༄༅། །ཕྱི་ལོ་ ༢༠༢༥ ཟླ་བ་ ༠༤ ཚེས་ ༠༢ ཉིན་དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་ཧི་མཱ་ཅལ་མངའ་སྡེའི་ཁྲལ་བསྡུའི་བློན་ཆེན་སྐུ་ཞབས་ཇ་གཏ་སིངྒ་ནེ་གི་ (Jagat Singh Negi) མཆོག་དང་མཇལ་འཕྲད་གནང་ཡོད།
དེ་ཡང་དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་མངའ་སྡེའི་ཁྲལ་བསྡུའི་བློན་ཆེན་མཆོག་དང་མཇལ་འཕྲད་ཀྱིས་ཧི་མཱ་ཅལ་མངའ་སྡེ་སྤྱི་དང་བྱེ་བྲག་ཏུ་དྷ་རམ་ས་ལར་གནས་སྡོད་བོད་མི་ཚོར་འཕྲད་བཞིན་པའི་དཀའ་ངལ་ཁག་སྙན་སེང་དང་དེ་འབྲེལ་དཀའ་སེལ་ཡོང་བའི་ཞུ་སྐུལ་གནང་འདུག སྐབས་དེར་སྐུ་ཞབས་ཇ་གཏ་སིངྒ་མཆོག་གིས་སིམ་ལའི་སན་ཇོ་ལིའི་ས་ཆའི་བོགས་གཏོང་གི་གནད་དོན་དེ་མངའ་སྡེ་གཞུང་ལ་ཕུལ་ཟིན་པ་དང་། གཏོང་ལེན་སློབ་གྲྭའི་ས་ཆའི་གནད་དོན་དེ་ད་ལྟ་བརྒྱུད་རིམ་འགྲོ་བཞིན་ཡོད་ཚུལ་གསུངས་ཡོད་པར་དྷ་ས་ས་གནས་འགོ་འཛིན་དཀོན་མཆོག་མིག་དམར་ལགས་ཀྱིས་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་དང་། མངའ་སྡེ་གཞུང་གིས་གནད་དོན་འདི་དག་ལ་ཐུགས་སྣང་གནང་བར་ཐུགས་རྗེ་ཆེ་ཞུས་ཡོད།
ལྷག་པར་དྷ་ས་བོད་ཀྱི་ཟློས་གར་གྱི་འགྲོ་ལམ་གཡས་གཡོན་དུ་གནས་སྡོད་བོད་མི་ཁྱིམ་ཚང་ ༢༡༨ ཀྱི་ཡུན་རིང་ལྷག་པའི་གནད་དོན་སྐོར་གླེང་སློང་གནང་སྐབས་ཁོང་གིས་རྒྱ་གར་དབུས་གཞུང་གི་ནང་སྲིད་ལས་ཁུངས་ཀྱི་ཡི་གེ་དང་། ས་གནས་ཀྱི་རྫོང་དཔོན་གྱི་ཞིབ་འཇུག་སྙན་ཐོ་བཅས་ཀྱི་འདྲ་བཤུས་དང་བཅས་སྙན་ཞུ་ཞིག་ཕུལ་ཡོད། བློན་ཆེན་མཆོག་གིས་ཞིབ་ཕྲའི་གནས་ཚུལ་ཁག་ལ་གཟིགས་ཞིབ་གནང་རྗེས་སྙན་ཞུའི་ཐོག་རང་གི་མཆན་བྲིས་གནང་སྟེ་མཇུག་སྐྱོང་གི་ལས་དོན་ཁག་སྒེར་དྲུང་ལ་བཀོད་མངགས་གནང་ཡོད་པ་བཅས།།
