༄༅། །ཕྱི་ལོ་ ༢༠༢༥ ཟླ་བ་ ༠༤ ཚེས་ ༠༤ ཉིན་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་རྒྱ་གར་གྱི་རྒྱལ་ལྡི་ལིའི་ (Samvidhan Sadan) དུ་བོད་དོན་ཞུ་གཏུག་ཐོག་བགྲོ་གླེང་ཚོགས་འདུ་ཚོགས་ཡོད། སྐབས་དེར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་བྷར་ཏུར་ཧ་རི་མེ་ཏཱབ་ (Shri Bhartruhari Mahtab) མཆོག་དང་། གྲོས་ཚོགས་འཐུས་མི་སྐུ་ཞབས་ཏ་པིར་གྷའོ་ (Shri Tapir Gao) མཆོག་རྣམ་གཉིས་དབུ་བཞུགས་གནང་ཡོད།
དེ་ཡང་བགྲོ་གླེང་ཐོག་གྲོས་ཚོགས་ནང་གི་འབྲེལ་ལམ་སྲ་བརྟན་གཏོང་རྒྱུ་དང་། མངའ་སྡེ་དང་རྒྱལ་ཡོངས། རྒྱལ་སྤྱི་རིམ་པར་བོད་ཀྱི་གནད་དོན་སྐོར་གོ་རྟོགས་གོང་མཐོར་གཏོང་རྒྱུའི་གྲོས་བསྡུར་དང་། དེ་བཞིན་བོད་ཀྱི་འཐབ་རྩོད་རྒྱུན་གནས་ཐུབ་པར་ཞུ་གཏུག་གི་ལས་རིམ་དང་། ཆབ་སྲིད་ཀྱི་རྒྱབ་སྐྱོར་ཤུགས་ཆེར་གཏོང་ཆེད་གཙོ་བོར་དམིགས་ཡོད།
སྐབས་དེར་རྒྱ་གར་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་བྷར་ཏུར་ཧ་རི་མེ་ཏཱབ་ (Shri Bhartruhari Mahtab) མཆོག་དང་། ཨ་རུ་ཎཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཏ་པིར་གྷའོ་ (Shri Tapir Gao) མཆོག་གཙོས་པའི་ཨོ་ཌི་ཤཱ་མངའ་སྡེའི་གྲོས་ཚོགས་འཐུས་མི་སྐུ་ཞབས་སུ་ཇིཏ་ཀུ་མར་ (Sujeet Kumar) ལགས། ཇམྨུ་དང་། ཀཤ་མཱིར་མངའ་སྡེའི་གྲོས་ཚོགས་འཐུས་མི་སྐུ་ཞབས་གྷུ་ལམ་ཨ་ལི་ (Gulam Ali) ལགས། ནཱ་གཱ་ལཻཎྜ་མངའ་སྡེའི་གྲོས་ཚོགས་འཐུས་མི་ལྕམ་ཨེ་སི་ཕངྒ་ནོན་ཀོན་ཡཱག་ (Smt. S. Phangnon Konyak ) ལགས། ནུབ་བངྒཱལ་མངའ་སྡེའི་གྲོས་ཚོགས་འཐུས་མི་འབུམ་རམས་པ་ཇཱ་ཡཱན་ཏཱ་ཀུ་མཱར་ ( Dr. Jayanta Kumar Roy) ལགས། ཨ་སམ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཀམ་ཁྱཱ་པྲ་སཱད་ཏཱ་སཱ་ (Shri Kamkhya Prasad Tasa) ལགས། སི་ཀིམ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཨིནྡྲ་ཧང་སུ་བྷ་ (Shri Indra Hang Subba) ལགས། ནཱ་གཱ་ལེནྜ་མངའ་སྡེའི་གྲོས་ཚོགས་འཐུས་མི་སྐུ་ཞབས་སུཔོང་མེ་རེན་ཇཱམིར་ (Shri Supongmeren Jamir) ལགས། ཨོ་ཌི་ཤཱ་མངའ་སྡེའི་གྲོས་ཚོགས་འཐུས་མི་འབུམ་རམས་པ་པྲ་དིབ་ཀུ་མར་ ( Dr. Pradeep Kumar Panigrahy) ལགས། མི་ཛོ་རཱམ་མངའ་སྡེའི་གྲོས་ཚོགས་འཐུས་མི་སྐུ་ཞབས་རི་ཆར་ ( Richard Vanlalhamangaiha) ལགས། ཏི་ལང་གྷ་ན་མངའ་སྡེའི་གྲོས་ཚོགས་འཐུས་མི་ལྕམ་ཀཱ་དི་ཡཱན་ཉ (Dr. Kadiyan Kavya) ལགས། མ་ཎི་པུར་མངའ་སྡེའི་གྲོས་ཚོགས་འཐུས་མི་སྐུ་ཞབས་ཨཱལ་ཧྥྲེཌ་ཀན་ང་མ་ཨཱཐར་ (Shri Alfred Kan-Ngam Arthur) ལགས་བཅས་ཕེབས་ཞུགས་གནང་ཡོད།
དེ་རྗེས་ལྡི་ལི་སྐུ་ཚབ་དོན་གཅོད་འཇིགས་མེད་འབྱུང་གནས་ལགས་དང་། འཕགས་བོད་འབྲེལ་མཐུད་ལས་ཁུངས་ཀྱི་འབྲེལ་མཐུད་པ་བཀྲ་ཤིས་བདེ་སྐྱིད་ལགས། གྲོས་ཚོགས་འཐུས་མི་འབྲེལ་མཐུད་པ་ཕུན་ཚོགས་རྒྱ་མཚོ་ལགས། རྩིས་པ་མིག་དམར་མཚམས་གཅོད་ལགས། ལས་འཆར་འགན་འཛིན་ངག་དབང་ཆོས་ལྡན་ལགས་བཅས་ནས་གྲོས་ཚོགས་འཐུས་མ་རྣམས་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་མི་མཉམ་དུ་ལོ་ངོ་ ༧༠ ལྷག་རིང་གི་འཐབ་རྩོད་དང་འབྲེལ་བའི་ཐོག་ནས་ཕྱག་དེབ་གསར་པ་ (VOICE FOR THE VOICELESS) ཞེས་པ་ཕྱག་རྟགས་སུ་ཕུལ་ཡོད།
ཚོགས་འདུ་འདིས་བོད་དོན་ཐོག་རྒྱ་གར་གྱིས་མུ་མཐུད་རྒྱབ་སྐྱོར་གནང་བ་དང་། བོད་ནང་དྲང་བདེན་དང་འགྲོ་བ་མིའི་ཐོབ་ཐང་ཆེད་རྒྱ་གར་གྱི་ཁྲིམས་བཟོ་བ་རྣམས་ཀྱི་འགྱུར་བ་མེད་པའི་དམ་བཅའ་མཚོན་གྱི་ཡོད་པ་བཅས།།
