༄༅། །བོད་མིའི་སྒྲིག་འཛུགས་ཀྱི་ཕྱི་དྲིལ་བོད་ཀྱི་འགྲེམས་སྟོན་ཁང་ནས་ཨ་རིའི་མངའ་སྡེ་མི་ནི་སོ་ཊའི་ནང་གི་ཉིན་གྲངས་ ༦ གི་ཕྱོགས་བསྐྱོད་འགྲེམས་སྟོན་ལེགས་པར་མཇུག་སྒྲིལ་ཡོད།

དེ་ཡང་ཕྱི་ལོ་ ༢༠༢༥ ཟླ་བ་ ༢ ཚེས་ ༨ དང་ ༩ ཉིན་གཉིས་རིང་མི་ནི་སོ་ཊ་བོད་རིགས་སྤྱི་མཐུན་ཚོགས་པའི་ཚོགས་ཁང་ནང་གཟའ་མཇུག་སློབ་གྲྭའི་སློབ་མ་དང་། བོད་མི་ཚོར་འགྲེམས་སྟོན་གཟིགས་འབུལ་ཞུས་ཡོད། དེ་བཞིན་ཕྱི་ཚེས་ ༡༠ ཉིན་མི་ནི་སོ་ཊ་ (Macalester College ) མཐོ་སློབ་ཀྱི་སློབ་མ་ཚོར་འགྲེམས་སྟོན་གནང་བར་སློབ་ཕྲུག་ ༥༠ ཙམ་ནས་འགྲེམས་སྟོན་གཟིགས་པར་ཕེབས་ཡོད། ཚེས་ ༡༡ དང་ ༡༢ ཉིན་གཉིས་ཀྱི་རིང་མི་ནི་སོ་ཌ་གཙུག་ལག་སློབ་ཁང་ (University of Minnesota Twin Cities) ནང་འགྲེམས་སྟོན་གོ་སྒྲིག་ཞུས་པར་གཙུག་ལག་སློབ་གྲྭའི་སློབ་མ་ ༨༠ ཙམ་མཉམ་བཞུགས་གནང་། ཚེས་ ༡༣ ཉིན་ (Minneapolis Institute of Art)  བསྟི་གནས་ཁང་གི་ནང་འགྲེམས་སྟོན་ཞུས་པར་མི་གྲངས་ ༡༢༠ ལྷག་འགྲེམས་སྟོན་གཟིགས་པར་ཕེབས་ཡོད། 

ཕྱི་ལོ་ ༢༠༢༥ ལོ་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་དགུ་བཅུ་ཐམ་པར་ཕེབས་འགོ་ཚུགས་པའི་ལོ་ཡིན་པ་དང་བསྟུན། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་དང་ཨ་རིའི་ནང་གི་བོད་རིགས་སྤྱི་མཐུན་ཚོགས་པ་བཞི་ཐུན་མོང་གིས་ཨ་རིའི་ཤར་ཕྱོགས་ཀྱི་ས་ཁུལ་ནིའུ་ཡོག་དང་། དབུས་ནུབ་ཀྱི་ས་ཁུལ་མི་ནི་སོ་ཊ།  ཝི་སི་ཀོན་སིན།  ཅི་ཀ་གྷོ་བཅས་བོད་མི་འདུས་སྡོད་མང་བའི་ས་ཁུལ་བཞིར་ཕྱི་ལོ་ ༢༠༢༥ ཟླ་བ་ ༢ ཚེས་ ༣ ནས་ ༢༤ བར་བོད་དོན་སྐོར་བསྐྱོད་འགྲེམས་སྟོན་གནང་དང་གནང་བཞིན་པ་རེད། །