༄༅། །བེལ་ཇི་ཡམ་ས་གནས་གཞུང་འབྲེལ་མིན་པའི་ཚོགས་པ་ཆེ་ཁག་གསུམ་སྟེ་དབུས་གཙང་ཆོལ་ཁ། མདོ་སྨད་ཆོལ་ཁ། དེ་བཞིན་ས་གནས་བུད་མེད་ལྷན་ཚོགས་བཅས་ནས་བཀའ་བློན་ཁྲི་ཟུར་ལྷ་སྲས་རྒྱལ་ལོ་དོན་གྲུབ་མཆོག་ཕྱི་ལོ་ ༢༠༢༥ ཟླ་བ་ ༢ ཚེས་ ༨ ཕྱི་དྲོར་ཀ་སྦུག་ཏུ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་པ་དང་། དེ་འབྲེལ་ཕྱི་ལོ་ ༢༠༢༥ ཟླ་བ་ ༣ ཚེས་ ༣༠ ཉིན་གཟའ་མཇུག་དང་བསྟུན་དམ་པ་ཁོང་གི་ཆེད་ཞེ་དགུའི་མཆོད་འབུལ་ཞིག་ཁྱབ་ཁོངས་ཨན་ཊབ་སི་ཤོ་ཏན་དགོན་པའི་ནང་ཉིན་རྒྱབ་ཚོུད་ ༡༢ ནས་ ༣ བར་གོ་སྒྲིག་ཞུས། སྐབས་དེར་སྦར་སིལ་སྐུ་ཚབ་དོན་ཁང་གི་ཡུ་རོབ་བོད་དོན་ཞུ་གཏུག་འབྲེལ་མཐུད་པ་དྲུང་ལས་བསྟན་འཛིན་ཕུན་ཚོགས་ལགས་དང་། བཤད་སྒྲུབ་བསྟན་རྒྱས་གླིང་ཆོས་ཚོགས་ཀྱི་འགན་འཛིན་ཚེ་བརྟན་ཕུན་ཚོགས་ལགས། དགེ་བཤེས་འཇིགས་མེད་ལགས། དེ་བཞིན་གོང་གསལ་ཚོགས་པ་གསུམ་གྱི་ཚོགས་གཙོ་དང་རྒྱུན་ལས་རྣམ་པ། གཞན་ཡང་བེལ་ཇི་ཡམ་གྱི་གྲོང་ཁྱེར་ཆེ་ཁག་དྲུག་ནས་ཁྱོན་བོད་མི་ཉི་བརྒྱ་ལྷག་མཆོད་འབུལ་སྨོན་ལམ་ཐོག་མཉམ་ཞུགས་གནང་ཡོད།
སྔོན་སྨོན་གྱི་གསོལ་ཚིགས་བར་མཚམས་སྐབས་མདོ་སྨད་ཚོགས་གཞོན་རྟ་མགྲིན་ཚེ་བརྟན་ལགས་ནས་ངོ་སྤྲོད་སྙིང་བསྡུས་ཤིག་དང་། དེ་རྗེས་དོན་ཁང་གི་ཡུ་རོབ་བོད་དོན་ཞུ་གཏུག་འབྲེལ་མཐུད་པས་དམ་པ་ཁོང་གི་སྐུ་ཚེའི་ལོ་རྒྱུས་སྙིང་བསྡུས་མང་ཚོགས་ལ་མཁྱེན་རྟོགས་སླད་ངོ་སྤྲོད་དང་འབྲེལ་དམ་པ་ཁོང་སླར་ཡང་བོད་ཆོས་ལྡན་གྱི་ཞིང་ཁམས་སུ་འཁྲུངས་ནས་མུ་མཐུད་བོད་དོན་ཐོག་ཕྱག་ལས་གནང་ཐུབ་པའི་ཐུགས་སྨོན་གནང་སྐྱོང་ཡོང་བ་འབོད་སྐུལ་ཞུས།
གཞན་ཡང་འབྲེལ་མཐུད་པས་སྐབས་དེར་ཟླ་ ༣ ཚེས་ ༢༨ ཉིན་འབར་མ་དང་ཐའེ་ལེནྜ་ནང་ས་ཡོམ་ཚད་གཞི་ ༧་༧ བརྒྱབ་པར་བརྟེན་གོད་ཆག་ཚབས་ཆེ་འོག་མི་རྒྱུ་གཉིས་ལ་གྱོང་གུན་དང་། ལྷག་པར་ས་ཡོམ་ཁྲོད་རྐྱེན་འདས་སུ་གྱུར་བ་རྣམས་ལ་བསྔོ་སྨོན་གནང་ཐབས་ཡོང་བའི་འབོད་སྐུལ་དང་། དེ་འབྲེལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མཛད་པའི་ཕྱག་དེབ་ (Voice for the
Voiceless) ད་ལྟའི་ཆར་རྒྱལ་སྤྱིའི་སྤྱི་ཚོགས་ནང་འགྲེམས་སྤེལ་བྱེད་མུས་ཡིན་པའི་སྐོར་ངོ་སྤྲོད་ཀྱིས་བོད་མི་ཁྱིམ་ཚང་རེ་རེའི་ནང་གོང་གསལ་ཕྱག་དེབ་དེ་ངེས་པར་དུ་ཉར་དགོས་གལ་དང་། ཕྱག་དེབ་དེའི་ནང་དོན་དེ་དག་ངེས་པར་ཤེས་ཐབས་གནང་གལ་འགྲེལ་བརྗོད་ཞུས། ཕྱོགས་མཚུངས་བོད་མིའི་སྒྲིག་འཛུགས་ནས་འདི་ལོའི་༸སྐུའི་གོ་སྟོན་བྱམས་བརྩེའི་ལོ། ཞེས་སྲུང་བརྩི་ཞུ་ཕྱོགས་དང་འབྲེལ་ནས་མང་ཚོགས་ཁྲོད་མཉམ་ཞུགས་གནང་གལ་ཆེ་བའི་སྐོར་འགྲེལ་བརྗོད་ཡང་ཞུས་ཡོད་པ་བཅས།།
