༄༅། །གངས་སྐྱོན་གྱི་གོད་ཆག་བྱུང་བའི་ལ་དྭགས་བོད་རིགས་འབྲོག་ཁྱིམ་རྣམས་ལ་ཛ་དྲག་གུན་སྐྱོབ་རོགས་སྐྱོར་འབོད་སྐུལ་དང་འབྲེལ། ལ་དྭགས་གཞིས་སྤྱི་ལས་ཁུངས་ཁྱབ་ཁོངས་བྱང་ཐང་ས་ཁུལ་ནི་ས་ཁག་དགུ་ལས་གྲུབ་པའི་བོད་རིགས་འདུས་སྡོད་ཀྱི་སྤྱི་ཚོགས་ཆེན་པོ་ཞིག་ཡིན་པ་དང་། བོད་རིགས་དེ་དག་ནི་འཚོ་རྟེན་ནི་འབྲོག་ལས་ཡིན་ཞིང་། ར་ལུག་དང་འབྲི་གཡག་ནི་ཁོང་ཚོའི་འཚོ་གནས་དང་སྲོལ་རྒྱུན་རིག་གཞུང་སྲུང་སྐྱོབ་ཐད་ཧ་ཅང་གི་གལ་འགངས་ཆེན་པོ་ཆགས་ཡོད།
ད་རེས་དབུས་བོད་མིའི་ངལ་སེལ་ཚོགས་པ་ (CTRC) ནས་ལ་དྭགས་ཀྱི་འབྲོག་པ་རྣམས་ལ་འཕྲད་པའི་ཛ་དྲག་གནས་སྟངས་ཤིག་ཞུ་རྒྱུར། ཉེ་ཆར་བྱང་ཐང་དང་གླེ་ཁུལ་དུ་ཁ་བབས་ཚད་མཐོ་བའི་རྐྱེན་གྱིས་འབྲོག་ཁུལ་གྱི་ར་ལུག་གྲངས་ ༤,༡༤༠ ཤི་ཡོད་པ་དང་། གངས་ཞོད་ཀྱི་གོད་ཆག་ཆེན་པོ་དེས་ཁྱིམ་ཚང་ ༢༤༠ ལྷག་གི་འཚོ་བ་དང་། རིག་གཞུང་། རྒྱུན་གནས་བཅས་ལ་དོ་ཕོག་ཆེན་པོ་ཞིག་བཏང་ཡོད་པ་དངོས་བདེན་ཡིན།
དཀའ་ཚེགས་ཅན་གྱི་ཁོར་ཡུག་དེའི་ནང་འཚོ་གནས་བྱེད་བཞིན་པའི་ཁྱིམ་ཚང་དེ་དག་ལ་ད་ལྟ་དཀའ་ངལ་ཆེན་པོ་འཕྲད་བཞིན་ཡོད། སྒོ་ཕྱུགས་ཤི་རྐྱེན་ལས་བལ་དང་འོ་མའི་ཐོན་ཁུངས་ཚོང་ལས་ཀྱི་མ་རྩ་ཤོར་བ་མ་ཟད། ཉིན་རེའི་འཚོ་རྟེན་ཀྱི་འབྱུང་ཁུངས་ཀྱང་ཉུང་དུ་ཕྱིན་ཡོད་པ་མ་ཟད། གོད་ཆག་འདིས་ཁོང་ཚོའི་གནས་སྐབས་ཀྱི་འཕྲོད་བསྟེན་དང་། བདེ་འཇགས། དེ་བཞིན་སྲོལ་རྒྱུན་གྱི་འཚོ་ཐབས་རྒྱུན་གནས་ཐུབ་དཀའ་བའི་གནས་སུ་སྦྱར་ཡོད།
རོགས་སྐྱོར་གནང་ཕྱོགས། ང་ཚོས་གནོད་འཚེ་ཕོག་པའི་ཁྱིམ་ཚང་ཚོར་འཕྲལ་མར་ངལ་སེལ་གུན་སྐྱོབ་ཁུངས་གཏོང་ཞུ་ཆེད་མི་མང་གི་བློས་བཅད་ཞལ་འདེབས་བསྡུ་རུབ་ཀྱི་ལས་འགུལ་ཞིག་འགོ་བརྩམས་ཡོད་པ་དང་། དེར་ཁྱེད་ཀྱི་རྒྱབ་སྐྱོར་ནི་གལ་ཆེན་དུ་གྱུར་ཡོད་པས་ཞལ་འདེབས་གནང་འདོད་ཡོད་མཁན་རྣམས་ཀྱིས་རང་ཉིད་ཀྱི་ཁྱབ་ཁོངས་ས་གནས་འགོ་འཛིན་ལས་ཁུངས་སམ། སྐུ་ཚབ་དོན་གཅོད་ལས་ཁུངས་སུ་འབྲེལ་བ་གནང་རོགས།
ཛ་དྲག་འབོད་སྐུལ་འདི་རྒྱ་ཁྱབ་ཆེད་བརྒྱུད་སྤེལ། མི་མང་གང་མང་ལ་འབྲེལ་བ་མཐུད་ཐུབ་ཆེད་ང་ཚོར་རོགས་རམ་གནང་སྟེ། འབོད་སྐུལ་ཞུ་ཡིག་འདི་རང་ཉིད་ཀྱི་སྤྱི་ཚོགས་དྲ་ལམ་གྱི་ཁ་བྱང་ཁག་བརྒྱུད་སྤྱི་ཚོགས་ནང་ཁྱབ་སྤེལ་གང་ཐུབ་གནང་རོགས།
འབོད་སྐུལ་ཞུ་ཡིག་འདི་ནི་ཞལ་འདེབས་ཀྱི་རེ་སྐུལ་ཙམ་མ་ཡིན་པར། དཀའ་ངལ་ཆེན་པོ་འཕྲད་པའི་རང་རེའི་སྤྱི་ཚོགས་ཤིག་ལ་སྙིང་རྗེ་དང་། སྐྱིད་སྡུག་མཉམ་མྱོང་གནང་རྒྱུའི་འབོད་སྐུལ་ཞིག་ཀྱང་ཡིན། འབྲོག་ཁྱིམ་དེ་དག་གིས་འབྱུང་བའི་གོད་ཆག་དེར་གདོང་ལེན་བྱེད་མུས་ཡིན་པས་ན། ཁོང་ཚོ་དཀའ་ཚེགས་དེ་ལས་གྲོལ་ཏེ་འཚོ་གནས་བསྐྱར་གསོ་ཐུབ་ཆེད་རྒྱ་ཆེའི་གཏོང་ཕོད་ཅན་རྣམས་ཀྱིས་བྱམས་སེམས་ཀྱི་ལམ་ནས་རྒྱབ་སྐྱོར་གང་ཐུབ་གནང་སྐྱོང་ཡོང་བ་ཞུ།
ལས་འགུལ་འདིའི་སྐོར་ཞིབ་ཕྲ་མཁྱེན་འདོད་ན་ང་ཚོར་ཐད་ཀར་འབྲེལ་བ་གནང་རོགས། འབྲེལ་ཡུལ་གློག་འཕྲིན་ཁ་བྱང་[[email protected]] དང་། དྲ་ཚིགས་ཁ་བྱང་ [www.CentralTibetanReliefCommittee.net] ཡིན། བོད་མིའི་སྒྲིག་འཛུགས་ནང་སྲིད་ལས་ཁུངས་ནས་ཕྱི་ལོ་ ༢༠༢༥ ཟླ་ ༤ ཚེས་ ༠༤ ལ།།
