༄༅། །ཕྱི་ལོ་ ༢༠༢༥ ཟླ་བ་ ༢ ཚེས་ ༢༡ ཉིན་བོད་ཀྱི་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་སུད་སི་གྲོང་ཁྱེར་ཛུ་རིག་ཏུ་ས་གནས་བོད་མི་རྣམས་ལ་གསུང་བཤད་དང་འབྲེལ། ཐེངས་འདིའི་ཡུ་རོབ་ནང་གི་བོད་དོན་ཞུ་གཏུག་ལེགས་གྲུབ་བྱུང་ཡོད།
དེ་ཡང་སུད་སི་དང་ལིག་ཊེན་ཚིན་བོད་རིགས་མི་མང་སྒྲིག་འཛུགས་དང་། སུད་བོད་མཛའ་འབྲེལ་ཚོགས་པ། ཡུ་རོབ་བོད་རིགས་གཞོན་ནུ་ལྷན་ཚོགས། སུད་སིའི་བུད་མེད་ལྷན་ཚོགས་བཅས་ཐུན་མོང་གི་གོ་སྒྲིག་འོག་ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་སུད་སི་གྲོང་ཁྱེར་ཛུ་རིག་ཏུ་ས་གནས་བོད་མི་རྣམས་ལ་གསུང་བཤད་གནང་ཡོད། སྐབས་དེར་སུད་སི་དང་ལིག་ཊེན་ཚིན་བོད་རིགས་མི་མང་སྒྲིག་འཛུགས་ཀྱི་ཚོགས་གཙོས་ཕེབས་བསུའི་གསུང་བཤད་དང་། སུད་སིའི་བུད་མེད་ལྷན་ཚོགས་ཀྱི་ཚོགས་གཞོན་གྱིས་རྣམ་སྐྱིད་ལགས་འདི་ལོའི་ཇི་ནི་ཝའི་ལྷན་ཚོགས་ཐོག་མཉམ་ཞུགས་ཀྱིས་གསུང་བཤད་གནང་བའི་སྐོར་ངོ་སྤྲོད་གནང་ཡོད། གཞན་ཡང་མཛད་སྒོོའི་ཐོག་སུད་སིའི་སྐུ་ཚབ་དོན་ཁང་གི་རྒྱལ་ཚོགས་སུ་བོད་དོན་ཞུ་གཏུག་ལས་བྱེད་ཕུན་ཚོགས་སྟོབས་རྒྱལ་ལགས་ཀྱིས་རྣམ་སྐྱིད་ལགས་ནས་ཉེ་ལམ་མཉམ་འབྲེལ་རྒྱལ་ཚོགས་སུ་བོད་མིའི་གཞི་རྩའི་རང་དབང་ཐད་ཞུ་གཏུག་གནང་ཡོད་པ་མ་ཟད། རྒྱ་ནག་གཞུང་གི་དྲག་གནོན་སྲིད་བྱུས་དང་འགྲོ་བ་མིའི་ཐོབ་ཐང་རྡོག་རོལ་གཏོང་བའི་བྱ་སྤྱོད་རྣམས་ཐེར་འདོན་གནང་ཡོད་པ་འགྲེལ་བརྗོད་གནང་འདུག
ཆབ་སྲིད་བཙོན་ཟུར་རྣམ་སྐྱིད་ལགས་ཀྱིས་ས་གནས་མང་ཚོགས་ ༢༠༠ ལྷག་ལྷན་ཞུགས་ཡོད་པ་རྣམས་ལ། ཁོང་མོར་རྒྱ་ནག་གཞུང་གི་བཙོན་ཁང་དུ་སྡུག་སྦྱོང་མནར་གཅོད་མྱངས་པའི་བརྒྱུད་རིམ་སྐོར་གསུང་ཞིང་། རྒྱ་ནག་གཞུང་གིས་ལྟ་སྲུང་དོ་དམ་དང་བསུན་གཙེར་རྐྱེན་པས་ད་ལྟའང་ཁོང་མོའི་ལུས་སེམས་གཉིས་ལ་འཕྲད་བཞིན་པའི་དཀའ་སྡུག་སྐོར་གསལ་བཀྲོལ་གནང་སྟེ་མང་ཚོགས་ཀྱི་བཀའ་འདྲིའི་དགོངས་སྐོར་ཁག་ལ་ལན་འདེབས་གསལ་བཤད་གནང་ཡོད།
གཞན་ཡང་རྣམ་སྐྱིད་ལགས་ཀྱིས་རྒྱ་ནག་གཞུང་གི་དབང་སྒྱུར་འོག་བོད་ནང་གི་བོད་མི་ཚོར་སྡུག་སྦྱོང་མནར་གཅོད་མྱོང་བཞིན་ཡོད་པར། བཙན་བྱོལ་དུ་གནས་འཁོད་རང་རིགས་གཞོན་སྐྱེས་རྣམས་ནས་གཞིས་བཞུགས་བོད་མི་ཚོའི་ཆེད་དུ་རྒྱལ་སྤྱིའི་སྟེང་དྲིལ་བསྒྲགས་དང་བོད་དོན་ལས་འགུལ་ཐོག་མཉམ་ཞུགས། དེ་བཞིན་བོད་ནང་གི་གནས་སྟངས་ལ་འགྱུར་བ་ཡོང་ཆེད་རྒྱལ་སྤྱིའི་སྤྱི་ཚོགས་ལ་ཞུ་སྐུལ་གང་ཡོང་གནང་དགོས་པ་མ་ཟད། རང་མི་རིགས་ཀྱི་ངོ་བོ་དང་རིག་གཞུང་། སྐད་ཡིག་སྲུང་སྐྱོབ་དགོས་པའི་ནན་སྐུལ་གནང་ཡོད།
གཞི་རྩའི་ཕྱི་ལོ་ ༢༠༢༣ ལོར་བོད་ནས་རྒྱ་གར་དུ་འབྱོར་བའི་རྣམ་སྐྱིད་ལགས་ནི། བོད་མདོ་སྨད་རྔ་བ་ཁུལ། བཅའ་རོ་ཡུལ་ཚོ་པདྨ་ལྷ་ཐང་ནས་ཡིན་པ་དང་། དེ་སྔ་ཕྱི་ལོ་ ༢༠༡༥ ལོར་རྣམ་སྐྱིད་ལགས་དང་ཁོང་གི་སྤུན་མཆེད་བསྟན་འཛིན་སྒྲོལ་མ་ལགས་ནས་ལག་ཏུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་འཕྱར་ཏེ་རྒྱ་ནག་གཞུང་ལ་ཞི་བའི་ངོ་རྒོལ་གནང་བར། ལོ་གསུམ་གྱི་རིང་བཙོན་འཇུག་ཁྲིམས་ཐག་བཅད་པ་དང་། ཕྱི་ལོ་ ༢༠༡༨ ལོར་གློད་བཀྲོལ་ཐོབ་ཡོད་པ་རེད། །
