིགས་བསལ་འགན་ཡོད། ཕྱི་ལོ་ ༢༠༠༡ ལོ་ནས་བོད་མི་ཚོས་ཐད་ཀར་བཀའ་བློན་ཁྲི་པ་འོས་འདེམས་བྱས་པ་ནས་བཟུང་ལོ་ངོ་ ༤༠༠།༥༠༠ ཙམ་གྱི་ཏཱ་ལའི་བླ་མའི་གོ་གནས་དེ་མཇུག་སྒྲིལ་བ་ལྟ་བུ་རེད། ད་ཆ་ངོས་རང་ཕྱེད་རྒན་ཡོལ་གྱི་གནས་སྟངས་ཆགས་ཡོད་ཅེས་བཀའ་སྩལ། དེ་རྗེས་གསར་འགོད་པ་ཚོར་བཀའ་སློབ་སྩལ་དོན། གསར་འགོད་པ་ཚོས་གནས་ཚུལ་སྡུག་པ་ཁོ་ན་གསལ་སྟོན་བྱས་ཏེ་བཟང་ཕྱོགས་ཀྱི་གནས་ཚུལ་རྣམས་གསལ་སྟོན་མ་བྱས་ཚེ་མང་ཚོགས་ཀྱི་བསམ་བློའི་ནང་ཤུགས་རྐྱེན་ངན་པ་ཐེབས་སྲིད། དེར་བརྟེན་གསར་འགོད་པ་ཚོས་བཟང་ཕྱོགས་ཀྱི་གནས་ཚུལ་རྣམས་ཀྱང་གསལ་སྟོན་བྱེད་དགོས། ལྷག་པར་ཉི་ཧོང་གི་གསར་འགོད་པ་ཚོར་ཆོས་ལུགས་མཐུན་སྒྲིལ་གོང་སྤེལ་གཏོང་རྒྱུར་འགན་ཆེན་པོ་ཡོད། ཁྱེད་ཚོ་ཕ་མེས་ཀྱི་ཆོས་ལུགས་ཤིན་ཊོ་དང་ནང་པ་ཡིན། ནང་པའི་ཚན་རིག་གི་ལམ་ནས་ཕྱི་དངོས་པོ་དང་ནང་བསམ་བློའི་རིན་ཐང་གཉིས་ཆ་སྙོམ་གྱི་ཐོག་ནས་ལྟ་ཐུབ་ན་ཕན་ཐོགས་ཆེན་པོ་ཡོད། ནང་ཆོས་དེ་ཉིན་རེའི་འཚོ་བའི་ནང་འབྲེལ་བ་དེ་ཙམ་མེད་པར་མཆོད་འབུལ་བྱེད་རྒྱུ་ཙམ་ཡིན་བསམ་པ་དྲན་རྒྱུ་མེད། ཨ་རིའི་གཙུག་ལག་སློབ་གྲྭ་གསུམ་གྱི་ནང་དུ་ནང་པའི་ཚན་རིག་གི་ལམ་ནས་བློ་སྦྱོང་སྟངས་ཀྱི་སློབ་ཚན་སློབ་ཁྲིད་བྱེད་བཞིན་ཡོད་ཅེས་སོགས་བཀའ་སློབ་སྩལ་གྲུབ་བསྟུན། ཉི་ཧོང་ཨ་ས་ཧི་གསར་ཤོག་གི་གསར་འགོད་པས་ཉེ་ལམ་བོད་ནང་བོད་པའི་སློབ་ཕྲུག་ཁག་གཅིག་གིས་སྐད་འབོད་བྱས་པའི་གནས་ཚུལ་བྱུང་བ་དེར་༸གོང་ས་མཆོག་ལ་དགོངས་ཚུལ་ཇི་ཡོད་ཀྱི་དྲི་བ་ཕུལ་བར་མགོན་པོ་གང་ཉིད་མཆོག་གིས་བཀའ་ལན་སྩལ་དོན། བསམ་བཞིན་དུ་བྱས་ཀྱང་རུང་མ་བྱས་ཀྱང་རུང་བོད་ནང་བོད་པའི་རིག་གཞུང་རྩ་མེད་འགྲོ་བཞིན་ཡོད། བསམ་བཞིན་དུ་མ་བྱས་པ་བརྗོད་སྐབས་གྲོང་ཁྱེར་ལྷ་སའི་ནང་མི་འབོར་སྟོང་ཕྲག་སུམ་བརྒྱ་ཙམ་ཡོད་པའི་ནང་ནས་གསུམ་ཆ་གཉིས་ཙམ་རྒྱ་མི་ཧན་མི་རིགས་ཡིན་པ་དང་། གཞུང་གི་སྐད་ཡིག་བརྒྱུད་ལམ་རྒྱ་སྐད་ཡིན་པ་མ་ཟད། ལྷ་སའི་ཚོང་ཁང་དང་མགྲོན་ཁང་ཚང་མའི་ནང་རྒྱ་སྐད་རྒྱག་མཁན་མ་གཏོགས་མེད་པས་བོད་པ་ཚོས་རྒྱ་སྐད་བཙན་ཐབས་ཀྱིས་རྒྱག་དགོས་པ་ཆགས་ཡོད གང་ཡིན་བརྗོད་ན་ཚོང་ཁང་དེ་ཚོའི་བདག་པོ་རྒྱ་མི་ཡིན། ལས་ཀ་རག་རྒྱུར་རྒྱ་སྐད་ཤེས་དགོས་པ་ལས་བོད་སྐད་ཀྱི་ཕན་གང་ཡང་ཐོགས་ཀྱི་མེད། བོད་མི་རྒྱ་སྐད་མ་ཤེས་པ་ཚོར་ལས་ཀ་རག་གི་མེད། དེར་བརྟེན་བོད་ཀྱི་སྐད་ཡིག་ཉམས་ཆག་བྱུང་ཚར་བ་རེད།དེ་ཚོ་བསམ་བཞིན་དུ་མ་བྱས་པ་ཟེར་བའི་དོན་ཡིན། རྒྱལ་ཁབ་ཇི་འདྲ་ཞིག་ཡིན་ནའང་རིག་གཞུང་གི་རྩ་བ་དེ་སྐད་ཡིག་ལ་ཐུག་ཡོད། ཉེ་ལམ་ངོས་ཀྱིས་བོད་ནས་བསླེབས་པའི་བོད་ལྗོངས་སློབ་གྲྭ་ཆེན་མོའི་ལས་བྱེད་པ་བོད་མི་འགའ་ཤས་དང་ཐུག་སྐབས་ཁོང་ཚོས་ལོ་ ༡༠ ཙམ་གྱི་གོང་ལྷ་སའི་བོད་ལྗོངས་སློབ་གྲྭ་ཆེན་མོའི་ནང་བོད་པའི་རིག་གཞུང་ལ་སློབ་སྦྱོང་གཏིང་ཟབ་བྱ་རྒྱུའི་གོ་སྐབས་ཡོད་པས་ཕན་ཐོགས་ཆེན་པོ་ཡོད་སྐོར་བརྗོད་བྱུང་། འོན་ཀྱང་རྒྱ་ནག་གི་འགོ་ཁྲིད་མཁྲེགས་འཛིན་པ་ཁྲན་གུན་ཡན་བོད་དུ་བསླེབས་ཏེ་བོད་པའི་རིག་གཞུང་སློབ་སྦྱོང་བྱ་རྒྱུའི་སློབ་ཚན་རྣམས་བརྗེ་པོ་བརྒྱབ་པར་བརྟེན། ད་ཆ་བོད་པའི་རིག་གཞུང་དེ་དག་རྒྱ་སྐད་ནང་སྒྱུར་ཡོད་པ་དེར་སློབ་གཉེར་བྱེད་དགོས་པ་བཟོས་ཡོད། རྒྱ་སྐད་ནང་སྒྱུར་ཡོད་པའི་བོད་པའི་རིག་གཞུང་གི་སློབ་ཚན་དེ་ཚོ་ཡང་སྒྲུང་ལྟ་བུ་ཞིག་ཡོད་པ་ལས་བོད་པའི་རིག་གཞུང་གཏིང་ཟབ་མོར་སློབ་སྦྱོང་བྱེད་རྒྱུ་མེད་པ་བཟོས་ཡོད། ང་ཚོས་གནས་ཚུལ་ཤེས་རྟོགས་བྱུང་བར་གཞིགས་ན་ལོ་བཅུ་ཙམ་སྔོན་རྒྱ་ནག་གུན་ཁྲན་ཚོགས་པའི་ཚོགས་འདུ་ཞིག་གི་སྐབས་གུང་ཁྲན་ཚོགས་པའི་དྲུང་ཆེ་ཁྲན་གུན་ཡན་གྱིས་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནས་ཁ་བྲལ་འགྲོ་རྒྱུའི་ཉེན་ཁ་ཆེ་ཤོས་དེ་བོད་མི་ཚོས་ནང་ཆོས་ལ་དད་པ་དང་ཡིད་ཆེས་ཡོད་པ་དེ་ཡིན་སྐོར་བརྗོད་ཡོད། དེ་རྗེས་ཁྲན་གུན་ཡན་བོད་རང་སྐྱོང་ལྗོངས་ཀྱི་དྲུང་ཆེར་བསྐོ་གཞག་བྱུང་རྗེས་བོད་མི་ཚོར་བོད་ནང་བོད་པའི་རིག་གཞུང་དང་སྐད་ཡིག་ལ་དམ་བསྒྲགས་བྱ་རྒྱུའི་སྲིད་བྱུས་དེ་ཁྲན་གུན་ཡན་གྱིས་ལག་ལེན་བསྟར་བའི་ངེས་པ་རྙེད་ཡོད། ཕྱི་ལོ་ ༡༩༨༦ ལོར་པཎ་ཆེན་རིན་པོ་ཆེ་ཞིང་གཤེགས་མཆོག་དང་ང་ཕོད་གཉིས་ཀྱིས་ཕྱི་ལོ་ ༡༩༨༧ ལོ་ནས་བོད་རང་སྐྱོང་ལྗོངས་ཀྱི་ས་ཁུལ་ཡོངས་རྫོགས་ནང་གཞུང་འབྲེལ་གྱི་སྐད་ཡིག་བརྒྱུད་ལམ་དེ་བོད་སྐད་བཟོ་རྒྱུའི་ཐག་གཅོད་གནང་ཡོད་ཀྱང་དུས་ཡུན་ཁྱུག་ཙམ་ནང་སྐད་ཆ་དེ་དག་ཡལ་བ་རེད། རིག་གནས་གསར་བརྗེའི་སྐབས་བོད་ཀྱི་བྱང་ཤར་ས་ཁུལ་ཁག་གཅིག་གི་ནང་ལོ་ ༡༥ ནང་ཚུན་ལ་བོད་སྐད་རྩ་མེད་བཟོ་རྒྱུའི་དམ་བཅའ་བཞག་ཡོད། དེ་རྗེས་ཁྲན་གུན་ཡན་ལྷ་སར་སྦྱོར་རྗེས་བོད་ཡིག་དང་བོད་པའི་རིག་གཞུང་སློབ་སྦྱོང་བྱ་རྒྱུའི་དུས་ཡུན་ཐུང་དུ་བཏང་ཡོད། བོད་ནང་རིག་གནས་གསར་བརྗེ་བསྐྱར་ལོག་བྱེད་ཀྱི་ཡོད་པའི་སྐད་ཆ་མང་ཚོགས་ནང་གྲགས་ཡོད། ཉེ་ལམ་རྒྱ་ནག་གཞུང་གིས་བོད་པའི་སློབ་གྲྭ་དེ་ཚོའི་ནང་བོད་ཀྱི་སྐད་ཡིག་སློབ་ཚན་གཅིག་པུ་བོད་སྐད་ཐོག་བསླབ་པ་མ་གཏོགས་སློབ་ཚན་གཞན་ཚང་མ་རྒྱ་སྐད་ནང་སློབ་ཁྲིད་བྱེད་དགོས་པའི་ཁྲིམས་ལུགས་ལག་བསྟར་བྱས་པར་བརྟེན་བོད་ནང་སློབ་ཕྲུག་ཚོས་སྐད་འབོད་བྱས་པའི་གནས་ཚུལ་དེ་བྱུང་ཡོད། ངོས་ཀྱི་བསམ་པར་སློབ་ཕྲུག་ཚོས་སོ་སོ་རང་གི་ཚོར་བ་བཏོན་པ་རེད། ཕྱི་ལོ་ ༡༩༥༠ འགོ་སྟོད་ཙམ་ལ་རྒྱ་ནག་གི་ཤོག་དངུལ་གསར་པ་བཟོ་སྐབས་ཤོག་དངུལ་གསར་པ་དེའི་སྟེང་བོད་ཡིག་དང་མན་ཇུའི་ཡིག་གེ རྒྱ་ཡིག དེ་བཞིན་སོག་པོའི་ཡིག་གེ་བཅས་བྲིས་ཡོད། སྐབས་དེར་བོད་ཡིག་ཡོད་པར་བརྟེན་ང་ཚོར་དངོས་གནས་སྤོབས་པ་སྐྱེ་གི་ཡོད། བོད་མི་ས་ཡ་དྲུག་གིས་བེད་སྤྱོད་བྱ་རྒྱུའི་ཡིག་གཟུགས་དེ་ད་ཆ་འགྲོ་བ་མི་རིགས་ཐེར་འབུམ་མང་པོས་མཐོང་ཐུབ་སོང་བསམ་ནས་ང་ཚོར་སྤོབས་པ་ཆེན་པོ་ཐོབ་ཡོད། འོན་ཀྱང་དེང་སྐབས་གནས་སྟངས་འདི་ལྟ་བུ་ཞིག་ཆགས་ཡོད། ད་ལྟའི་རྒྱ་ནག་གཞུང་གི་ཆབ་སྲིད་ཀྱི་སྲིད་བྱུས་མང་པོ་ཞིག་སྔ་མོ་རྒྱ་ནག་གུང་ཁྲན་གྱི་འགོ་ཁྲིད་མའོ་ཙེ་ཏུང་སྐབས་ཀྱི་སྲིད་བྱུས་དང་མི་འདྲ་བའི་ཁྱད་པར་ཆེན་པོ་ཡོད། དཔེར་ན། ཕྱི་ལོ་ ༡༩༥༤།༡༩༥༥ ལོར་ངོས་རང་མའོ་དང་མཇལ་འཕྲད་ཐེངས་འགའ་ཤས་བྱུང་ཡོད་པ་མ་ཟད། སྐབས་དེའི་རྒྱ་ནག་གི་འགོ་ཁྲིད་མཐོ་བ་ཚང་མ་དང་ཐུག་ཡོད། སྐབས་ཤིག་ལ་མའོ་ཙེ་ཏུང་གིས་ངོས་ལ་ཁྱེད་ཚོ་བོད་པ་ཚོ་སྔ་མོའི་སྐབས་སྟོབས་ཆེན་རྒྱལ་ཁབ་གཅིག་ཡིན་ནའང་ད་ཆ་ཁྱེད་ཚོ་ཧ་ཅང་སྐྱོ་པོ་ཡོད་པར་བརྟེན་ང་ཚོས་ཁྱེད་ཚོར་རོགས་པ་བྱེད་ཆེད་བསླེབས་ཡོད། མ་འོངས་པར་ལོ་ ༢༠ ཙམ་གྱི་རྗེས་སུ་ཁྱེད་ཚོར་སྔ་མོའི་སྟོབས་ཤུགས་དེ་བསྐྱར་དུ་ཐོབ་སྐབས་ང་ཚོར་ཚུར་ལ་རོགས་རམ་བྱེད་དགོས་ཞེས་བརྗོད་བྱུང་། ཕྱོགས་མཚུངས་ཕྱི་ལོ་ ༡༩༨༠ འགོ་སྟོད་ཙམ་ལ་རྒྱ་ནག་དམར་པོའི་འགོ་ཁྲིད་ཧུའུ་ཡོ་པང་ལྷ་སར་བསྐྱོད་སྐབས་ཁོང་གིས་མང་ཚོགས་ལ་འདས་པའི་ནོར་འཁྲུལ་གང་བྱུང་བ་དེར་དགོངས་དག་ཞུས་ཡོད་པ་མ་ཟད། རྒྱ་མི་ཧན་མི་རིགས་བརྒྱ་ཆ་ ༨༠ ཙམ་བོད་ནས་རྒྱ་ནག་ཏུ་ཕྱིར་ལོག་གཏོང་རྒྱུ་ཡིན་པའི་དམ་བཅའ་བྱས་ཡོད། ཕྱི་ལོ་ ༡༩༥༠ འགོ་སྟོད་ཙམ་ལ་དངོས་གནས་རེ་བ་ཆེན་པོ་བྱུང་ཡོད། དེ་རྗེས་ ༡༩༥༦ ཙམ་ནས་གནས་སྟངས་འགྱུར་བ་ཕྱིན་ཡོད། དེ་ནས་སླར་ཡང་ཕྱི་ལོ་ ༡༩༨༠ འགོ་སྟོད་ཙམ་ནས་སླར་ཡང་རེ་བ་ཆེན་པོ་ཞིག་བྱུང་བ་དེ་ཡང་འགྱུར་བ་ཕྱི་ཡོད། དེ་དང་ཕྱོགས་མཚུངས་ངོས་ཀྱིས་གནས་ཚུལ་གཞན་གལ་ཆེན་པོ་ཞིག་ཁྱེད་ཚོར་ཞུ་རྒྱུ་ནི་སྔ་མོ་མའོ་ཙེ་ཏུང་གིས་ (Chinese Chauvinism) དང་སེམས་སྦུག་དོག་པོས་རྒྱལ་ཞེན་གྱི་བསམ་ཚུལ་དེར་ངོ་རྒོལ་བྱས་ཡོད། ཉེ་ལམ་ལོ་བཅུ་ཕྲག་ནང་(Chinese Chauvinism) ལ་ངོ་རྒོལ་བྱེད་དགོས་པའི་སྐད་ཆ་དེ་ཡལ་ཚར་བ་རེད། ད་ཆ་རྒྱལ་ཞེན་གྱི་བསམ་ཚུལ་གཙིགས་ཆེར་འཛིན་རྒྱུ་དེ་ཡོད་པར་བརྟེན་ཁ་བྲལ་བ་ཞེས་མིང་གསར་པ་ཞིག་བཏགས་ཡོད་ཅེས་བཀའ་སྩལ། དེ་བཞིན་ཉི་ཧོང་གསར་འགོད་པ་ཞིག་གིས་རྒྱ་རིགས་རྩོམ་པ་པོ་སྐུ་ཞབས་ལིའུ་ཞའོ་པོར་ནོ་བེལ་ཞི་བདེའི་གཟེངས་རྟགས་ཐོབ་པ་དེར་རྒྱ་ནག་གཞུང་གི་བསམ་ཚུལ་ཇི་འདྲ་བྱུང་མིན་གྱི་དྲི་བ་ཕུལ་བར་༸གོང་ས་མཆོག་གིས་བཀའ་ལན་སྩལ་དོན། ད་ལྟའི་རྒྱ་ནག་གཞུང་གི་འགོ་ཁྲིད་མཁྲེགས་འཛིན་པ་ཚོས་སོ་སོ་དམར་ཤོག་ཚོགས་པ་ཁོ་ནར་བསམ་བློ་བཏང་བ་མ་གཏོགས་རྒྱ་ཆེ་ས་ནས་བསམ་བློ་གཏོང་གི་མེད། སྐུ་ཞབས་ལིའུ་ཞའོ་པོས་རྒྱ་ནག་གུན་ཁྲན་སྲིད་བྱུས་དེར་ངོ་རྒོལ་བྱས་པར་བརྟེན་འཛིན་བཟུང་བྱས་ཡོད། ཁོང་ཚོས་གུང་ཁྲན་ཚོགས་པའི་དབང་ཆ་གཅེས་སྲུང་བྱ་རྒྱུ་དེ་འགྲིག་པ་ཞིག་ཡིན་པར་ངོས་འཛིན་བྱེད་བཞིན་ཡོད།་ རྒྱ་ཆེ་ས་ནས་བརྗོད་ན་རྒྱ་ནག་གཞུང་གིས་བྱེད་སྟངས་དེ་འགྲོ་བ་མིའི་ཐོབ་ཐང་རྡོག་རོལ་གཏོང་རྒྱུའི་ལས་གཞི་ཚབས་ཆེ་ཤོས་དེ་ཆགས་ཡོད། རང་དབང་འདོད་མཁན་མི་མང་ཚོར་དྲག་གནོན་བྱ་རྒྱུ་དེ་བཟང་སྤྱོད་དང་འགལ་བ་ཞིག་ཡིན་པ་ཁོང་ཚོས་ཤེས་ཀྱི་མེད། ཁྱེད་ཀྱི་དྲི་བ་དེར་ལན་རྒྱས་བཤད་དགོས་ན་ཊོཀ་ཁྱོའི་ནང་རྟེན་གཞི་བྱས་པའི་རྒྱ་ནག་གཞུང་ཚབ་ལ་འདྲི་རོགས། དེ་དང་འབྲེལ་ནས་ངོས་ཀྱིས་ཁྱེ་ཚོར་ཞུ་རྒྱུ་ཞིག་ལ་རྒྱ་ནག་མི་མང་ཐེར་འབུམ་ ༡།༣ ཡོད་པ་ཚོར་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཆ་ཚང་ཡོད་པར་མ་ཟད། ཁོང་ཚོར་བདེན་རྫུན་དབྱེ་བ་འབྱེད་རྒྱུའི་རྣམ་དཔྱོད་ཀྱང་ཡོད། དངོས་ཡོད་གནས་ཚུལ་དེར་གཞི་བཞག་པའི་ཐོག་ནས་རྒྱ་ནག་གཞུང་གིས་དམ་བསྒྲགས་དང་གནས་ཚུལ་འཁྱོག་བཤད་བྱེད་རྒྱུ་དེ་དངོས་ཡོད་གནས་སྟངས་དང་མ་འཚམས་པ་ཞིག་དང་མཐའ་གཅིག་ཏུ་བཟང་སྤྱོད་དང་འགལ་བ་ཞིག་ཡིན་པས་ཕུགས་ལ་རྒྱ་ནག་གི་དམིགས་ཡུལ་ལ་གནོད་གཞི་ཞིག་ཆགས་རྒྱུ་ཡིན། གལ་ཏེ། རྒྱ་ནག་གཞུང་གིས་འཛམ་གླིང་ཚང་མར་དམ་བསྒྲགས་བྱེད་ཐུབ་ན་འགྲིག་པ་རེད། དེ་འདྲ་ཞིག་ཡོང་མི་སྲིད། དཔེར་ན། རྒྱ་ནག་གི་ཁྱིམ་མཚེས་ཉི་ཧོང་གི་གསར་འགྱུར་ལ་རྒྱ་ནག་གཞུང་གིས་དམ་བསྒྲགས་བྱེད་ཐུབ་ཀྱི་མེད། སོ་སོའི་རྒྱལ་ཁབ་ནང་དམ་བསྒྲགས་བྱས་པ་དེ་སོ་སོའི་མི་མང་ཚོར་མགོ་སྐོར་གཏོང་གི་ཡོད། དེ་བློ་ཕམ་པོ་རེད། རྒྱ་ནག་དམར་ཤོག་ཚོགས་པའི་དམིགས་ཡུལ་དེ་མི་མང་གི་བདེ་དོན་སྒྲུབ་རྒྱུ་ཡིན་པ་ལས་མི་མང་དམ་བསྒྲགས་བྱེད་རྒྱུ་དེ་མིན། ཁ་སང་ངོས་ཀྱིས་བརྗོད་པ་བཞིན་འཛམ་གླིང་འདི་མི་མང་ཚོར་བདག་པ་མ་གཏོགས་གཞུང་ལ་བདག་མེད། གཞུང་དེ་མི་མང་ཚོའི་བདེ་དོན་སྒྲུབ་རྒྱུའི་ཆེད་དུ་ཡིན་པ་ལས་མི་མང་ཚོ་མགོ་སྐོར་གཏོང་རྒྱུའི་དོན་དུ་མིན་ཞེས་བཀའ་ལན་སྩལ་ཡོད་པ་བཅས།།
