༄༅། །བལ་ཡུལ་མཆོད་རྟེན་བྱ་རུང་ཁ་ཤོར་གྱི་ཉེ་འདབས་སུ་རྟེན་གཞི་བྱས་པའི་ཤེལ་དཀར་ཆོས་སྡེ་དགའ་ལྡན་ལེགས་བཤད་གླིང་གྲྭ་ཚང་དུ་སྔར་སྲོལ་བཞིན་བསྟན་སྲིད་སྤྱིའི་ཞབས་རིམ་དུ་དམིགས་ཏེ་བཅོམ་ལྡན་འདས་འཇམ་དཔལ་གཤིན་རྗེ་གཤེད་ཀྱི་སྒོ་ནས་རྡུལ་མཚོན་དཀྱིལ་འཁོར་ཞལ་ཕྱེས་ཏེ་སྒྲུབ་མཆོད་ཉིན་གསུམ་དང་འབྲེལ་དྲུག་ཅུ་མའི་གཏོར་ཟློག་སྦྱོར་དངོས་མཇུག་སུམ་ལེགས་གྲུབ་ཐོག་བོད་ཟླ་ ༡༢ ཚེས་ ༡༩ ཕྱི་ལོ་ ༢༠༢༥ ཟླ་བ་ ༢ ཚེས་ ༡༦ ཉིན་སྔར་རྒྱུན་ལྟར་གར་འཆམ་གཟིགས་འབུལ་གནང་སྲོལ་ཡོད་པར་སྐབས་དེར་སྐུ་མགྲོན་དུ་བལ་ཡུལ་སྐུ་ཚབ་དོན་གཅོད་ཀྱི་གཙོས་པས་བོད་མི་མང་སྤྱི་འཐུས་དང་སྤྱི་ཟུར། ས་གནས་འགོ་འཛིན་ཁག དེ་བཞིན་སྡེ་ཚན་ཁག་གི་འགན་འཛིན་ཁག་དང་། བལ་པོའི་གཞུང་གི་གྲོས་ཚོགས་འཐུས་མི་དང་། བལ་གཞུང་ས་གནས་གྲོང་སྡེ་ལྷན་ཁག་གཉིས་ཀྱི་གལ་ཆེའི་དཔོན་རིགས། དེ་བཞིན་ས་གནས་ཉེན་རྟོགས་སྐོར་སྲུང་བའི་ཆེས་མཐོའི་ལས་བྱེད་སོགས་འབྲེལ་ཡོད་ཁག་སྐུ་མགྲོན་དུ་གདན་འདྲེན་ཞུས།
སྒྲུབ་མཆོད་དང་གར་འཆམ་ནི་སྔར་ཤེལ་ཆོས་མཁན་ཐོག་དང་པོ་སྤང་ལོ་ཙཱ་བ་ནས་བཟུང་མཁན་ཐོག་གཉིས་པ་ལོ་ཆེན་བྱང་ཆུབ་རྩེ་མོ་སོགས་རིམ་བཞིན་བྱོན་པའི་མཁན་ཐོག་དགུ་པ་སྤྱན་རས་གཟིགས་ཀྱི་རྣམ་སྤྲུལ་མཁན་ཆེན་ནམ་མཁའ་རྡོ་རྗེ་མཆོག་ནས་ཐོག་མར་ཆོས་སྡེར་སྒྲུབ་མཆོད་དང་འབྲེལ་བའི་སྒོ་ནས་ཡིད་དམ་ལྷ་དང་ཆོས་སྲུང་སོགས་ཀྱི་གར་འཆམ་གསར་འཛུགས་གནང་བ་ནས་དར་རྒྱས་བྱུང་བ་མ་ཟད། ལྷག་པར་༧རྒྱལ་མཆོག་ལྔ་པ་ཆེན་པོའི་སྐབས་ནས་ཤེལ་ཆོས་དགེ་ལྡན་ལུགས་བཟང་དུ་བསྒྱུར་རྗེས་ཀྱི་མཁན་རབས་གསུམ་པ་༧རྒྱལ་མཆོག་ལྔ་པ་ཆེན་པོ་རང་ཉིད་ཀྱི་ཞལ་སློབ་ཏུ་གཏོགས་པ་ཕྱིང་དཀར་བ་མཁན་ཆེན་བཀྲ་ཤིས་རྒྱ་མཚོའི་སྐབས་མཁན་ཆེན་གང་ཉིད་ཀྱིས་གཟིགས་སྣང་སོགས་གར་འཆམ་ཁག་གཞི་རྒྱ་ཆེ་རུ་བཏང་བ་དང་། འཆམ་ཡིག་སོགས་མཛད་ཅིང་སྔ་དུས་ནས་ད་ལྟའི་བར་གཞིས་བྱེས་གཉིས་ཀྱི་ཤེལ་ཆོས་གྲྭ་ཚང་དུ་ ༼ཤེལ་དཀར་སྒྲུབ་མཆོད་༽ ཞེས་ཡོད་པ་དེ་ཉིད་ཀྱང་ཤེལ་དཀར་མངའ་ཞབས་ཁུལ་དུ་བྱིན་རླབས་ཀྱི་ཚན་ཁ་ཤིན་ཏུ་ཆེ་བ་དང་ལྟད་མོ་སོགས་ཆེ་བས་ཡུལ་ལུང་གང་སར་ཡོངས་གྲགས་སུ་གྱུར་བས་མི་མང་ཡང་འདུ་འཛོམས་ཆེ་བ་ཡོད་པ་བཅས་སོ།།
