༄༅། །ཕྱི་ལོ་ ༢༠༢༥ ཟླ་ ༠༡ ཚེས་ ༡༠ ཉིན་ཨོ་སྟྲེ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་བོད་ནང་ས་ཡོམ་གྱི་གོད་ཆག་ཕོག་པར་གདུང་སེམས་མཉམ་སྐྱེའི་བསྒྲགས་གཏམ་ཞིག་སྤེལ་ཡོད།

དེ་ཡང་ཨོ་སྟྲེ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཟུང་སྦྲེལ་ཚོགས་གཙོ་གྲོས་ཚོགས་འཐུས་མི་ལྕམ་སྐུ་སུ་སན་ཊེམ་པལ་མན་ (Susan Templeman) ལགས་དང་། གྲོས་ཚོགས་འཐུས་མི་སྐུ་ཞབས་ཌིན་སི་མིཊ་ (Dean Smith) ལགས། གྲོས་ཚོགས་གོང་མའི་འཐུས་མི་ལྕམ་བྷར་སྦ་ར་པོ་ཀོག་ (Barbara Pocock) ལགས་བཅས་ཐུན་མོང་ནས། ཕྱི་ལོ་ ༢༠༢༥ ཟླ་བ་ ༠༡ ཚེས་ ༠༧ ཉིན་བོད་ནང་ས་ཡོམ་གྱི་གནོད་འཚེ་ཕོག་མཁན་རྣམས་ལ་སེམས་གསོ་དང་། གདུང་སེམས་མཉམ་སྐྱེ་ཞུ་རྒྱུ་ཡིན། རྒྱ་ནག་གཞུང་གིས་རྒྱལ་སྤྱིའི་སྤྱི་ཚོགས་ལ་གནས་ཚུལ་ཕྱི་གསལ་ནང་གསལ་ངེས་པར་དུ་བཟོ་དགོས་པ་མ་ཟད། མྱུར་སྐྱོབ་ཀྱི་ལས་གཞི་གང་ཡང་ཡིན་རུང་བོད་མི་རྣམས་གནས་སྤོ་བྱེད་དུ་འཇུག་རྒྱུ་དང་། ཆོས་དང་རིག་གཞུང་། ཐོབ་ཐང་བཅས་འཕྲོག་རྒྱུ་མེད་པ་བཟོ་དགོས། ཞེས་འཁོད་ཡོད།

དེ་བཞིན་ས་ཡོམ་འདིས་རྒྱ་ནག་གིས་བོད་ས་བཙན་བཟུང་བྱས་པའི་འོག་ལོ་བདུན་ཅུ་ལྷག་རིང་དཀའ་སྡུག་མྱངས་དང་མྱོང་བཞིན་པའི་བོད་མི་རྣམས་ཀྱི་དཀའ་ངལ་སྔར་ལས་ཇེ་སྡུག་ཏུ་གཏོང་ངེས་ཡིན་པ་དང་། ད་ལྟའི་དུས་སྐབས་འདིར་ས་ཡོམ་གྱིས་གནོད་འཚེ་ཕོག་པ་རྣམས་ཀྱི་བདེ་འཇགས་དང་བདེ་དོན་ལ་གལ་གང་ཆེ་ཤོས་སྤྲོད་དགོས་ཞེས་འཁོད་ཡོད།

གཞན་ཡང་མེག་ཁེ་ལར་གྱི་གྲོས་ཚོགས་འཐུས་མི་དང་བོད་དོན་ལ་རྒྱབ་སྐྱོར་ཤུགས་ཆེ་གནང་མཁན་ལྕམ་སོ་ཕི་སི་ཁེམ་སི་ (Sophie Scamps) ལགས་ཀྱིས་གསལ་བསྒྲགས་ཤིག་སྤེལ་ཏེ་དེའི་ནང་བོད་ནང་གི་ས་ཡོམ་ལ་ཨོ་སྟྲེ་ལི་ཡའི་གཞུང་གིས་མྱུར་དུ་ཡ་ལན་སྤྲོད་དགོས་པའི་འབོད་སྐུལ་གནང་ཡོད། ཁོང་མོས་བོད་མི་རྣམས་དཀའ་ངལ་འཕྲད་བཞིན་པའི་དུས་སྐབས་འདིར་ཨོ་སྟྲེ་ལི་ཡའི་གཞུང་གིས་རང་བྱུང་གོད་ཆག་འདིར་ཡ་ལན་སྤྲོད་དགོས་པ་མ་ཟད། རྒྱལ་སྤྱིའི་སྤྱི་ཚོགས་ཀྱིས་རོགས་རམ་སྤྲོད་ཐུབ་པའི་ཆེད་དུ་རྒྱ་ནག་གཞུང་གིས་རང་བྱུང་གོད་ཆག་གི་གནས་ཚུལ་དང་པར་རིས་རྣམས་རྒྱལ་སྤྱིའི་སྤྱི་ཚོགས་ལ་མཁོ་སྤྲོད་བྱ་རྒྱུར་དམ་བསྒྲགས་མ་བྱེད་རོགས་ཞེས་འབོད་སྐུལ་གནང་ཡོད། །