
༄༅། །འདི་གར་ཚོགས་དྲུང་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༥ ཟླ་བ་ ༤ པའི་ཚེས་ ༢ ཉིན་གྱི་ཕྱི་དྲོ་ཆུ་ཚོད་ ༣།༣༠ ཐོག་འཇར་མན་གྲོས་ཚོགས་འཐུས་མི་སྐུ་ཞབས་མེ་ཁལ་ བྷ་རན་ཌི་ (Michael Brand, MP, Germany) མཆོག་དང་། འཇར་མན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ཀཡེ་ མུ་ལར་ (Kai Muller, Executive Director, ICT Germany) ལགས་རྣམ་གཉིས་བོད་མི་མང་སྤྱི་འཐུས་ལྷན་ཁང་དུ་ཕེབས་པ་དང་། སྐབས་དེར་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག་རྣམ་གཉིས་ཀྱིས་གཙོས་སྤྱི་འཐུས་རྒྱུན་ལས་རྣམ་པས་སྣེ་ལེན་མཇལ་འཕྲད་གནང་སོང་།

སྐབས་དེར་དཔལ་ལྡན་ཚོགས་གཙོ་མཆོག་གིས་ཐོག་མར་འཇར་མན་གྱི་སྐུ་ཚབ་ཚོགས་ཆུང་གི་ཚོགས་མི་རྣམ་པ་གཉིས་བོད་མི་མང་སྤྱི་འཐུས་ལྷན་ཁང་དུ་ཕེབས་པར་འཚམས་འདྲི་གནང་རྗེས། ཉེ་ཆར་ཚོགས་ཟིན་པའི་གྲོས་ཚོགས་ཚོགས་དུས་དགུ་པའི་སྐབས། ཨ་རིའི་རོགས་དངུལ་ཆད་པའི་རྐྱེན་གྱིས་ཧིན་སྒོར་ས་ཡ་ ༣༠༠ ཙམ་གཅོག་ཆ་བྱས་པའི་རྗེས། སྔོན་རྩིས་ཧིན་སྒོར་ས་ཡ་ ༣༣༠༠ ལྷག་ཙམ་བཀའ་འཁྲོལ་གཏན་འབེབས་གནང་ཐུབ་པ་དང་། ཁྲིམས་བཟོའི་ལས་དོན་གྲངས་བཅུ་བཞི། གཞུང་འབྲེལ་གྲོས་ཆོད་གྲོས་འཆར་བརྒྱད། སྐར་རྟགས་ཅན་གྱི་དྲི་བ། མང་ཚོགས་རྩིས་ཁྲ་ཚོགས་ཆུང་སྐབས་ ༡༢ པའི་སྙན་ཐོ་སྙན་སྒྲོན་གནང་བ་སོགས་གྲོས་ཚོགས་ཀྱི་ལས་རིམ་སྐོར་ངོ་སྤྲོད་སྙིང་བསྡུས་དང་སྦྲགས་གསུང་དོན། ཁྱེད་རྣམ་གཉིས་ནི་ཡུན་རིང་ནས་བོད་དོན་ཐོག་རྒྱབ་སྐྱོར་གནང་མཁན་ཞིག་ཡིན་སྟབས་བོད་ཀྱི་གནས་སྟངས་སྐོར་གསལ་པོ་མཁྱེན་བསྡད་ཡོད་པ་རེད། གནས་ཚུལ་གསར་པ་འདྲ་པོ། ཉེ་ཆར་ཕྱི་ཟླ་ ༣ པའི་ཚེས་ ༢༨ ཉིན་རྒྱ་ནག་དམར་གཞུང་གིས་དོན་ཚན་བརྒྱད་ཅན་གྱི་རྒྱབ་ཤ་དཀར་པོའི་དེབ་ཟེར་བ་བཏོན་པ་དང་།

གཞི་རྩའི་ཕྱི་ལོ་ ༡༩༩༢ ནས་བཟུང་ད་བར་རྒྱབ་ཤ་དཀར་པོའི་དེབ་ཟེར་བ་བཅུ་བདུན་བཏོན་ཡོད་པ། ད་རེས་བཏོན་པའི་དེབ་འདིའི་ནང་། བོད་ནང་ཆོས་དད་རང་དབང་ཡོད་པ་དང་། སྤྲུལ་སྐུའི་ཡང་སྲིད་ངོས་འཛིན་ཞུ་ཕྱོགས་རྒྱ་ནག་གཞུང་གི་ཁྲིམས་སྒྲིག་ལྟར་འགྲོ་དགོས་པ། ཁོར་ཡུག་ཐོག་ལའང་ཡག་པོ་ཡོད་པ་སོགས་འབུར་དུ་བཏོན་ནས་བྲིས་འདུག འོན་ཀྱང་དངོས་ཡོད་གནས་ཚུལ་ལ་བལྟས་པ་ཡིན་ན། ཕྱི་ཟླ་ ༣ པའི་ནང་བོད་ནང་དམིགས་བསལ་གྱིས་དམ་བསྒྲགས་བྱས་ནས་མཐོ་སློབ་དང་། སློབ་གྲྭ་ཁག་གུང་གསེང་གཏོང་མི་ཆོག་པ་དང་། དགོན་སྡེ་ཁག་གི་ནང་རྒྱལ་གཅེས་ཆོས་གཅེས་ཞེས་པའི་སློབ་གསོ་སྤེལ་རྒྱུའི་ཐོག་དུས་ཚོད་བཏང་འདུག རྒྱ་ནག་དམར་གཞུང་གིས་རྒྱབ་ཤ་དཀར་པོའི་ནང་བཤད་པའི་གནས་ཚུལ་རྣམས་དངོས་ཡོད་གནས་ཚུལ་དང་མི་མཐུན་པ་དང་། རྫུན་སྒྲིག་ལོག་བཤད་ཡིན་པ་སོགས་ཀྱི་སྐོར་གསུངས་རྗེས། གྲོས་ཚོགས་འཐུས་མི་སྐུ་ཞབས་མེ་ཁལ་མཆོག་བརྒྱུད་ནས་འཇར་མན་གྲོས་ཚོགས་ནང་བོད་དོན་རྒྱབ་སྐྱོར་ཚད་མཐོར་ཡོང་ཐབས་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོགས་ཆུང་གི་ཚོགས་མི་རྣམས་ཡུ་རོབ་ནང་བོད་དོན་ཞུ་སྐུལ་ཕེབས་སྐབས། འཇར་མན་རྒྱལ་སྤྱིའི་བོད་དོན་ལས་འགུལ་ཁང་ནས་མཉམ་རུབ་གང་ལེགས་གནང་བར་འགན་འཛིན་ཀཡེ་ མུ་ལར་ལགས་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་གནང་སོང་།

དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག་གིས་ཐོག་མར་འཚམས་འདྲི་དང་སྦྲགས་གཙོ་བོ་གསུང་དོན། རྒྱ་ནག་དམར་གཞུང་གིས་བོད་དོན་ཐོག་རྒྱབ་ཤ་དཀར་པོ་ཟེར་བའི་དེབ་མང་ཤོས་འདོན་སྤེལ་བྱས་ཡོད་པ་དེས། བོད་ནང་གི་དངོས་ཡོད་གནས་ཚུལ་འགྲེལ་བརྗོད་ལོག་པ་བྱེད་བཞིན་ཡོད་པ་གསལ་པོར་སྟོན་གྱི་ཡོད་པའི་སྐོར་དང་། རྒྱ་ནག་དམར་གཞུང་གིས་བོད་ཕྲུག་རྣམས་རྒྱའི་གཏན་འཇགས་སློབ་གྲྭའི་ནང་བཙན་ཤེད་ཐོག་སློབ་འཇུག་བྱས་བཅུག་སྟེ་བོད་མི་རིགས་ཀྱི་སྐད་ཡིག་དང་། རིག་གཞུང་རྣམས་རྩ་མེད་བཟོས་ཏེ། བོད་རིགས་རྣམས་རྒྱ་རིགས་སུ་འགྱུར་ཐབས་བྱེད་བཞིན་ཡོད་པ་སོགས་བོད་ནང་གི་ད་ལྟའི་ཛ་དྲག་གནས་སྟངས་སྐོར་གསུངས་པ་དང་། འཇར་མན་སྐུ་ཚབ་ཚོགས་ཆུང་གི་ཚོགས་མི་རྣམ་པ་གཉིས་ནས་མུ་མཐུད་བོད་དོན་ཐོག་རྒྱབ་སྐྱོར་གནང་རྒྱུའི་སྐོར་སོགས་གསུངས་རྗེས། གྲོས་ཚོགས་ཀྱི་ཚོགས་ཁང་ནང་གཟིགས་སྐོར་ཕེབས་ཡོད་པ་བཅས། །






