༄༅། །ཕྱི་ལོ་ ༢༠༢༥ ཟླ་བ་ ༠༤ ཚེས་ ༠༤ ཉིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་དྷ་ས་མེག་གྷན་སྐོར་སྲུང་འགོ་དཔོན་ (SHO) སུ་རེནྡར་ཋཱ་ཀུར་ལགས་དང་མཇལ་འཕྲད་ཀྱིས་ཁྱབ་ཁོངས་ས་གནས་བོད་མི་རྣམས་ལ་འཕྲད་བཞིན་པའི་དཀའ་ངལ་སྐོར་བཀའ་བསྡུར་དང་འབྲེལ། ས་གནས་བོད་མིའི་བདེ་དོན་ཐོག་ཕྱོགས་ཕན་ཚུན་དབར་མུ་མཐུད་མཉམ་ལས་གནང་རྒྱུའི་མོས་མཐུན་བྱུང་ཡོད།

དེ་ཡང་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་ས་གནས་སུ་གནས་སྡོད་བོད་མིའི་བདེ་འཇགས་དང་འབྲེལ་བའི་སྐོར་གསུང་ཞིང་།  ས་གནས་ཁྲིམས་སྲུང་མི་སྣ་དང་བོད་མིའི་སྒྲིག་འཛུགས་དབར་གྱི་འབྲེལ་ལམ་གོང་མཐོར་གཏོང་ཐབས་ཀྱི་གནད་འགག་སྐོར་གསུང་ཡོད།

ས་གནས་སྐོར་སྲུང་འགོ་དཔོན་སྐུ་ཞབས་སུ་རེནྡར་ཋཱ་ཀུར་ལགས་ཀྱིས་གསན་བཞེས་དང་འབྲེལ་གནད་དོན་དེ་དག་གི་ཐོག་རྒྱབ་སྐྱོར་གནང་རྒྱུ་མ་ཟད། ས་གནས་སུ་ཁྲིམས་དང་སྒྲིག་གཞི་ཚུལ་བཞིན་ལག་བསྟར་ཡོང་རྒྱུ་གལ་ཆེན་པོ་ཡིན་པ་གསུང་འདུག

ད་ཐེངས་ཀྱི་མཇལ་འཕྲད་འདི་ནི་བོད་མིའི་སྒྲིག་འཛུགས་ནས་བཙན་བྱོལ་བོད་མིའི་བདེ་འཇགས་དང་བདེ་དོན་ཐོག་འགན་ལེན་དང་། ས་གནས་ཀྱི་ཁྲིམས་འཛིན་པ་རྣམས་དང་འབྲེལ་ལམ་དམ་ཟབ་གཏོང་བའི་རྒྱུན་མཐུད་འབད་བརྩོན་མཚོན་གྱི་ཡོད་པ་བཅས།།