༄༅། །འདི་གར་སུད་སི་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། སུད་སི་སྐུ་ཚབ་དོན་གཅོད་ལས་ཁུངས་ནས་ཕྱི་ལོ་ ༢༠༡༩ ནས་སུད་སི་དབུས་གཞུང་ལ་ཞུ་གཏུག་རབ་དང་རིམ་པ་ཞུས་པ་མ་ཟད། དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་འདི་ག་ས་གནས་སུ་གཞུང་འབྲེལ་མཚམས་གཟིགས་ནམ་ཕེབས་སྙན་ཐོ་ཐད་སུད་སི་གཞུང་ལ་ཞུ་གཏུག་ཐེངས་མང་གནང་ཡོད་པར་བརྟེན། ཕྱི་ལོ་ ༢༠༢༥ ཟླ་བ་ ༢ ཚེས་ ༡༢ ཉིན་སུད་སི་དབུས་གཞུང་གིས་བོད་པ་དང་ཡུ་གུར་གཉིས་ལ་རྒྱལ་མཚམས་བརྒལ་བའི་དྲག་གནོན་བྱེད་བཞིན་པ་གཞུང་འབྲེལ་ངོས་འཛིན་བྱས་ཡོད་པ་དང་། སྙན་ཐོ་དེའི་ནང་སྤྱི་ཚོགས་འདི་དག་ནས་ཡིན་པའི་མི་སྒེར་པ་ཚོར་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་འབྲེལ་བ་ཡོད་པའི་མི་སྣ་ཁག་གི་གནོན་ཤུགས་སྤྲོད་ཀྱི་ཡོད་ཅེས་གཞུང་འབྲེལ་ཐོག་ངོས་འཛིན་གནང་པ་དེ་ལ་སུད་སི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་ནས་སུད་སི་གཞུང་ནས་ལོ་མང་རྗེས་སྙན་ཐོ་སྟོན་པ་དེ་ལ་དགའ་བསུ་དང་ཐུགས་རྗེ་ཆེ་ཞུ་རྒྱུ་ཡིན།ད་ལན་སུད་སི་དབུས་གཞུང་གིས་སུད་སི་ནང་གི་བོད་མི་དང་འབྲེལ་བའི་སྙན་ཐོར་ལེའུ་བཅུ་དང་ཤོག་གྲངས་ ༣༦ ཡོད། སྙན་ཐོ་འདི་ནི། སུད་སི་གྲོས་ཚོགས་ཀྱི་ཕྱི་འབྲེལ་སྲིད་བྱུས་ལྷན་ཚོགས་(APK-N）ཀྱིས་སུད་སི་བོད་མིའི་གནས་སྟངས་སྐོར་གྱི་སྙན་ཐོ་ཟེར་བའི་གྲོས་ཆོད་ཨང་ ༢༠།༤༣༣༣ གཞི་བཞག་པ་ཡིན། གྲོས་ཚོགས་ནས་སུད་སི་དབུས་གཞུང་ལ་ཕྱི་འབྲེལ་སྲིད་བྱུས་སྐོར་གྱི་སྙན་ཐོ་ཞིབ་ཕྲ་ཞིག་ཕུལ་དགོས་པའི་གྲོས་འཆར་བཏོན་ཡོད་པ་དང་། བརྗོད་བྱ་གཙོ་བོ་སུད་སི་བོད་མའི་གནས་སྟངས་སྐོར་ཡིན་པ་དང་། ལྷག་པར་སྨྲ་བརྗོད་རང་དབང་། སོ་ཉུལ་དང་འབྲེལ་བ་ཡོད། གྲོས་ཚོགས་ནས་ཕྱི་ལོ་ ༢༠༢༡ ཟླ་བ་ ༣ ཚེས་ ༡༥ ཉིན་གྲོས་ཆོད་བཏོན་པ་ལ་བརྟེན་ནས་གཞུང་འབྲེལ་སྙན་ཐོ་འདི་བྱུང་བ་ཡིན། སྙན་ཐོ་འདིའི་ལེའུ་ ༣ པའི་ནང་དུ་བོད་པ་དང་ཡུ་གུར་བའི་སྐྱབས་བཅོལ་སྲིད་བྱུས་ལ་དབྱེ་ཞིབ་བྱས་པ་དང་། དེ་ནང་དུ་སྐྱབས་བཅོལ་བའི་ངོས་འཛིན་དང་ཕྱིར་འབུད་ལག་བསྟར་སྐོར། སུད་སི་རྒྱལ་ཁབ་ནང་གི་བོད་པའི་ཁྲིམས་ཐོག་གི་གནས་བབ་དང་། ལེའུ་ ༤ པའི་ནང་དུ་རྒྱ་ནག་གཞུང་གིས་ཕྱིའི་རྒྱལ་ཁབ། ལྷག་པར་སུད་སི་ནང་གནས་སྡོད་བོད་མི་དང་ཡུ་གུར་བཙན་བྱོལ་སྤྱི་ཚོགས་སུ་སོ་ཉུལ་བྱེད་སྟངས། ལེའུ་ ༥ པའི་ནང་དུ་སུད་སི་རྒྱལ་ཁབ་ནང་གི་བོད་མི་དང་ཡུ་གུར་བར་རྒྱ་ནག་གི་གནོན་ཤུགས་གིས་གཞི་རྩའི་ཐོབ་ཐང་ལ་ཚོད་འཛིན་ཡོད་མེད། ལྷག་པར་རྒྱལ་མཚམས་བརྒལ་བའི་དྲག་གནོན་གྱི་གནད་དོན་ཐོག་གསལ་སྟོན་གནང་ཡོད། ལེའུ་ ༦ པའི་ནང་དུ་ཁྲིམས་ཐོག་ནས་ནུབ་ཕྱོགས་རྒྱལ་ཁབ་ཁག་གིས་རྒྱལ་མཚམས་བརྒལ་བའི་དྲག་གནོན་ལ་གདོང་ལེན་བྱེད་ཐབས་དང་སྲིད་བྱུས་ལ་དབྱེ་ཞིབ་ཀྱིས་སྔོན་འགག་གི་བསམ་འཆར་བཏོན་ཡོད། ལེའུ་ ༩ པའི་ནང་དུ་སུད་སི་གཞུང་གིས་གོམ་གང་མདུན་སྤོས་ཀྱིས་བྱེད་ཐབས་ལག་བསྟར་གྱིས་རྒྱལ་མཚམས་བརྒལ་བའི་དྲག་གནོན་སྔོན་འགག་བྱ་རྒྱུའི་སྐོར་གསལ་ཡོད།
སྙན་ཐོ་དེ་ནི་བྷ་སལ་སློབ་གྲྭ་ཆེན་མོས་ཞིབ་འཇུག་བྱས་པའི་སྙན་ཐོ་གཞི་བཅོལ་གྱིས་སུད་སི་གཞུང་གིས་གཞུང་འབྲེལ་གྱི་བཏོན་པ་སྙན་ཐོ་ཞིག་ཡིན། སྙན་ཐོ་ནང་མ་འོངས་པར་བོད་མི་དང་ཡུ་གུར་བ་སྲུང་སྐྱོབ་ལག་བསྟར་བྱེད་ཕྱོགས་སྐོར་ལ། རྒྱལ་སྤྱིའི་རིམ་པའི་ཐོག་ནས་རྒྱ་ནག་དང་རྒྱལ་མཚམས་བརྒལ་བའི་དྲག་གནོན་གྱི་བྱ་སྤྱོད་ལ་མཐུན་འགྱུར་བྱེད་མཁན་གྱི་རྒྱལ་ཁབ་ཚང་མར་ཕྱི་འབྲེལ་གྱི་ཐོག་ནས་ཡ་ལན་སྤྲོད་རྒྱུ་དང་། དེ་ལ་བརྟེན་ནས་སུད་སིས་རྒྱ་ནག་གི་ད་ལྟའི་བྱ་སྤྱོད་ལ་བཟོད་སྒོམ་བྱེད་རྒྱུ་མིན་པ་མ་ཟད། རྒྱལ་ཁབ་ཀྱི་རིམ་པའི་ཐོག་ནས་ནང་ཁུལ་ཐབས་ལམ་ཏེ། དབང་འཛིན་པ་ཚོའི་ཁྲོད་དུ་གོ་རྟོགས་སྤེལ་བ་དང་གནོད་འཚེ་ཕོག་ཡུལ་ཚོར་རོགས་སྐྱོར་བྱ་རྒྱུ་ཡིན་པ་གསལ་སྟོན་གནང་ཡོད།
