༄༅། །ཕྱི་ལོ་ ༢༠༢༥ ཟླ་བ་ ༠༢ ཚེས་ ༡༤ དང་ ༡༥ བཅས་ཉིན་གྲངས་གཉིས་རིང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ན་གཞོན་རོགས་སྐྱོར་ཚན་པའི་གོ་སྒྲིག་འོག་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ་ཟབ་སྦྱོང་ཞིག་གནང་ཡོད། ཟབ་སྦྱོང་དེའི་བརྒྱུད་ན་གཞོན་རྣམས་ལ་ངོ་སྤྲོད་ཡི་གེ་འབྲི་སྟངས་དང་། ལོ་རྒྱུས་སྙིང་བསྡུས་བཟོ་སྟངས། བཅར་འདྲི་སྐབས་ཀྱི་འགྲོ་ལུགས་སོགས་ཀྱི་སྐོར་སློབ་ཁྲིད་གནང་ཡོད།
དེ་ཡང་དེ་སྔའི་ལས་རིགས་གྲ་སྒྲིག་གི་སྦྱོང་བརྡར་སྐབས་སུ་ས་རཱ་མཐོ་རིམ་སློབ་གཉེར་ཁང་ནས་མཉམ་ཞུགས་གནང་མཁན་མང་པོ་བྱུང་བར་བརྟེན་ད་ཐེངས་དམིགས་བསལ་གྱིས་སློབ་གཉེར་ཁང་དུ་སྦྱོང་བརྡར་གོ་སྒྲིག་ཞུས་ཡོད་པ་རེད། སྦྱོང་བརྡར་འདིས་སློབ་ཕྲུག་ཚོར་ལས་ཀའི་ཆེད་གྲ་སྒྲིག་བྱེད་པར་རོགས་རམ་དང་ལག་ལེན་གྱི་ནུས་པ་མཁོ་སྤྲོད་གནང་ཡོད།
སྦྱོང་བརྡར་མཇུག་སྒྲིལ་སྐབས་མཉམ་ཞུགས་པ་ཚོས་ཤེས་བྱ་དང་ནུས་པ་གསར་པ་ཐོབ་པར་དགའ་ཚོར་ཆེན་པོ་བྱུང་བའི་དགོངས་ཚུལ་གསུངས་ཡོད། སྐབས་དེར་མཉམ་ཞུགས་པ་གྲངས་ ༣༠ ཕེབས་ཡོད་པ་བཅས།།
