༄༅། །བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཞི་བདེ་དང་འཚེ་བ་མེད་པ། བྱམས་སྙིང་རྗེ་གོང་སྤེལ། ཁོར་ཡུག་སྲུང་སྐྱོབ་བཅས་ཀྱི་ཐོག་སྐུ་ཚེ་ཧྲིལ་པོར་མཛད་འཁུར་བཞེས་པའི་མཛད་རྗེས་ལ་ཆེ་བསྟོད་ཀྱིས་ཉེ་ལམ་ཕྱི་ལོ་ ༢༠༢༤ ཟླ་བ་ ༣ ཚེས་ ༣༡ ཉིན་རྒྱལ་སྤྱིའི་མེར་ཁུ་རི་གསར་གྱི་གཟེངས་རྟགས་ (Gold Mercury International Award 2025) འབུལ་བཞེས་མཛད་པའི་ཉིན་མོར་ཨིན་ཡུལ་གྲོས་ཚོགས་སུ་བོད་ཀྱི་ལོ་གསར་སྲུང་བརྩི་ཞུས་ཡོད།
དེ་ཡང་ཨིན་ཡུལ་གྲོས་ཚོགས་སུ་བོད་ཀྱི་ལོ་གསར་སྲུང་བརྩིའི་མཛད་སྒོ་དེ་བཞིན་ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་ནས་ཨིན་ཡུལ་སྐུ་ཚབ་དོན་ཁང་དང་། བོད་རང་དབང་ཚོགས་པ། ཨིན་ཡུལ་བོད་རིགས་ཚོགས་པ་བཅས་དང་མཉམ་འབྲེལ་གྱིས་གོ་སྒྲིག་གནང་འདུག་ཅིང་། སྐབས་དེར་ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་སྐུ་ཞབས་ཁི་རི་སི་ལཽ་ (Chris Law) ལགས་ཀྱིས་རབ་གནས་ཤིང་སྦྲུལ་ལོའི་གནམ་ལོ་གསར་ཚེས་ལ་དགའ་བསུ་དང་འབྲེལ། ཉེ་ལམ་ཨིན་ཡུལ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པ་བསྐྱར་འཛུགས་ཀྱིས་ད་ལྟའི་ཆར་གྲོས་ཚོགས་འཐུས་མི་གྲངས་ ༢༠ ཚོགས་ཞུགས་ཡོད་པ་དང་ཚོགས་པའི་ངོས་ནས་ཨིན་ཡུལ་གྲོས་ཚོགས་སུ་བོད་དོན་ཐོག་མུ་མཐུད་གླེང་སློང་གནང་རྒྱུའི་ཆོད་སེམས་ཡོད་པ་གསུང་འདུག
མཛད་སྒོའི་ཐོག་ལྷན་ཞུགས་ཡོད་པའི་ཨིན་ཡུལ་སྐུ་ཚབ་དོན་ཁང་གི་དྲུང་ཆེ་བསྟན་འཛིན་ཀུན་དགའ་ལགས་ཀྱིས་ཕྱི་ཟླ་ ༣ ཚེས་ ༣༡ ཉིན་མོ་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཙན་བྱོལ་དུ་བྲོས་བྱོལ་གྱིས་རྒྱ་གར་དུ་༧ཞབས་སོར་འཁོད་པའི་ཉིན་མོ་ཞིག་ཡིན་ལ། དེ་རིང་གི་ཉིན་མོར་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་སྤྱིའི་ Gold Mercury ཚོགས་པ་ནས་ཕྱི་ལོ་ ༢༠༢༥ ལོའི་ (Gold Mercury) གཟེངས་རྟགས་འབུལ་བཞེས་མཛད་པའི་ཉིན་མོ་ཞིག་ཀྱང་ཡིན་པ་འགྲེལ་བརྗོད་གནང་འདུག
གཞན་ཡང་སྐུ་ཚབ་དོན་ཁང་གི་དྲུང་ཆེ་བསྟན་འཛིན་ཀུན་དགའ་ལགས་ཀྱིས་ Voice for The Voiceless ཞེས་མགོན་པོ་མཆོག་གིས་འདས་པའི་ལོ་ངོ་ ༧༠ ལྷག་གི་རིང་བོད་དང་བོད་མིའི་ཆེད་བོད་དོན་འཐབ་རྩོད་ཀྱི་མཛད་འཁུར་བཞེས་པའི་སྐོར་སོགས་འཁོད་པའི་ཕྱག་དེབ་གསར་པ་འདིའི་ནང་། མགོན་པོ་མཆོག་གིས་མ་འོངས་༧སྐུའི་ཡང་སྲིད་དེ་བཞིན་རང་དབང་རྒྱལ་ཁབ་ཅིག་ཏུ་སྐུ་འཁྲུངས་རྒྱུའི་བཀའ་གསལ་གནང་ཡོད་པ་བཞིན། ཨིན་ཡུལ་གཞུང་ནས་དེ་དོན་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་ངོས་འཛིན་གྱི་སྐུ་དབང་ཡོངས་རྫོགས་མགོན་པོ་གང་ཉིད་ཁོ་ནར་ཡོད་པའི་བསྒྲགས་གཏམ་འདོན་སྤེལ་ཡོང་བ་དང་། གལ་ཆེའི་གནད་དོན་དེའི་ཐོག་མཛད་སྒོར་ལྷན་ཞུགས་ཡོད་པའི་གྲོས་ཚོགས་འཐུས་མི་རྣམ་པ་དང་བོད་དོན་རྒྱབ་སྐྱོར་བ་རྣམ་པས་རྒྱབ་སྐྱོར་ཡོང་བའི་ཞུ་སྐུལ་གནང་འདུག
གཞན་ཡང་མཛད་སྒོའི་ཐོག་དགེ་སློང་མ་པདྨ་བདེ་སྐྱིད་ལགས་ཀྱིས་ཁོང་རང་ཉིད་དེ་སྔ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མཇལ་ཁ་ཞུ་སྐབས་ཀྱི་མྱོང་བ་ཕྱིར་དྲན་དང་སྦྲགས། སྤྱི་ནིར་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་སྙིང་རྗེ་དང་། བརྩེ་བ། འཚེ་བ་མེད་པ་དང་ཞི་བདེ་བཅས་ཀྱི་དོན་དུ་ཁ་ཞེ་གཉིས་ཀྱི་ཐོག་ནས་ཕྱག་བཞེས་བཟང་པོ་མཛད་ཡོད་པའི་སྐོར་གསུང་བཤད་གནང་འདུག
ཨིན་ཡུལ་གྲོས་ཚོགས་སུ་བོད་ཀྱི་ལོ་གསར་སྲུང་བརྩིའི་མཛད་སྒོའི་ཐོག་ཨིན་ཡུལ་གྲོས་ཚོགས་འཐུས་མི་ལྕམ་སྐུ་ཀེ་རི་མེག་ཀར་ཐི་ (Kerry McCarthy) ལགས་དང་། གྲོས་ཚོགས་འཐུས་མི་ལྕམ་སྐུ་ས་རཱ་ཅམ་པི་ཡོན་ (Sarah Champion) ལགས། གྲོས་ཚོགས་འཐུས་མི་ལྕམ་སྐུ་ཇེ་སི་ཀ་མོར་ཌེན་ (Jessica Morden) ལགས། གྲོས་ཚོགས་འཐུས་མི་སྐུ་ཞབས་ཨེ་ལེག་སི་སོ་བེལ་ (Alex Sobel) ལགས། གྲོས་ཚོགས་འཐུས་མི་སྐུ་ཞབས་པི་ཊི་ཝི་ཤར་ཊི་ (Pete Wishart) ལགས། གྲོས་ཚོགས་འཐུས་མི་ལྕམ་སྐུ་ཝེ་རཱ་ཧོབ་ཧའུ་སི་ (Wera Hpobhouse) ལགས་བཅས་ཕེབས་ཞུགས་གནང་ཡོད།།
