༄༅། །ཕྱི་ལོ་ ༢༠༢༥ ཟླ་བ་ ༤ པའི་ཚེས་ ༤ རེས་གཟའ་པ་སངས་ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་ཁང་ནང་དཔལ་ལྡན་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་མདུན་དུ་ཆེས་མཐོའི་ཁྲིམས་ཞིབ་ཁང་གི་བདམས་ཐོན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་ལས་འཁུར་དམ་འབུལ་ཞུས་གནང་སོང་།དེ་ཡང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་བཅུ་གཉིས་པའི་ཐོག་ངོ་ཡོད་སྤྱི་འཐུས་རྣམས་ནས་གསང་བའི་འོས་ཤོག་འཕངས་ཏེ་ཁྲིམས་དྲུང་ཡེ་ཤེས་དབང་མོ་ལགས་ལ་འོས་གྲངས་ ༣༡ ཐོབ་སྟེ་མང་མོས་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བར་བདམས་ཐོན་བྱུང་ཡོད།
དེ་རིང་སྔ་དྲོ་ཆུ་ཚོད་ ༡༠།༣༠ ཐོག་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག དཔལ་ལྡན་ཚོགས་གཞོན་སྒྲོལ་མ་ཚེ་རིང་མཆོག བོད་མི་མང་སྤྱི་འཐུས་རྒྱུན་ལས་རྣམ་པ་བཅས་གྲོས་ཚོགས་ཚོགས་ཁང་ནང་ལྷན་འཛོམས་ཀྱིས་ཐོག་མར་དཔལ་ལྡན་ཚོགས་གཙོ་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་ཁྲི་རིན་པོ་ཆེར་དཀར་གཙང་མཇལ་དར་བསྒྲོན་འབུལ་དང་། དེ་རྗེས་བདམས་ཐོན་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གིས་ཀྱང་དེ་མཚུངས་ཞུས་གྲུབ་མཚམས། བཙན་བྱོལ་བོད་མིའི་བཅའ་ཁྲིམས་དོན་ཚན་རེ་གསུམ་པའི་ནང་གསེས་ ༣ པ། “ཁྲིམས་ཞིབ་པ་ཆེ་བར་འོས་ཐོན་བྱུང་འཕྲལ་ལས་འཁུར་དུ་མ་ཞུགས་གོང་ཁྲིམས་ཞིབ་པ་ཆེ་བའི་མདུན་ནམ། ཁྲིམས་ཞིབ་པ་ཆེ་བ་མེད་ཚེ་སྤྱི་འཐུས་ཚོགས་གཙོའི་མདུན་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ་ཁས་ལེན་བྱེད་དགོས། ཁྲིམས་ཞིབ་པ་གཞན་གཉིས་འོས་ཐོན་བྱུང་འཕྲལ་ཁྲིམས་ཞིབ་པ་ཆེ་བའི་མདུན་ནམ། ཁྲིམས་ཞིབ་པ་ཆེ་བ་མེད་ཚེ་སྤྱི་འཐུས་ཚོགས་གཙོའི་མདུན་ལས་འཁུར་དུ་མ་ཞུགས་གོང་ཁྲིམས་ལུགས་སུ་གཏན་འབེབས་བྱས་པའི་ཚིག་གཞི་ལྟར་ལས་འཁུར་དམ་བཅའམ། ཁས་ལེན་བྱེད་དགོས།” ཞེས་པའི་དགོངས་དོན་ལྟར། དཔལ་ལྡན་ཚོགས་གཙོ་མཆོག་གི་མདུན་ནས་ལས་འཁུར་དམ་འབུལ་དང་། དམ་འབུལ་མ་དེབ་ཐོག་མཚན་རྟགས་བཀོད་གནང་སོང་།
དེ་རྗེས་སྤྱི་ལྷན་ཚོམས་ཆེན་ནང་དཔལ་ལྡན་ཚོགས་གཙོ་མཆོག་དང་། དཔལ་ལྡན་སྲིད་སྐྱོང་མཆོག དཔལ་ལྡན་ཚོགས་གཞོན་མཆོག སྤྱི་འཐུས་རྒྱུན་ལས་རྣམ་པ་བཅས་ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་ལ་འཚམས་འདྲིའི་མཇལ་དར་བསྒྲོན་འབུལ་ཞུས་རྗེས། རྟེན་འབྱུང་གསོལ་ཇ་དང་། འབྲས་སིལ་འདེགས་འབུལ་ཞུས་ཏེ། ཐེངས་འདིའི་དམ་འབུལ་མཛད་སྒོ་ལེགས་གྲུབ་བྱུང་ཡོད།
ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་ནི། ཕྱི་ལོ་ ༡༩༧༢ ཟླ་བ་ ༣ ཚེས་ ༡ ཉིན་འཁྲུངས་པ་དང་། ཕྱི་ལོ་ ༡༩༩༡ ལོར་མ་སུ་རི་གཏན་སློབ་ནས་ཚན་རིག་སྡེ་ཚན་ཁོངས་ཨང་རིམ་རྩེ་ཕུད་གྲས་ཀྱི་ཐོག་ནས་འཛིན་རིམ་བཅུ་གཉིས་ཐོན། ཤེས་རིག་ལས་ཁུངས་ཀྱི་སློབ་ཡོན་འོག་ཕྱི་ལོ་ ༡༩༩༤ ལོར་ (GCG 42, Punjab University) ནས་ཚན་རིག་སྡེ་ཚན་ཁོངས་རིག་གནས་རབ་འབྱམས་པ་སློབ་མཐར་སོན། ཕྱི་ལོ་ ༡༩༩༤ ནས་ས་རཱ་མཐོ་སློབ་ལས་བྱེད་སྦྱོང་བརྡར་ཁང་དུ་ལས་བྱེད་གསར་བཞུགས་སྦྱོང་བརྡར་ཟླ་གྲངས་བརྒྱད་གནང་ནས་ཕྱི་ལོ་ ༡༩༩༥ ཟླ་བ་ ༩ ཚེས་ ༡༨ ཉིན་གཞུང་ཞབས་ཁོངས་གསར་བཞུགས་ཀྱིས་བདེ་སྲུང་བོད་གནས་ཉམས་ཞིབ་ཁང་དུ་དྲུང་ལས་གནས་རིམ་ཐོག་བཀོད་སྒྲིག་གནང་། ཕྱི་ལོ་ ༡༩༩༩ ལོར་དྲུང་གཞོན་གནས་རིམ་ལ་གནས་སྤར། ཕྱི་ལོ་ ༢༠༠༢ ལོར་འཕྲོད་བསྟེན་ལས་ཁུངས་སུ་གནས་སྤོ་བཀོད་སྒྲིག་གནང་།
ཕྱི་ལོ་ ༢༠༠༥ ལོར་འཕྲོད་བསྟེན་ལས་ཁུངས་ཀྱི་ཟུང་དྲུང་གནས་རིམ་ཐོག་གནས་སྤར། ཕྱི་ལོ་ ༢༠༠༨།༠༩ བར་ལོ་གཅིག་རིང་ཨ་རིར་ Fullbright སློབ་ཡོན་ཁོངས་ University of Massachusetts ནང་སློབ་གཉེར་གནང་སྟེ། ཕྱིར་འཁོར་མཚམས་བཀའ་དྲུང་ཡིག་ཚང་གི་ཟུང་དྲུང་ལ་བཀོད་སྒྲིག་གནང་། ཕྱི་ལོ་ ༢༠༠༩ ལོར་ཕྱི་དྲིལ་ལས་ཁུངས་ཀྱི་ཟུང་དྲུང་གི་ལས་འགན་བཀོད་སྒྲིག་གནང་། ཕྱི་ལོ་ ༢༠༡༣ ལོར་དྲུང་ཆེ་ལས་འཕར་གནས་རིམ་དུ་གནས་སྤར་གནང་། ཕྱི་ལོ་ ༢༠༡༦ ལོར་འཕྲོད་བསྟེན་ལས་ཁུངས་ཀྱི་དྲུང་འཕར་ལ་ལས་འགན་བཀོད་སྒྲིག་གནང་། ཕྱི་ལོ་ ༢༠༡༨ ཟླ་བ་ ༡༠ ཚེས་ ༨ ཉིན་དྲུང་ཡིག་ཆེན་མོར་གནས་སྤར་གྱིས་དཔལ་འབྱོར་ལས་ཁུངས་ཀྱི་དྲུང་ཆེར་བཀོད་སྒྲིག་གནང་། ཕྱི་ལོ་ ༢༠༢༡ ཟླ་བ་ ༧ ཚེས་ ༡ ནས་ཆེས་མཐོའི་ཁྲིམས་ཞིབ་ཁང་གི་ཁྲིམས་དྲུང་དུ་བཀོད་སྒྲིག་གིས་ལས་འགན་ཞུས་པ་དང་། ཕྱི་ལོ་ ༢༠༢༥ ཟླ་བ་ ༣ ཚེས་ ༢༩ ཉིན་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པའི་ལས་ཉིན་བཅུ་གཉིས་པའི་ཐོག་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པར་བདམས་ཐོན་ཞུས་ཡོད་པ་བཅས། །
